स्थानिक निवडणुकीच्या पार्श्वभूमीवर आरक्षण सोडतीने नवीन रंग भरण्याचे काम केले आहे. नगरपरिषदेच्या आरक्षणानंतर सर्वांचे लक्ष आता जिल्हा परिषदेच्या आरक्षणावर लागले होते. अखेर या प्रतीक्षेला उत्तर मिळाले असून, जिल्हा परिषदेची आरक्षण सोडत जाहीर करण्यात आले आहे.
महाराष्ट्राच्या राजकीय आकाशात स्थानिक स्वराज्य संस्थांच्या निवडणुकींचा रणसंग्राम जोरात रंगला आहे. गेल्या काही दिवसांपासून सर्वांचे लक्ष लागले होते ते जिल्हा परिषदेच्या आरक्षण सोडतीकडे. अखेर, 13 ऑक्टोबर 2025 रोजी अकोला जिल्हा परिषदेच्या आरक्षण सोडतीने सर्वांच्या उत्सुकतेला पूर्णविराम दिला आहे. या सोडतीने अकोला जिल्ह्यातील राजकीय समीकरणांना नवे वळण मिळाले आहे. विशेषत: महिलांना मिळालेल्या मोठ्या संधीमुळे सर्वत्र उत्साहाचे वातावरण आहे. नगरपरिषदांच्या आरक्षण सोडतीनंतर आता जिल्हा परिषदेच्या 52 सर्कलसाठी आरक्षण जाहीर झाले आहे. यात विशेष बाब म्हणजे तब्बल 26 सर्कलवर महिलांचा राज ठरला आहे. ही सोडत जिल्हाधिकारी वर्षा मीना यांच्या उपस्थितीत नियोजन भवनात पार पडली. यावेळी निवासी उपजिल्हाधिकारी विजय पाटील यांच्यासह अनेक अधिकारी, कर्मचारी आणि राजकीय पक्षांचे प्रतिनिधी हजर होते.
प्रारूप आरक्षण अधिसूचनेसाठी हरकती 17 ऑक्टोबरपर्यंत तहसीलदारांकडे सादर करता येतील. अन्यथा त्यानंतरच्या हरकती ग्राह्य धरल्या जाणार नाहीत, असे स्पष्ट करण्यात आले आहे. अकोला जिल्ह्यातील 52 सर्कलसाठी आरक्षणाची विभागणी झाली आहे. अनुसूचित जातींसाठी 12 जागा (6 महिला), अनुसूचित जमातींसाठी 5 जागा (3 महिला), नागरिकांचा मागास वर्ग प्रवर्गासाठी 14 जागा (7 महिला) आणि सर्वसाधारण प्रवर्गासाठी 21 जागा (10 महिला). यामुळे एकूण 26 जागांवर महिलांचा वरचष्मा राहणार आहे. तालुकानिहाय पाहिल्यास, तेल्हारामध्ये दानापूर सर्वसाधारण महिला, अडगाव अनुसूचित जमाती, शिरसोली सर्वसाधारण, बेलखेड सर्वसाधारण महिला, पाथर्डी सर्वसाधारण, दहिगाव सर्वसाधारण, भांबेरी सर्वसाधारण अश्या जागा आहेत. अकोट मध्ये उमरा येथे नागरिकांचा मागासवर्ग प्रवर्ग महिला, अकोलखेड येथे अनुसूचित जमाती महिला आहेत.
Corporation Elections : राजकीय रंगमंचावर महिला सुपरस्टार्सचा जलवा
तालुकानिहाय जागा
अकोली जहांगीर अनुसूचित जमाती महिला, वडाळी देशमुख सर्वसाधारण महिला, मुंडगाव नागरिकांचा मागासवर्ग प्रवर्ग महिला अश्या जागा आहेत. वरूर येथे नागरिकांचा मागासवर्ग प्रवर्ग महिला, कुटासा सर्वसाधारण, चोहोट्टा सर्वसाधारण महिला अश्या जागा निश्चित आहेत. मूर्तिजापूरच्या लाखपुरी येथे अनुसूचित जाती, शेलू (बाजार) अनुसूचित जाती, कुरूम सर्वसाधारण, माना सर्वसाधारण महिला, सिरसो अनुसूचित जाती, हातगाव नागरिकांचा मागासवर्ग प्रवर्ग महिला, कानडी अनुसूचित जाती महिला अश्या जागा आहेत. अकोला आगर येथे नागरिकांचा मागास वर्ग प्रवर्ग, दहिहंडा अनुसूचित जाती महिला, घुसर अनुसूचित जमाती महिला, उगवा, बाभुळगाव येथे अनुसूचित जाती, कुरणखेड नागरिकांचा मागासवर्ग प्रवर्ग, कानशिवणी अनुसूचित जाती महिला अश्या जागा आहेत.
बोरगाव मंजू आणि चांदूर येथे नागरिकांचा मागास वर्ग प्रवर्ग तर चिखलगाव सर्वसाधारण महिला अश्या जागा आहेत. बाळापूर अंदुरा येथे अनुसूचित जाती महिला, हातरूण नागरिकांचा मागास वर्ग प्रवर्ग, निमकर्दा अनुसूचित जाती महिला, व्याळा आणि पारस– सर्वसाधारण, देगाव अनुसूचित जाती आणि वाडेगाव येथे नागरिकांचा मागासवर्ग प्रवर्ग आहे. बार्शिटाकळी येथे कान्हेरी सरप- नागरिकांचा मागासवर्ग प्रवर्ग महिला, दगडपारवा, पिंजर आणि झोडगा येथे सर्वसाधारण महिला आहेत. महान सर्वसाधारण, राजंदा नागरिकांचा मागासवर्ग प्रवर्ग पाणी जामवसू सर्वसाधारण आहे. पातूरच्या शिर्ला येथे अनुसूचित जाती महिला, चोंडी अनुसूचित जमाती, विवरा सर्वसाधारण, सस्ती आणि पिंपळखुटा-नागरिकांचा मागासवर्ग प्रवर्ग तर आलेगाव सर्वसाधारण महिला अश्या जागा आहेत.
आरक्षण सोडतीने अकोला जिल्ह्यातील राजकीय पक्षांच्या रणनीतींना नवी दिशा मिळणार आहे. प्रत्येक पक्ष आता आपल्या उमेदवारांची यादी तयार करण्यात आणि विशेषत: महिला उमेदवारांना पुढे आणण्यात व्यस्त आहे. महिलांसाठी तब्बल 50 टक्के जागा राखीव ठेवण्यात आल्याने, यंदाच्या निवडणुकीत महिला नेतृत्वाला प्रोत्साहन मिळेल, असा विश्वास व्यक्त होत आहे. या सोडतीने अकोला जिल्ह्यातील राजकीय चित्र बदलणार असून, नव्या नेतृत्वाला संधी मिळण्याचा मार्ग मोकळा झाला आहे.
