सीबीआय अहवालाने मुंबई पोलिसांचा तपास योग्य ठरवला. अनिल देशमुख यांच्या भूमिकेला समर्थन मिळाले असताना भाजपचा राजकीय डाव उधळला.
सुशांतसिंह राजपूत आत्महत्या प्रकरणाच्या तपासाला अखेर सीबीआयच्या क्लोजर रिपोर्टने अंतिम स्वरूप दिले आहे. या अहवालात मुंबई पोलिसांनी केलेल्या तपासावर शिक्कामोर्तब करण्यात आले आहे. राष्ट्रवादी काँग्रेसचे ज्येष्ठ नेते आणि तत्कालीन गृहमंत्री अनिल देशमुख यांनी या निर्णयावर समाधान व्यक्त करताना भाजपवर जोरदार टीका केली. बिहार निवडणुकीच्या राजकीय फायद्यासाठी या प्रकरणाला चुकीच्या दिशेने नेण्यात आले होते, असे त्यांचे मत आहे.
सुरुवातीपासूनच मुंबई पोलिसांनी या प्रकरणाचा सखोल तपास केला होता. त्यामध्ये स्पष्ट झाले होते की, सुशांतसिंह राजपूत यांनी आत्महत्या केली होती. मात्र, त्यावेळी विरोधकांनी या घटनेला हत्या म्हणून रंगवून लोकांच्या भावनांशी खेळ केला. बिहार निवडणुकीच्या पार्श्वभूमीवर भाजपने हा मुद्दा उचलून घेतला. राज्य सरकारवर दबाव टाकण्यासाठी सीबीआय चौकशीची मागणी केली. आता आलेल्या अहवालाने सिद्ध केले आहे की, त्या वेळी भाजपने केवळ राजकीय फायदा उठवण्यासाठी मुंबई पोलिसांवर आणि महाराष्ट्र सरकारवर आरोप केले होते.
Sanjay Raut : हिंदुत्त्ववाद्यांना तैमूर चालतो, पण औरंगजेबाची कबर नको
राजकीय षडयंत्राचा पराभव
सुशांतसिंह राजपूत यांच्या मृत्यूनंतर सोशल मीडियावर आणि माध्यमांत एकच गदारोळ उडाला होता. महाराष्ट्र सरकारला लक्ष्य करण्यासाठी आणि बिहार निवडणुकीत सहानुभूती लाट निर्माण करण्यासाठी हा मुद्दा वापरण्यात आला. भाजपने या प्रकरणात सीबीआय चौकशीसाठी मोठा गदारोळ घातला आणि रिया चक्रवर्ती व इतरांवर गंभीर आरोप केले. मात्र, आता आलेल्या सीबीआयच्या क्लोजर रिपोर्टनुसार, मुंबई पोलिसांनी केलेला तपास योग्य असल्याचे सिद्ध झाले. हेच अनिल देशमुख सातत्याने सांगत होते. विरोधकांनी केलेले आरोप फोल ठरले असून, सुशांतसिंह राजपूत यांची आत्महत्या ही मानसिक आरोग्याशी संबंधित बाब असल्याचे स्पष्ट झाले आहे.
सरकारवर दबाव
भाजपने या प्रकरणाचा वापर करून महाराष्ट्र सरकारला बदनाम करण्याचे राजकारण खेळले. तत्कालीन गृहमंत्री अनिल देशमुख यांना आणि त्यांच्या नेतृत्वाखालील मुंबई पोलिसांना विनाकारण लक्ष्य करण्यात आले. बिहार विधानसभा निवडणुकीच्या तोंडावर हा मुद्दा तापवला गेला आणि भाजपने आपला निवडणूक प्रचार हाच मुद्दा केंद्रस्थानी ठेवून केला. सुशांतसिंह राजपूत यांचे वडील के.के. सिंह यांनी पाटणा पोलिसांकडे तक्रार दाखल करताना हत्या आणि आर्थिक फसवणुकीचा आरोप केला. त्यानंतर बिहार सरकारने तपास सीबीआयकडे सोपवण्याची मागणी केली. मात्र, प्रत्यक्षात तपासानंतर कोणतेही खूनाचे पुरावे हाती लागले नाहीत. हे स्पष्ट होताच भाजपने या प्रकरणावरून गप्प राहणे पसंत केले.
भाजपचा डाव उधळला
सीबीआय अहवालानंतर अनिल देशमुख यांनी आपल्या भूमिकेचे समर्थन करत मुंबई पोलिसांना न्याय मिळाल्याचे सांगितले. त्यांनी वारंवार सांगितले होते की, सुशांतसिंह राजपूत यांनी आत्महत्या केली आहे आणि मुंबई पोलिसांनी त्याबाबत योग्य तपास केला आहे. आता त्यांचे म्हणणे शंभर टक्के खरे ठरले आहे. या संपूर्ण प्रकरणाने महाराष्ट्राच्या राजकारणात मोठी खळबळ उडवली होती. सीबीआयच्या अहवालानंतर भाजपच्या आरोपांची हवा निघून गेली आहे. अनिल देशमुख आणि मुंबई पोलिसांचा तपास योग्य होता हे सिद्ध झाले आहे. हा अहवाल म्हणजे सत्याचा विजय असून, विरोधकांनी केलेल्या राजकीय नाट्याचा शेवट आहे.
