नागपुरात ‘विकसित महाराष्ट्र 2047–युवा व क्रीडा संवाद’ची सुरुवात झाली. क्रीडा मंत्री ॲड. माणिकराव कोकाटे यांनी खेळाडू व प्रशिक्षकांच्या सूचनांना सकारात्मक प्रतिसाद दिला.
नागपूरच्या पवित्र भूमीत आज क्रीडा क्षेत्रातील एका स्वप्नवत प्रवासाला सुरुवात झाली. विभागीय क्रीडा संकुल, मानकापूर येथे ‘विकसित महाराष्ट्र 2047-युवा व क्रीडा संवाद’ या अभिनव उपक्रमाने सर्वांचे लक्ष वेधले. क्रीडा व युवक कल्याणमंत्री ॲड. माणिकराव कोकाटे यांच्या उपस्थितीत हा संवाद साकारला. जिथे खेळाडू, प्रशिक्षक, संघटक आणि पालकांनी आपली स्वप्ने आणि सूचना मांडली. या मंचाने प्रत्येकाच्या आकांक्षांना आवाज देत, माणिकराव कोकाटे यांनी क्रीडा क्षेत्राच्या भविष्याला नवी दिशा देण्याचा संकल्प व्यक्त केला. हा संवाद केवळ चर्चा नसून, राज्याच्या क्रीडा विश्वात क्रांती घडवण्याचा पायाच ठरला.
गडचिरोलीचा राष्ट्रीय धनुर्धर जय ठेंबले याने आंतरराष्ट्रीय स्पर्धांसाठी आवश्यक साधनसामग्रीची मागणी मांडत या संवादाला प्रारंभ केला. माणिकराव कोकाटे यांनी तात्काळ ही मागणी स्वीकारत, जिल्हा क्रीडा संकुलामार्फत खेळाडूंना सर्वतोपरी सहाय्य करण्याचे निर्देश दिले. सलग चार तास चाललेल्या या संवादात प्रत्येक सूचनेचा बारकाईने विचार झाला. क्रीडा व युवक सेवा संचालनालय, पुणे यांच्या पुढाकाराने आयोजित या उपक्रमाने नागपूर विभागातील सहा जिल्ह्यांतील प्रतिनिधींना एकत्र आणले. ज्यांनी आपल्या मागण्या आणि कल्पना थेट मंत्र्यांसमोर मांडल्या.
Nitin Gadkari : हलबा समाजाच्या स्वप्नांना शिक्षण अन् उद्यमशीलतेचा आधार
सर्वसमावेशक धोरणाची मुहूर्तमेढ
नागपुरातील या संवादात स्क्वॅश खेळाचे संघटक सरोजित मंडल यांनी प्रवास आणि निवास भत्त्यासाठी वार्षिक निधीची गरज व्यक्त केली. तर आधार विश्व फाऊंडेशनच्या गीता हिंगे यांनी युवकांसाठी समुपदेशनाची व्यवस्था सुचवली. शिवछत्रपती पुरस्कारप्राप्त राजेश नायडू यांनी हा पुरस्कार पुन्हा सुरू करण्याची मागणी केली. क्रीडा संघटक पियुष आंबुलकर यांनी स्पर्धा आयोजनासाठी वाढीव निधी आणि प्रशिक्षक-खेळाडूंसाठी अधिक मानधनाची सूचना मांडली. माणिकराव कोकाटे यांनी या सर्व सूचनांचे स्वागत करत, त्या राज्याच्या क्रीडा धोरणात समाविष्ट करण्याचे आश्वासन दिले.
आंतरराष्ट्रीय दिव्यांग क्रिकेटपटू गुरुदास राऊत यांनी दिव्यांगांसाठी स्वतंत्र क्रीडा संकुल आणि शासकीय नोकऱ्यांमध्ये प्राधान्याची मागणी केली. माणिकराव कोकाटे यांनी याला सकारात्मक प्रतिसाद देत, लवकरच शासन निर्णय घेण्याचे सांगितले. क्रीडा विभागातील रिक्त जागांसाठी बिंदुनामावली प्रक्रिया पूर्ण होताच सुमारे एक हजार पदे भरण्याची प्रक्रिया सुरू होईल, अशी माहितीही त्यांनी दिली. उद्योग क्षेत्राकडून सीएसआर निधी मिळवण्याचे प्रयत्न सुरू असल्याचे त्यांनी स्पष्ट केले. नागपूरपासून सुरू झालेला हा संवाद आता राज्यभर पसरत, क्रीडा क्षेत्राला नव्या उंचीवर नेण्याचे स्वप्न साकार करणार आहे.
