भारताचे सरन्यायाधीश भूषण गवई यांच्यावर सुप्रीम कोर्टात झालेल्या बूट हल्ल्याने महाराष्ट्रातील राजकारण धडधडून ढवळून निघाले आहे. या घटनेचा तीव्र निषेध सर्वत्र नोंदवला जात आहे.
सोमवार, 6 ऑक्टोबर 2025 हा दिवस सर्वोच्च न्यायालयाच्या भव्य सभागृहात घडलेल्या एका धक्कादायक नाट्याने काहीसा वादग्रस्त ठरला. देशाच्या न्यायव्यवस्थेच्या मंदिरात, जिथे कायदा आणि न्याय यांचा पवित्र संगम होतो, तिथे एका वकिलाने सर्व मर्यादा ओलांडत थेट सरन्यायाधीश भूषण रामकृष्ण गवई यांच्यावर बूट फेकण्याचा निंदनीय प्रयत्न केला. राकेश किशोर नावाच्या या वकिलाने, सुनावणीच्या मध्येच आपला संयम गमावला आणि डेस्कपर्यंत धावत जाऊन बूट उचलला. हा प्रकार पाहून सभागृहात उपस्थित सर्वजण क्षणभर थिजले. पण, सरन्यायाधीश गवई यांनी अशा प्रतिकूल परिस्थितीतही आपली शांतता कायम ठेवली
उपस्थित वकिलांना युक्तिवाद पुढे चालू ठेवण्याचे सौम्य आवाहन केले. त्यांच्या या दृढनिश्चयाने उपस्थितांना त्यांच्या व्यक्तिमत्त्वाची एक वेगळीच झलक पाहायला मिळाली. सुरक्षा कर्मचाऱ्यांनी तातडीने कारवाई करत राकेश किशोरला ताब्यात घेतले आणि त्याला सभागृहातून बाहेर काढले. पण, हा प्रकार इथेच थांबला नाही. राकेशने आपल्या कृत्याबद्दल कोणतीही खंत नसल्याचे धक्कादायक विधान केले. ज्याने या प्रकरणाला आणखीच ताप दिला. या घटनेने राजकीय वातावरण चांगलेच तापले आहे. पंतप्रधान नरेंद्र मोदी, मुख्यमंत्री देवेंद्र फडणवीस आणि राष्ट्रवादी काँग्रेस शरदचंद्र पवार गटाचे नेते शरद पवार यांनी या हल्ल्याचा तीव्र शब्दांत निषेध केला.
Devendra Fadnavis : कर्जमाफीचा डंका तुमचाच, पण आम्हीही कमी नाही
विकृत मानसिकतेला जवाब
विशेषतः शरद पवार गटाने या घटनेच्या निषेधार्थ मंगळवारी, 7 ऑक्टोबर रोजी भंडारा जिल्ह्यात माजी आमदार चरण वाघमारे यांच्या नेतृत्वाखाली तीव्र आंदोलन छेडले. यावेळी वन्यायव्यवस्थेचा सन्मान राखा आणि हल्लेखोरांना कठोर शिक्षा द्या’ अशा घोषणा आकाशाला भिडल्या. या हल्ल्याने केवळ भूषण गवई यांच्या व्यक्तिगत सुरक्षेवरच प्रश्नचिन्ह उपस्थित केले नाही, तर देशाच्या लोकशाहीच्या पायावरच घाव घालण्याचा प्रयत्न झाला, असे चरण वाघमारे यांनी आंदोलनादरम्यान सांगितले. ते म्हणाले, सर्वोच्च न्यायालय हे केवळ एक इमारत नाही, तर ते भारतीय संविधानाचे आणि लोकशाहीचे रक्षक आहे.
अशा पवित्र व्यासपीठावर हल्ला करणे म्हणजे देशाच्या आत्म्यावर हल्ला करणे होय. हा प्रकार अत्यंत निंदनीय आहे. यामागील विकृत मानसिकतेला थांबवण्यासाठी जनजागृतीची गरज आहे. वाघमारे यांनी सत्ताधारी पक्षावरही निशाणा साधला. ते पुढे म्हणाले, सत्ताधारी पक्ष या घटनेबाबत गंभीर नसल्याचे दिसते. यामुळे लोकशाहीची गुणवत्ता घसरण्याची भीती आहे. आम्ही या हल्ल्याचा तीव्र निषेध करतो आणि संबंधितांवर कठोर कारवाईची मागणी करतो. या आंदोलनात राष्ट्रवादीच्या कार्यकर्त्यांनी मोठ्या संख्येने सहभाग घेतला. न्यायाधीशांचा अपमान खपवून घेणार नाही, अशा घोषणांनी परिसर दणाणून सोडला. या घटनेने देशभरातून संतापाची लाट उसळली आहे.
सामान्य नागरिकांपासून ते राजकीय नेत्यांपर्यंत सर्वांनीच या हल्ल्याचा निषेध केला आहे. काहींनी तर या प्रकरणाला लोकशाहीवरील हल्ला असे संबोधले आहे. राकेश किशोरच्या या कृत्यामुळे केवळ त्याच्याच नव्हे, तर संपूर्ण वकिली व्यवसायाच्या प्रतिष्ठेवरही प्रश्नचिन्ह उपस्थित झाले आहे.
