बॉस हा नेहमी दादागिरी करतो. टीम लिडर हा खऱ्या अर्थाने आपल्या सहकाऱ्यांसह खांद्याला खांदा लावून काम करतो. पण आयपीएस रामनाथ पोकळे सध्या वेगळ्या कारणाने चर्चेत आहेत.
वरिष्ठ आयपीएस अधिकारी रामनाथ पोकळे यांची सध्या अमरावती परीक्षेत्रात चांगलीच चर्चा आहे. पोकळे हे या परीक्षेत्राचे पोलिस महानिरीक्षक आहेत. अनेक महत्वाच्या पदांवर त्यांनी काम केलं आहे. फेब्रुवारी 2024 मध्ये त्यांनी अमरावती परीक्षेत्राचे महानिरीक्षक म्हणून सूत्र स्वीकारली. तेव्हापासून पोकळे आपल्या वागण्याच्या ‘स्पेशालिटी’मुळं परीक्षेत्रातील सर्वच पोलिस अधिकाऱ्यांमध्ये चर्चेचा विषय आहेत. एक आयजी असं कसं वागू शकतो असा प्रश्न अनेक अधिकाऱ्यांना पडला आहे.
अमरावतीला येण्यापूर्वी रामनाथ पोकळे हे पुण्यात कार्यरत होते. पुण्याच्या गुन्हे शाखेचे ते अतिरिक्त पोलिस आयुक्त होते. अजितदादांच्या गावातील ‘क्राइम कंट्रोल’ची जबाबदारी पोकळे यांच्या खांद्यावर होती. जानेवारी 2024 मध्ये पुण्यात कुख्यात गुंड शरद मोहोळच्या खुनाची घटना आठवतेय? तेव्हा पोकळे पुण्याच्या ‘क्राइम ब्रान्च’चे अतिरिक्त आयुक्त होते. पुण्यात काम करण्याचा हा त्यांचा पहिलाच अनुभव नव्हता. 2017 मध्ये पोकळे पुणे येथे राज्य गुन्हे अन्वेषण विभागात मध्ये कार्यरत होते.
सायबर सेलच्या अधीक्षक पदावरही त्यांनी काम केलं. त्यामुळं कोणता ‘व्हायरस’ कुठे शिरला की, पूर्ण ‘सिस्टिम करप्ट’ करतो, याचा पूर्ण अनुभव अन् अभ्यास पोकळे यांनी आपल्या सेवा काळात घेतला होता. पोलिस दलात आल्यानंतर प्रशिक्षणार्थी कार्यकाळ पूर्ण केलेल्या पोकळे यांना भिवंडी येथे नियुक्त करण्यात आलं. खाकीचा काय असतो दम, हे पोकळे यांनी भिवंडीत दाखवून दिलं. तेलातील भेसळ करणाऱ्यांवर मकोका लावणारे पोकळेच होते. भोकरदनमध्येही उपअधीक्षक म्हणून त्यांनी उल्लेखनीय कामगिरी केली.
IPS Ravinder Singal : वाहतुकीचा खेळखंडोबा संपवणार नागपूरचे सिंघम
जालन्यात एसपी
जालना येथे ज्योतिप्रिया सिंह यांच्या जागेवर पोलिस अधीक्षक (Suprentendent of Police) म्हणून रामनाथ पोकळे यांना पाठविण्यात आलं. मात्र 2017 मध्ये नियुक्त झालेल्या पोकळे यांना जुलै 2018 मध्ये पुण्यात एसआयडीमध्ये नियुक्तीची ऑर्डर मिळाली. मे 2019 मध्ये ते पिंपरी चिंचवडमध्ये अपर पोलिस आयुक्त म्हणून आलेत. ऑगस्ट 2021 मध्ये पोकळे यांना पिंपरी चिंचवडमधून ‘ठाणेदार’ करण्यात आलं. ठाण्यात त्यांच्याकडे पश्चिम विभागाच्या अपर आयुक्ताची धुरा होती.
मुंबई-पुणे-मुंबई असा प्रवास करीत ऑक्टोबर 2021 मध्ये पोकळे पुण्यात पुन्हा दादांच्या गावात आलेत. यावेळी त्यांना ‘गुन्हे थांबवा मोहिम’ सोपविण्यात आली. पोकळे यांच्या बदलीचा हा प्रवास खूपच ‘फास्ट’ राहिला. आपल्या संपूर्ण सेवाकाळात ते कधीही कोणत्याही वादात किंवा चर्चेत आले नाहीत. पण आता ते चर्चेत आहेत. होय, संपूर्ण अमरावती परीक्षेत्रातील अधिकाऱ्यांमध्ये त्यांच्या नावाची चर्चाच चर्चा आहे.
पोलिस दलात एखादा अधिकारी परीक्षेत्राचा आयजी असेल तर त्याची एसपींवर दादागिरी असते. अनेकांचे वेगवेगळ्या जिल्ह्यातील एसपींशी काही ना काही मतभेद असतात, असा आजवरचा इतिहास राहिला आहे. एखाद्या एसपीच्या ‘करीअर’चा ‘बॅन्ड’ वाजवायचा असेल तर आयजी काहीही करू शकतात. स्पेशल पथक नेमून वेगवेगळ्या जिल्ह्यांमध्ये छापेमारी करता येते. एसपींना ‘शो कॉज नोटीस’ देता येते. हे का केले, ते का नाही केलं असं सतत फोन करून विचारता येतं. इतकंच काय तर प्रत्येक डीवायएसपी, पोलिस निरीक्षक, सहाय्यक पोलिस निरीक्षक, पोलिस उपनिरीक्षकांसारखे काही अधिकारी आयजी वेगवेगळ्या जिल्ह्यांमध्ये ‘खास इन्फॉर्मर’ म्हणून पेरून ठेऊ शकतो. पण रामनाथ पोकळे यापेक्षाही वेगळे निघाले आहेत.
साहेब, कसं जमतं हो?
मुळात आहे असं की, वर नमूद केलेल्या प्रकारांपैकी एकाही अनुचित प्रकाराला अमरावतीत आयजी म्हणून आल्यापासून रामनाथ पोकळे यांनी खतपाणी घातलेलं नाही. अमरावती परीक्षेत्रात पाच जिल्ह्यांचा समावेश आहे. अमरावती ग्रामीण, अकोला, यवतमाळ, वाशीम आणि बुलढाणा हे ते पाच जिल्हे. खामगाव येथेही अतिरिक्त पोलिस अधीक्षक आहेत. या पाचही जिल्ह्यात अगदी पीएसआय पासून वरिष्ठ पातळीवर अनेकांशी जेव्हा ‘द लोकहित लाइव्ह’ने संवाद साधला, तेव्हा ‘खाकी’तील माणूस आणि माणुसकी जपणारा चेहरा म्हणून रामनाथ पोकळे यांचं नाव पुढं आलं.
अमरावती परीक्षेत्रात आल्यापासून आजपर्यंत पोकळे यांनी आजपर्यंत एकाही अधिकाऱ्याला दमदाटी केलेली नाही. नोटीसेसही बजावलेल्या नाहीत. आपल्या परीक्षेत्रातील सर्व पोलिस अधीक्षकांना त्यांनी ‘फ्री हॅन्ड’ देऊन ठेवला आहे. परीक्षेत्रातील टीमचे आपण लिडर आहोत. बॉस नाही, हे कदाचित पोकळे यांनी ठरवलेलं दिसत आहे. त्यामुळे अमरावती परीक्षेत्रातील टीम प्रचंड ताकदीनं काम करताना दिसत आहे. परीक्षेत्रातील सर्व पोलिस अधीक्षकांना आणि इतर अधिकाऱ्यांना रामनाथ पोकळे हे हवेहवेसे वाटणारे ‘सिनीअर ऑफिसर’ ठरत आहेत.
IPS Rashmita Rao : महिला संरक्षणार्थ महाकालीच्या दशभुजा सक्रिय
अस्सल रावडी
रूपेरी पडद्यावर मध्यंतरीच्या काळात अक्षय कुमारचा एक चित्रपट चांगलाच गाजला. साऊथच्या पिक्चरची ती कॉपी होती. रावडी राठोड हे त्या चित्रपटाचं नाव. या चित्रपटात अक्षय कुमार याने विक्रम राठोड या पोलिसाची भूमिका केली होती. चित्रपटातील पोलिस ग्राऊंडवरचा एक डॉयलॉग खूपच गाजला. त्यात राठोड आपल्या सिनीअरला एक वचन देतो. तसंच वचन पोकळे यांनी दिलेल्या ‘फ्री हॅन्ड’मुळे त्यांच्या हाताखाली असलेल्या एसपींना त्यांना दिलेलं दिसत आहे.पाचही जिल्ह्यातील एसपी, अॅडीशनल एसपी, डीवायएसपी, पीआय आदी मन लाऊन काम करीत आहेत. त्याच रावडी राठोड या चित्रपटातील डॉयलॉग रामनाथ पोकळे यांच्यासाठी येथे अगदी फिट बसतो. या डॉयलॉगचा अर्थ असा की, ‘कम समय में कई ट्रान्सफ्रर और प्रमोशन. पर नो कॉम्प्रमाइज. वर्दी पर कोई दाग नही.’ अशीच काहीशी उल्लेखनीय अन् सकारात्मक कारकीर्द रामनाथ पोकळे यांची सुरू आहे. आज एसपी आणि उद्याच्या आयजी होणाऱ्या सर्व आयपीएस अधिकाऱ्यांसाठी कदाचित पोकळे यांची कार्यपद्धत अवलंबण्यासारखी ठरावी.
