‘व्यक्ती शांत होना चाहिए. उसका काम बोलना चाहिए’ अशी एक म्हण आहे. मात्र नागपूर शहर पोलिस दलातील एका डीसीपीबाबत ही म्हण पूर्णपणे उलट ठरत आहे.
खांद्यावर स्टार आणि अंगावर वर्दी मिळाली की काही जण विनाकारणच स्वत:ला बाजीराव सिंघम समजायला लागतात. आपण किती काम करतोय हे दाखविण्याचा सतत त्यांचा प्रयत्न असतो. काम चिंधीभर करायचे, पण प्रसिद्धी मात्र प्रचंड मिळवायची असा त्यांचा आटापिटा सुरू असतो. नागपूर पोलिस दलातील एका उपायुक्ताचा असाच आटापिटा सध्या सुरू आहे. आपण किती काम करतो आहे, कसे रक्ताचे पाणी करतो आहे, हे हा अधिकारी स्वत:च प्रसार माध्यमांना ओरडून ओरडून सांगत आहे. स्वत:चेच फोटो टाकायचे आणि तेच ते काम दाखवायचे असा या अधिकाऱ्याचा नित्यक्रम सुरू आहे. त्यामुळे वरिष्ठ पोलिस अधिकाऱ्यांमध्ये या अधिकाऱ्याचेही हसू आता होत आहे.
IPS S Rushikesh Reddy : एआयच्या तीक्ष्ण नजरेने बंदोबस्ताला धार
काही महिन्यांपूर्वी हे साहेब नागपूर पोलिस दलात बदलून आलेत. एका सत्ताधारी आमदाराशी खटकवून घेतले म्हणून त्यांना ‘देवा’ने समुद्रकिनाऱ्याकडे पाठविले होते. बदली झाल्यानंतर हे साहेब प्रसार माध्यमातील एका व्यक्तीसमोर अक्षरश: रडले होते. याची खमंग चर्चा पोलिस दलात रंगली होती. त्यानंतर या साहेबांना एक जादुई आकडा सापडला. 78 हा तो आकडा. या आकड्यावर ज्यांनी जुगार खेळला आणि त्याच खटकलेल्या आमदाराने त्यांना नागपुरात आणले. नागपुरात आल्या आल्या आपल्याला सगळ्या कामांसाठी ‘ग्रीन सिग्नल’ मिळावा, अशी त्यांची इच्छा होती. परंतु खुर्ची खाली नसल्याने काही दिवस डीसीपी साहेब काही दिवस थांबले.
संधी साधलीच
ज्या ठिकाणी जाण्यासाठी डीसीपी साहेब नागपुरात आले होते, ती खुर्ची खाली होताच त्यांनी टणकन उडी मारली. तेव्हापासून दररोज साहेबांची चमकोगिरी सुरू आहे. आपण पोलिस आयुक्त, सहपोलिस आयुक्त यांच्यापेक्षाही कित्येक तास फिल्डवर असतो असे जणू प्रसार माध्यमांना दाखविण्याचा ते प्रयत्न करीत असतात. स्वत:च सर्वाधिक फोटो साहेब स्वत:च व्हायरल करीत असतात. सुरूवातीला खूप काही तरी काम केले असं त्यांनी दाखविलं. मात्र आता त्यांचा विभागच ‘जॅम’मध्ये अडकला आहे. नागपुरातील बाकी डीसीपी भंगार आणि हे साहेबच अंगार असं भासविण्याचा प्रयत्न त्यांच्याकडून सुरू आहे.
आता मोठ्या शहरात आल्यानंतर सहाजिकतच अतिरिक्त पोलिस आयुक्त, सहपोलिस आयुक्त, पोलिस आयुक्त असा ‘प्रोटोकॉल३ त्यांना ‘फॉलो’ करावा लागतो. त्यामुळे हे साहेब सध्या जिल्हा मिळविण्यासाठी जान पटकत आहेत. नागपूर ग्रामीणवर आधी त्यांचा डोळा होता. परंतु हर्ष पोद्दार यांच्या खुर्चीला ते धक्का लावू शकले नाहीत. त्यामुळे आसपासचा एखादा जिल्हा मिळावा, म्हणून त्यांनी आता जोरदार प्रयत्न सुरू केले आहे. त्यामुळे प्रसिद्धीच्या नादाला लागलेल्या या डीसीपी साहेबांनी खऱ्या सिंघम चित्रपटातील काही संवाद आठवले पाहिजे.
IPS Rashmita Rao : महिला संरक्षणार्थ महाकालीच्या दशभुजा सक्रिय
दिखावा टाळावा
सिंघम मध्ये एक बाबा असतो. तो त्याला एक सल्ला देतो. ‘अपने मस्तक पर दस्तक दे. सही गलत का ज्ञान ले.’ असेच ज्ञान या डीसीपी साहेबांनी घेतले पाहिजे. मन लावून खऱ्या अर्थाने काम केले पाहिजे. नागपूर शहर पोलिस दलात अनेक डीसीपी, एसीपी आहेत. डीआयजी, आयजी दर्जाचे अधिकारी आहेत. स्वत: पोलिस आयुक्त रवींद्र सिंगल हे फिल्डवर असतात. पण ते स्वत:च स्वत:चे फोटो टाकत बसत नाहीत. प्रसार माध्यमांना लक्ष ठेवण्यासाठी त्यांची मर्जी सांभाळत बसत नाहीत.
IPS Bachchan Singh : कागद करणार काळे अन् बंद होणार फालतू चाळे
अधिकारी असो की नेता जो व्यक्ती खऱ्या अर्थाने काम करतो, त्याला जनता आणि प्रसार माध्यमं आपोआपच डोक्यावर घेते. त्यांना स्वत:हून प्रसिद्धीच्या मागे धावण्याची गरज पडत नाही. नागपूर शहरातील सगळेच डीसीपी आपापल्या पद्धतीने अत्यंत कर्तबगारपणे काम करीत आहेत. सर्व अतिरिक्त पोलिस आयुक्त लोकांचे म्हणणे ऐकून घेतात. आपल्या हाताखालच्या टीमला मोठं करतात. त्यांना त्यांनी केलेल्या कामांचं क्रेडिट देतात. सहपोलिस आयुक्त नवीनचंद्र रेड्डी आणि पोलिस आयुक्त डॉ. रवींद्र सिंगल एका सेकंदात लोकांच्या एसएमएसला उत्तर देतात. त्यामुळे त्यांना ‘चीप पब्लिसिटी’च्या मागं पळावं लागत नाही. ‘मस्तक वर दस्तक’ देत असंच ज्ञान या डीसीपी साहेबांनी घेणं गरजेचं आहे.
राहु की शनी, युवर चॉइस
ज्योतिष्यशास्त्रात दोन ग्रहांना खूप महत्व आहे एक राहु आणि दुसरा शनी. राहु हा ‘चीप पब्लिसिटी’ देणारा ग्रह आहे. एका रात्रीतून तो एखाद्या महिलेला राणू मंडल करतो. मग त्या राणू मंडलला अहंकार चढतो. त्यानंतर दुसऱ्याच दिवशी राहू तिला जमिनीवर आदळतो. प्रसिद्धीच्या मागे लागलेल्या राणू मंडलचं बंडल पब्लिक आणि प्रसार माधमं गायब करून टाकतात. आता बघा दुसऱ्या ग्रह शनीचं. ज्योतिष्यात शनी हा अत्यंत मेहनत करायला लावणारा ग्रह आहे. शनी ग्रह प्रभावित व्यक्ती अत्यंत प्रामाणिकपणे काम करत राहतो.
Akola Police : अर्चित चांडक यांच्यामुळे ताज्या झाल्या चार दशक जुन्या स्मृती
यश आणि प्रसिद्धी आपोआप अशा व्यक्तीमागे पळत येते. जसं राणू मंडलचं उदाहरण राहुच्या बाबतीत दिलं, तसं अमिताभ बच्चन यांचं उदाहरण शनीच्या कर्तव्यदक्षतेबाबत देता येईल. तर डीसीपी साहेब आता तुम्हीच ठरवा काय बनायचेय? राणू मंडल की बिग बी अमिताभ बच्चन. इतकं सगळं झाल्यावरही कळलं नसेल तर थ्री इडियटमधला तो डायलॉग आठवा ‘काबील बनो. कामयाबी तुम्हारे पीछे झक मार कर आएगी.’
