प्रहार जनशक्ती पार्टीचे प्रमुख बच्चू कडू यांना हायकोर्टाने फटकारले. नागरिकांना वेठीस धरल्याबाबतचे हे प्रकरण आहे.
मंत्रालयापासून शेकडो किलोमीटर दूर असलेल्या नागपूर शहरात बच्चू कडू यांनी आंदोलन केले. शेतकऱ्यांन कर्जमाफी मिळावी म्हणून त्यांनी मुंबई सोडून नागपूरची निवड केली. मंत्रालयात मुंबईत पण आंदोलन नागपुरात अशी स्थिती होती. सरकारने बोलावल्यानंतर बच्चू कडू यांना नागपूर सोडून मुंबईतच जावे लागले. त्यामुळे कडू यांचे आंदोलन केवळ चमकोगिरी होते, अशी टीका झाली. आता यावर मुंबई उच्च न्यायालयाच्या नागपूर खंडपीठाने देखील नाराजी व्यक्त केली आहे.
बच्चू कडू यांच्या आंदोलनामुळे नागरिकांना प्रचंड गैरसोयीचा सामना करावा लागला. न्यायालय शेतकरी विरोधी नाही. मात्र अराजकता खपवून घेतली जाणार नाही, असे कोर्टाने स्पष्ट केले. विशेष म्हणजे शेतकरी नेते म्हणवून घेणारे बच्चू कडू हे जामठापासून जवळच असलेल्या आलीशान हॉटेलमध्ये मुक्कामी असल्याचीही टीका झाली. शेतकरी आंदोलनानंतर बच्चू कडू यांच्या न्यायालयाच्या भूमिकेवर प्रतिक्रिया व्यक्त करण्याबाबतच्या याचिकेवर सुनावणी झाली. त्यावेळी न्यायालयाने बच्चू कडू यांनी चांगलेच फटकारले.
चुकीचा संदेश
न्यायालयाने सांगितले की, कडू यांचे वक्तव्य समाजात चुकीचा संदेश पोहोचविले. बच्चू कडू म्हणाले की, शेतकरी एक दिवस रस्त्यावर उतरले तर त्यांना अटक केली जाते. शेतकरी आत्महत्या करतो, तेव्हा कोणी आवाज उठवत नाही. त्यावर न्यायालाने नाराजी व्यक्त केली. कोर्टाने स्पष्ट केले की शेतकऱ्यांबाबत न्यायालयाने वेळीवेळी अनेक निर्णय घेतले आहेत. त्यामुळे न्यायपालिका शेतकरी विरोधी आहे, असे अजिबातच नाही.
कोणतेही आंदोलन करताना सामान्य जनतेला त्रास होणार नाही, याची जाणीव ठेवावी, असे कोर्टाने स्पष्ट केले. वाहतूक व्यवस्थेत बाधा निर्माण झाल्याने सामान्य जनतेला समस्येचा सामना करावा लागला. सेलूपासून अनेक रुग्णवाहिका रस्त्यात अडकून पडल्या होत्या. कोर्टाने सरकारला सल्ला दिला की, भविष्यात याकडे लक्ष द्यावे. त्यानंतर कोर्टाने बच्चू कडू यांना सल्ला दिला की, न्यायपालिकेबद्दल बोलताना संयम ठेवावा. सरकार विरोधात आंदोलन करण्याचा अधिकारी सर्वांना आहे. परंतु हे करताना जनहित धान्यात घ्यावे.
आंदोलनकर्त्यांनी नागपूर-वर्धा आणि जबलपूर-हैदराबाद महामार्गासह इतर चार महामार्ग रोखून धरले होते. परिणामी 15 तासांहून अधिक काळ अनेक वाहने महामार्गावर अडकून पडली होती. शेतकऱ्यांच्या कर्जमाफीसाठी सुरू केलेल्या बच्चू कडूंच्या आंदोलनाने सामान्य जनतेची प्रचंड कोंडी झाली. त्यानंतर बोलताना बच्चू कडू यांनी न्यायपालिकेबद्दल प्रतिक्रिया व्यक्त केली होती. त्यामुळे न्यायालय नाराज झाले. त्यामुळे कोर्टाने बच्चू कडू यांना फटकारले. शेतकरी महत्वाचा आहेच. मात्र सामान्यांना नागपुरात वेठीस धरून कडू यांनी काय मिळविले हा प्रश्न यामुळे उपस्थित झाला आहे.
