मनोज जरांगे पाटील यांच्या नेतृत्वाखाली मराठा आरक्षणासाठी सुरू असलेले आंदोलनाने मुंबईची वाहतूक व्यवस्था कोलमडली. ज्यावर उच्च न्यायालयाने आंदोलकांना खडसावले.
मुंबईच्या रस्त्यांवर मराठा आंदोलनाचा धुरळा उडाला आहे. मराठा आरक्षणासाठी लढणारे नेते मनोज जरांगे पाटील यांनी गेल्या चार दिवसांपासून आझाद मैदानात बेमुदत उपोषणाला सुरुवात केली आहे. त्यांच्या समर्थनार्थ राज्याच्या कानाकोपऱ्यातून मराठा बांधव मुंबईत दाखल झाले आहेत. पण या लाखोंच्या गर्दीमुळे मुंबईची वाहतूक व्यवस्था पुरती कोलमडली आहे. रस्ते, फुटपाथ, रेल्वे आणि बस स्थानकं येथे मराठा आंदोलकांचा तळ ठोकला गेला आहे. दक्षिण मुंबईत तर आंदोलकांची भटकंती आणि गर्दीमुळे मुंबईकर हैराण झाले आहेत. यामुळे संतप्त मुंबईकरांनी उच्च न्यायालयात धाव घेत याचिका दाखल केली आहे.
उच्च न्यायालयाने या प्रकरणी तीव्र नाराजी व्यक्त केली. आंदोलनाचा अधिकार आहे, पण मुंबई ठप्प करून मुंबईकरांचे हाल का? असा सवाल करत न्यायालयाने आंदोलकांना मंगळवारी दुपारपर्यंत रस्ते, फुटपाथ आणि सार्वजनिक ठिकाणे मोकळी करण्याचे आदेश दिले. यानंतर आंदोलकांनी आझाद मैदान सोडून खारघरचा रस्ता धरला, कारण प्रशासनाने तिथे आंदोलनाला परवानगी दिली आहे. पण या सगळ्या घडामोडींमध्ये महाराष्ट्र नवनिर्माण सेना (मनसे) मराठा आंदोलकांच्या पाठिशी ठामपणे उभी राहिली आहे.
Prashant Padole : पंचायत निवडणुकीसाठी खासदाराने रचला रणनीतीचा गड
आंदोलनावर न्यायालयाचा आदेश
मनसेचा सूर आहे, मुंबईकर रोज अमराठी लोकांची गर्दी सहन करतात, मग मराठी माणसाचा त्रास का नाही सहन करणार? हा अभिमान आहे. मनसेचे नेते अविनाश जाधव यांनी या प्रकरणी आक्रमक पवित्रा घेतला आहे. मुंबईकर रोज अमराठी लोकांच्या गर्दीला कंटाळलेत. आता आपले मराठी बांधव आपल्या हक्कासाठी रस्त्यावर उतरले आहेत, तर त्यात वावगे काय? थोडासा त्रास झाला तरी तो अभिमानाने सहन करू, असे त्यांनी ठणकावले. त्यांनी पुढे म्हटले, आमचे नेते राज ठाकरे नेहमीच सांगतात, मुंबई ही मराठी माणसाच्या बापाची आहे. या विधानाने मनसेच्या कार्यकर्त्यांमध्ये जोश संचारला आहे.
मराठा आंदोलनाला पाठिंबा देण्याचा त्यांचा निर्धार अधिक दृढ झाला आहे. दरम्यान, राज ठाकरे यांनीही या आंदोलनावर परखड भाष्य केले आहे. मनोज जरांगे पुन्हा मुंबईत का आले? याचे उत्तर उपमुख्यमंत्री एकनाथ शिंदे देऊ शकतात, असे त्यांनी म्हटले आहे. मागच्या वेळी शिंदे यांनी नवी मुंबईत हा प्रश्न सोडवला होता, मग आता पुन्हा का हा गोंधळ? सगळी उत्तरे शिंदेंकडेच आहेत, असा सणसणीत टोला लगावत राज ठाकरे यांनी सरकारला कोंडीत पकडले आहे. या सगळ्या नाट्यात मुंबईकरांचा संयम आणि मराठा आंदोलनाचा जोश यांच्यातील टक्कर पाहण्यासारखी आहे. एकीकडे न्यायालयाचे आदेश, दुसरीकडे मनसेचा आक्रमक पाठिंबा आणि मराठा समाजाचा लढा मुंबई आता खऱ्या अर्थाने रणभूमी बनली आहे.
Parinay Fuke : गणरायाच्या आशीर्वादाने भाजपला मिळाले खरे ‘विघ्नहर्ता’
