नागपूरच्या बाजारगाव परिसरातील स्फोटांच्या मालिकेने कामगारांच्या सुरक्षेचा गंभीर प्रश्न उभा केला आहे. यावर तोडगा कधी काढला जाणारा असल्याचे प्रश्नचिन्ह आता उपस्थित होत आहे.
4 सप्टेंबर रोजी गणेशोत्सवाच्या जल्लोशात रंगलेल्या नागपूर शहराला रात्रीच्या गडद अंधारात एका भीषण स्फोटाने हादरवून सोडले. बाजारगावातील सोलार एक्सप्लोझिव्ह कंपनीत घडलेल्या या दुर्घटनेने पुन्हा एकदा कामगारांच्या सुरक्षेचा प्रश्न ऐरणीवर आणला आहे. ढोल-ताशांच्या गजरात आणि गणपती बाप्पाच्या जयघोषात रंगलेल्या शहरात हा स्फोट म्हणजे जणू काळोखात विजेचा कडकडाट होता. या घटनेने स्थानिकांना धक्का बसला असून, गेल्या काही वर्षांत वारंवार घडणाऱ्या अशा दुर्घटनांमुळे नागपूरच्या औद्योगिक क्षेत्रात भीतीचे सावट पसरले आहे. बाजारगाव परिसर हा एक्सप्लोझिव्ह कंपन्यांचा गड म्हणून ओळखला जातो.
सोलार एक्सप्लोझिव्ह, चामुंडी एक्सप्लोझिव्ह, एशियन फायर वर्क्स, इकॉनॉमिक्स एक्सप्लोझिव्ह यांसारख्या अनेक कंपन्या येथे कार्यरत आहेत. परंतु, या कंपन्यांमधील सततच्या स्फोटांमुळे कामगारांचे जीव धोक्यात आले आहेत. गेल्या दोन वर्षांत तब्बल 23 कामगारांचा बळी गेला असून, अनेकांना कायमचे अपंगत्व आले आहे. प्रत्येक स्फोटानंतर चौकशीचे ढोल वाजतात, पण ठोस उपाययोजनांचा अभाव असल्याने हा प्रश्न कायमच अनुत्तरित राहतो. माजी गृहमंत्री अनिल देशमुख यांनी या गंभीर समस्येकडे लक्ष वेधत मुख्यमंत्री देवेंद्र फडणविस यांना पत्र लिहून सर्व एक्सप्लोझिव्ह कंपन्यांचे सेफ्टी ऑडिट करण्याची मागणी केली आहे.
Ladki Bahin Yojana : जिल्हा परिषद कर्मचाऱ्यांवर कारवाईची टांगती तलवार
स्थानिकांमध्ये भीतीचे वातावरण
पत्राची प्रत केंद्रीय वाणिज्य व उद्योग मंत्री पियुष गोयल, पेट्रोलियम आणि स्फोटके सुरक्षा संघटना, संरक्षण संशोधन आणि विकास संघटनेतील अग्नि, स्फोटक आणि पर्यावरण सुरक्षा केंद्र, तसेच औद्योगिक सुरक्षा व आरोग्य संचालनालय यांनाही पाठवण्यात आली आहे. देशमुख यांनी रवी भवन येथील पत्रकार परिषदेत सांगितले की, या कंपन्यांमधील स्फोटांच्या मालिकेमुळे कामगारांचे आयुष्य धोक्यात आहे. सरकारने तातडीने तज्ञ समिती नेमून सेफ्टी ऑडिट करावे. बाजारगाव परिसरात सोलार एक्सप्लोझिव्ह इंडस्ट्रीज, चामुंडी एक्सप्लोझिव्ह, केलटेक एक्सप्लोझिव्ह, एशियन फायर वर्क्स यांसारख्या कंपन्यांमध्ये स्फोटांच्या घटना नित्याच्याच झाल्या आहेत.
12 ऑगस्ट 2023 रोजी इकॉनॉमिक्स एक्सप्लोझिव्ह कंपनीत झालेल्या स्फोटात दोन कामगारांचा मृत्यू झाला होता. 13 जून 2024 रोजी चामुंडा एक्सप्लोझिव्हमध्ये झालेल्या स्फोटाने नऊ जणांचा बळी घेतला. 6 फेब्रुवारी 2025 रोजी एशियन फायर वर्क्समध्ये दोन कामगारांचा अंत झाला. सोलार एक्सप्लोझिव्ह इंडस्ट्रीजमध्ये 17 डिसेंबर 2024 आणि 19 जून 2018 रोजी झालेल्या स्फोटांमुळेही कामगारांचा मृत्यू झाला होता. आता पुन्हा 4 सप्टेंबर 2025 रोजी याच कंपनीत झालेल्या स्फोटाने दोन कामगारांना काळाने गिळंकृत केले. या स्फोटांच्या मालिकेने स्थानिकांमध्ये भीतीचे वातावरण निर्माण झाले आहे. कामगारांच्या कुटुंबांचे हाल, त्यांचे अश्रू आणि हरवलेली स्वप्ने यांचा विचार करता सरकारने आता तातडीने पावले उचलण्याची गरज आहे
Akola Police : अर्चित चांडक यांच्यामुळे ताज्या झाल्या चार दशक जुन्या स्मृती
