नवी मुंबई आंतरराष्ट्रीय विमानतळाचे उद्घाटन हा महाराष्ट्रासाठी महत्त्वाचा क्षण ठरला आहे. पंतप्रधान नरेंद्र मोदी यांच्या हस्ते या प्रकल्पाच्या पहिल्या टप्प्याचे लोकार्पण होताच, मुख्यमंत्री देवेंद्र फडणवीस यांनी याला ‘स्वप्नपूर्तीचा दिवस’ असे संबोधले.
महाराष्ट्रात नवी मुंबई आंतरराष्ट्रीय विमानतळाच्या उद्घाटनाने एका दशकभराच्या प्रतीक्षेचा शेवट झाला आणि विकासाच्या नव्या पर्वाची सुरुवात झाली. कमळाच्या आकारात साकारलेल्या या विमानतळाचा पहिला टप्पा पंतप्रधान नरेंद्र मोदी यांच्या हस्ते लोकार्पित झाला. यामुळे मुंबईला दुसरे आंतरराष्ट्रीय विमानतळ मिळाले असून, शेतकरी नेते डी. बी. पाटील यांचे नाव या प्रकल्पाला देऊन त्यांच्या योगदानाचा गौरव करण्यात आला आहे. या विमानतळाच्या माध्यमातून महाराष्ट्राच्या प्रगतीचा नवा अध्याय लिहिला जाणार आहे.
मुख्यमंत्री देवेंद्र फडणवीस यांनी या क्षणाला स्वप्नपूर्तीचा दिवस संबोधले. त्यांनी पंतप्रधान मोदींच्या नेतृत्वाचे कौतुक केले. गेल्या दशकात अनेक अडथळ्यांनी खीळ घातलेला हा प्रकल्प मोदींच्या दृढनिश्चयाने आणि प्रगती उपक्रमाच्या प्रभावी अंमलबजावणीने साकार झाला. एका बैठकीत आठ एनओसी मिळवून, दशकभरातील अडथळे दूर करणाऱ्या या नेतृत्वाने नव्या भारताचे प्रतीक असलेले हे विमानतळ उभे केले आहे.
Pankaj Bhoyar : शिक्षण क्षेत्रातील रिक्तता संपविण्याचा संकल्प
विकासाची साखळी
नवी मुंबई आंतरराष्ट्रीय विमानतळ हे केवळ एक विमानतळ नाही. तर अभियांत्रिकीचा एक चमत्कार आहे. अनेक अडथळ्यांना मागे टाकून साकारलेल्या या प्रकल्पाचा पहिला टर्मिनल आणि धावपट्टी दरवर्षी दोन कोटी प्रवाशांना सामावून घेण्यास सज्ज आहे. डिसेंबरपासून येथून नियमित उड्डाणे सुरू होणार आहेत. हा प्रकल्प महाराष्ट्राच्या जीडीपीत एक टक्क्याने वाढ करण्याची क्षमता बाळगतो. फडणवीस यांनी सांगितल्याप्रमाणे, हे विमानतळ महाराष्ट्राच्या आर्थिक प्रगतीला नवी गती देईल. रोजगाराच्या संधींना बळकटी प्रदान करेल.
विमानतळासोबतच अटल सेतू आणि देशातील सर्वात मोठी 40 किलोमीटरची अंडरग्राउंड मेट्रो यांसारखे प्रकल्प मुंबईच्या कनेक्टिव्हिटीला नवे परिमाण देत आहेत. फडणवीस यांनी नमूद केल्याप्रमाणे, या प्रकल्पांना ग्रीन ट्रायब्युनल, उच्च न्यायालय आणि सर्वोच्च न्यायालय यांसारख्या अडथळ्यांचा सामना करावा लागला. परंतु, पंतप्रधान मोदी आणि केंद्र सरकारच्या पाठबळाने हे स्वप्न साकार झाले. विशेष म्हणजे, या विमानतळाला वॉटर टॅक्सीची सुविधा मिळणार आहे. हा भारतातील पहिलाच असा प्रकल्प ठरणार आहे.
या सोहळ्यात ‘मुंबई वन’ ॲप्लिकेशनचे लोकार्पण झाले. जे मुंबईच्या प्रवासाला अधिक सुगम बनवेल. एकाच तिकिटाद्वारे संपूर्ण शहराची कनेक्टिव्हिटी साधणारे हे ॲप प्रवाशांसाठी क्रांतिकारी ठरणार आहे. फडणवीस यांनी ठामपणे सांगितले की, पंतप्रधान मोदींच्या नेतृत्वाखाली महाराष्ट्र विकासाच्या शिखराकडे झेप घेत आहे. नवी मुंबई आंतरराष्ट्रीय विमानतळ, अटल सेतू आणि अंडरग्राउंड मेट्रो यांसारख्या प्रकल्पांनी महाराष्ट्राच्या प्रगतीला नवे बळ मिळाले आहे. जे नव्या भारताचे स्वप्नसौंदर्य साकारत आहे.
