महाराष्ट्राच्या राजकारणात सध्या अनेक मुद्दे ज्वालामुखीसारखे पेटत आहेत. अशातच पंतप्रधान नरेंद्र मोदी दोन दिवसांच्या नवी मुंबई दौऱ्यावर आले आहेत.
महाराष्ट्रात सध्या स्थानिक स्वराज्य संस्थांच्या निवडणुकींचा धुराळा उडाला आहे. या राजकीय रणधुमाळीत मराठा-ओबीसी आरक्षण, शेतकरी कर्जमाफी आणि महायुती सरकारच्या शेतकऱ्यांसाठीच्या पॅकेजसारखे प्रश्न ज्वालामुखीसारखे धगधगत आहेत. अशा वेळी पंतप्रधान नरेंद्र मोदी नवी मुंबईत दोन दिवसांच्या दौऱ्यावर आहेत. पण त्यांच्या भाषणातून पूरग्रस्त शेतकऱ्यांच्या व्यथांना स्पर्श झाला नाही. उलट, भव्य-दिव्य सोहळ्यात नवी मुंबई विमानतळाच्या उद्घाटनाची औपचारिकता पूर्ण करत त्यांनी आपली प्रसिद्धीची हौस भागवली, असा घणाघाती आरोप महाराष्ट्र प्रदेश काँग्रेस कमिटीचे अध्यक्ष हर्षवर्धन सपकाळ यांनी केला आहे. महाराष्ट्रातील शेतकरी अतिवृष्टी आणि पुराच्या तडाख्यात उद्ध्वस्त झाले असताना, पंतप्रधानांनी या संकटाकडे दुर्लक्ष केले. त्यांच्या भाषणात शेतकऱ्यांच्या मदतीचा उल्लेखही नव्हता.
पंतप्रधानांना जनतेच्या जगण्यापेक्षा निनिवडणूक आणि प्रसिद्धीची जास्त काळजी आहे, अशी टीका सपकाळ यांनी केली. नवी मुंबई विमानतळाच्या उद्घाटन सोहळ्यातही त्यांनी काँग्रेसवर टीकास्त्र सोडले, पण पूरग्रस्तांच्या मदतीबाबत चकार शब्द उच्चारला नाही. यासोबतच, विमानतळाला स्व. दि. बा. पाटील यांचे नाव देण्याची मागणीही त्यांनी धुडकावली, जणू स्वतःच्या नावाचा ठसा उमटवण्याचीच त्यांना घाई होती, असा टोला सपकाळ यांनी लगावला. हर्षवर्धन सपकाळ यांनी पंतप्रधानांच्या दहा वर्षांच्या कारभारावरही प्रश्नचिन्ह उपस्थित केले. वर्षाला दोन कोटी रोजगार, प्रत्येकाच्या खात्यात 15 लाख, शेतमालाला दीडपट हमीभाव, 100 स्मार्ट सिटी, ही आश्वासने कुठे गेली? असा सवाल त्यांनी उपस्थित केला.
Nitin Deshmukh : फडणवीसांनी महाराष्ट्राला लावली ‘जातीय तेढीची कीड’
ऑपरेशन सिंदुरचे रहस्य?
काँग्रेस सरकारने पाकिस्तानचे दोन तुकडे केले. मुंबई हल्ल्याच्या आरोपींना फाशी दिली, पण मोदी सरकारने पाकिस्तानच्या आयएसआयला पठाणकोट हल्ल्याच्या तपासासाठी देशात बोलावले. पुलवामा हल्ल्यात ३०० किलो आरडीएक्सचा वापर झाला, तरीही दोषींना पकडण्यात सरकार अपयशी ठरले. पहलगाम हल्ल्याची सर्वांनाच माहिती आहे. मग ऑपरेशन सिंदूर का थांबवले? याचे उत्तर पंतप्रधानांनी द्यावे, असे आव्हान सपकाळ यांनी दिले. पंतप्रधानांनी राष्ट्रीय सुरक्षेच्या मुद्द्याचा राजकीय फायद्यासाठी वापर करत पंतप्रधानपदाच्या शपथेचा भंग केला, असा गंभीर आरोपही त्यांनी केला. राष्ट्रीय सुरक्षेच्या मुद्द्यावर जबाबदारीने बोलणे आणि वागणे अपेक्षित आहे, पण मोदी बेजबाबदारपणे वागून देशाच्या सुरक्षेला खेळणं बनवतात, असे सपकाळ म्हणाले.
सपकाळ यांनी पंतप्रधानांच्या भेटीमागील राजकीय हेतूही उघड केले. दहा वर्षांपूर्वी बिहार निवडणुकीच्या तोंडावर इंदू मिलमधील डॉ. बाबासाहेब आंबेडकर स्मारकाचे भूमिपूजन झाले, पण ते काम अद्याप अपूर्ण आहे. 2017 मध्ये मुंबई महापालिका निवडणुकीच्या वेळी छत्रपती शिवाजी महाराज स्मारकाचे जलपूजन झाले, तेही अजून सुरू झालेले नाही. आता स्थानिक स्वराज्य संस्थांची निवडणूक तोंडावर असताना, अपूर्ण नवी मुंबई विमानतळाच्या उद्घाटनाची घाई का, असा सवाल त्यांनी उपस्थित केला. पंतप्रधानांचे सगळे उद्घाटन-भूमिपूजन हे निवडणुकीच्या तोंडावरच का होतात? असा खोचक टोमणा त्यांनी मारला. महाराष्ट्रातील शेतकऱ्यांच्या दुरवस्थेकडे पंतप्रधानांचे दुर्लक्ष आणि राजकीय लाभासाठी केलेली धडपड यावर सपकाळ यांनी सडेतोड टीका केली. महाराष्ट्राच्या जखमांवर मलम लावण्याऐवजी पंतप्रधानांनी स्वतःच्या प्रसिद्धीचा जागर केला, असे म्हणत त्यांनी जनतेच्या प्रश्नांना प्राधान्य देण्याची मागणी केली.
