राज्यातील मुसळधार पावसामुळे शेतकऱ्यांचे मोठे नुकसान झाले असताना सरकारने ओला दुष्काळ जाहीर न केल्याने राजकारण तापले आहे. या पार्श्वभूमीवर ॲड. प्रकाश आंबेडकर यांनी सरकारवर तीव्र टीका केली.
महाराष्ट्राच्या मातीत शेतकऱ्यांचे रक्त आणि घाम मिसळले आहे. पण त्यांच्या नशिबी उपायशून्यता आणि उपेक्षा आली आहे. अतिवृष्टीने शेतकऱ्यांचे स्वप्न पाण्यात वाहून गेले. तरीही सत्तेच्या गल्लीतून त्यांच्या हिताचा कोणताही निर्णय उमटत नाही. वंचित बहुजन आघाडीचे राष्ट्रीय अध्यक्ष ॲड. प्रकाश आंबेडकर यांनी सत्ताधारी सरकारवर जोरदार टीकास्त्र सोडले आहे. त्यांच्या शब्दांतून शेतकऱ्यांच्या वेदनेचा तीव्र आक्रोश आणि सरकारच्या निष्क्रियतेवर प्रहार दिसून येतो. हा आक्रोश केवळ शब्दांचा नाही, तर शेतकऱ्यांच्या हक्कांसाठीचा लढा आहे.
राज्यभरात पावसाने थैमान घातले आहे. शेतात पाणी साचून पिके नष्ट झाली. शेतकऱ्यांचे हात रिकामे राहिले. पण सत्ताधाऱ्यांना काही फरक पडत नाही. सरकारच्या धोरणांमुळे शेतकऱ्यांचे नुकसान भरून निघण्याची शक्यता धूसर झाली आहे. प्रकाश आंबेडकर यांनी या संदर्भात सरकारच्या हेतूंवरच बोट ठेवले आहे. त्यांच्या मते, सत्ताधारी आणि त्यांच्या हस्तकांचे आर्थिक हितसंबंध शेतकऱ्यांच्या हितापेक्षा मोठे ठरत आहेत. ही परिस्थिती बदलण्यासाठी त्यांनी जनतेला जागृत होण्याचे आवाहन केले आहे.
Chandrashekhar Bawankule : अतिवृष्टीच्या सावटात शेतकऱ्यांसाठी आशेचा किरण
सरकारची निष्क्रियता
महाराष्ट्रात यंदाच्या पावसाने शेतीला मोठा फटका बसला आहे. शेतात कमरेपर्यंत पाणी साचले. पिके उद्ध्वस्त झाली. शेतकऱ्यांचे आर्थिक गणित कोलमडले. अशा परिस्थितीत ओला दुष्काळ जाहीर करणे ही शेतकऱ्यांसाठी तातडीची गरज आहे. मात्र, सरकार याबाबत टाळाटाळ करत आहे. प्रकाश आंबेडकर यांनी यावर भाष्य करताना सत्ताधाऱ्यांचे खरे स्वरूप उघड केले आहे. त्यांच्या मते, ओला दुष्काळ जाहीर केल्यास शेतकऱ्यांना आर्थिक मदत द्यावी लागेल. यामुळे सत्ताधाऱ्यांचे आर्थिक गणित बिघडेल. निविदा प्रक्रियेतून मिळणारा लाभ कमी होऊ नये, यासाठीच सरकार शेतकऱ्यांच्या हिताकडे दुर्लक्ष करत आहे.
प्रकाश आंबेडकर यांनी केवळ टीका करून थांबले नाहीत, तर जनतेला जागृत होण्याचा संदेशही दिला आहे. त्यांनी मतदारांना आवाहन केले आहे की, जात आणि धर्माच्या पलीकडे जाऊन शेतकऱ्यांच्या हितासाठी मतदान करावे. शेतकऱ्यांच्या प्रश्नांकडे दुर्लक्ष करणाऱ्या पक्षांना मतपेटीतून धडा शिकवण्याची वेळ आली आहे, असे त्यांचे स्पष्ट मत आहे. आंबेडकरांचा हा लढा शेतकऱ्यांच्या हक्कांसाठी आणि सरकारच्या नाकर्तेपणाविरुद्ध आहे. त्यांच्या या आक्रमक भूमिकेने शेतकऱ्यांमध्ये नवीन आशेचा किरण निर्माण झाला आहे.
आंबेडकर यांचा हा आवाज केवळ टीकेचा नाही, तर भविष्यासाठी दिशादर्शक आहे. शेतकऱ्यांच्या हितासाठी आणि सरकारच्या चुकीच्या धोरणांविरुद्ध लढण्यासाठी त्यांनी पुढाकार घेतला आहे. ओला दुष्काळ जाहीर करणे ही केवळ औपचारिकता नाही, तर शेतकऱ्यांना आर्थिक आधार देण्याची हमी आहे. आंबेडकर यांनी यावर जोर देत सरकारला तातडीने कारवाई करण्याची मागणी केली आहे. त्यांच्या या लढ्याला जनतेचा पाठिंबा मिळाला, तर शेतकऱ्यांचे प्रश्न सुटण्यास मदत होईल.
