राज्यात राजकारण तापत असताना उपमुख्यमंत्री अजित पवारांनी शेतकऱ्यांच्या कर्जमाफीवरील केलेल्या वक्तव्यावर वंचित बहुजन आघाडीचे प्रमुख प्रकाश आंबेडकर यांनी केला पलटवार.
राज्यातील शेतकरी आर्थिक संकटात तडफडत असताना, उपमुख्यमंत्री अजित पवार यांच्या “सरकार किती दिवस शेतकऱ्यांचे कर्ज माफ करत राहणार?” या वक्तव्याने राजकीय वर्तुळात खळबळ उडाली आहे. या विधानावर वंचित बहुजन आघाडीचे अध्यक्ष अॅड. प्रकाश आंबेडकर यांनी जोरदार प्रतिक्रिया दिली आहे. आंबेडकर यांनी थेट प्रश्न उपस्थित करत विचारलं की, अजित पवारजी, तुम्हाला खरंच महाराष्ट्रातील शेतकऱ्यांनी आत्महत्या कराव्यात असं वाटतं का?
आंबेडकर म्हणाले, आज महाराष्ट्राचा शेतकरी दिवसेंदिवस कर्जाच्या दलदलीत खोल जात आहे. अवकाळी पाऊस, नापिकी आणि शेतमालाला मिळणारा अपुरा दर, या तिन्ही संकटांनी शेतकऱ्यांचा पिच्छा सोडलेला नाही. जो शेतकरी आपल्या घामाने देशाला अन्न देतो, त्याच्या आयुष्यावर मात्र उपासमारीचं सावट आहे. त्याच वेळी राज्यातील उपमुख्यमंत्री असं वक्तव्य करतात, ही शेतकऱ्यांचा अपमान करणारी बाब आहे, असे आंबेडकर म्हणाले.
Maharashtra : पाच नोव्हेंबरला मिनी मंत्रालयाची आचारसंहिता अवतरणार?
शेतकरी विरोधी धोरण
आंबेडकरांनी आकडेवारीसह सरकारवर निशाणा साधला. सोयाबीनसाठी सरकारने प्रति क्विंटल पाच हजार 328 एवढी किमान आधारभूत किंमत जाहीर केली. पण प्रत्यक्षात शेतकऱ्यांना फक्त 3 हजार 500 ते 4 हजार दर मिळतोय. म्हणजे जवळपास 30 टक्क्यांहून अधिक तोटा! कापसाची अवस्था तर त्याहून बिकट आहे. हे सरकारचं धोरण शेतकऱ्यांच्या विरोधात आहे, त्यांच्या मदतीसाठी नाही, अशी आंबेडकरांची तीव्र टीका.
अवकाळी पावसामुळे राज्यातील तब्बल 29 जिल्ह्यांमधील 68 लाख हेक्टरवरील पिकांचे मोठं नुकसान झाल्याचं सांगत त्यांनी संताप व्यक्त केला. सरकार मदतीच्या घोषणा करते, पण प्रत्यक्ष मदत मात्र शेतकऱ्यांच्या हाती पोहोचत नाही. शेतकऱ्यांनी दिवाळी अंधारात घालवली, त्यांच्या घरात ना प्रकाश, ना आशा. आणि सरकार मात्र निवेदनं आणि दौरे करण्यात व्यस्त आहे, असे त्यांनी म्हटले.
प्रकाश आंबेडकर पुढे म्हणाले, शेतकऱ्यांना दया नको, त्यांना न्याय हवा! त्यांना भिक नव्हे तर हक्क मिळायला हवेत. सरकारने जाहीर केलेल्या योजना फक्त कागदावर नव्हे, प्रत्यक्षात शेतकऱ्यांच्या शेतात उतरल्या पाहिजेत. अन्यथा महाराष्ट्रातला शेतकरी वर्ग कायमचा उद्ध्वस्त होईल. वंचित बहुजन आघाडीने अजित पवार यांच्या या वक्तव्याचा तीव्र निषेध नोंदवला असून, राज्य सरकारने तातडीने शेतकऱ्यांच्या समस्यांकडे गांभीर्याने पाहावे, आणि शेतकऱ्यांचा विश्वास परत मिळवावा, अशी मागणी प्रकाश आंबेडकर यांनी केली.
