महाराष्ट्र राज्याच्या अर्थसंकल्पीय अधिवेशनाचा समारोप जवळ आल्यानेही, विरोधी पक्ष नेत्याची नियुक्ती अद्याप झालेली नाही. काँग्रेसचे विधिमंडळ नेते विजय वडेट्टीवार यांनी या मुद्द्याचा उल्लेख अधिवेशनात केला.
सध्या महाराष्ट्राच्या राजकीय वर्तुळात अर्थसंकल्पीय अधिवेशन जोरदार चर्चेत आहे. तीन मार्चपासून सुरू झालेले हे अधिवेशन आता शेवटच्या टप्प्यात पोहोचले आहे. 24 मार्चपासून अंतिम आठवड्याला सुरुवात झाली आहे. 26 मार्चला हे अधिवेशन संपणार आहे. या दरम्यान अनेक महत्त्वाचे विषय गाजले असले तरी विरोधी पक्षनेतेपदाचा प्रश्न अद्याप अनुत्तरित राहिला आहे.
विधानसभेत विरोधी पक्षनेतेपदाचे स्थान रिक्त असल्याने यावर विविध राजकीय वर्तुळातून चर्चा होत आहे. काँग्रेसचे नेते विजय वडेट्टीवार यांनी हा मुद्दा विधानसभेत उपस्थित केला आहे. त्यांनी विधानसभेच्या अध्यक्षांना विरोधी पक्षनेत्याची नियुक्ती तातडीने करण्याची मागणी केली आहे.
Amol Mitkari : महापुरुषांचा फोटो पुण्यतिथीच्या दिवशी कचऱ्यात
विधानसभेतील चर्चा
विधानसभेच्या कामकाजात विरोधी पक्षनेता हा महत्त्वाचा घटक मानला जातो. विजय वडेट्टीवार यांनी याच मुद्द्यावर प्रकाश टाकत विधानसभेत भूमिका मांडली. ते म्हणाले की, ‘सत्ताधारी आणि विरोधक ही विकासाची दोन चाके आहेत. विरोधी पक्षनेते नसल्याने विधानसभेचे कामकाज एकतर्फी सुरू आहे.’ महाराष्ट्रात संख्याबळाच्या आधारावर विरोधी पक्षनेतेपद ठरवण्याची परंपरा नाही, त्यामुळे या परंपरेला सुरुंग लावू नये, असे ते म्हणाले. विधानसभा अध्यक्षांना हा निर्णय त्वरित घ्यावा, अशी मागणी त्यांनी केली.
विधानसभेचे अध्यक्ष यांनी यावर उत्तर देताना सांगितले की, ‘विधानसभेचे काम नियमानुसार चालेल आणि नियमाप्रमाणेच नियुक्त्या केल्या जातील. मात्र, अद्याप कोणत्याही निर्णयावर शिक्कामोर्तब करण्यात आलेले नाही.
विरोधकांची बैठक
महाविकास आघाडीतील शिवसेना (ठाकरे गट) यांनी विरोधी पक्षनेतेपदासाठी भास्कर जाधव यांच्या नावाची शिफारस विधानसभा अध्यक्षांकडे केली आहे. मात्र, अद्याप त्यावर कोणताही निर्णय झालेला नाही. त्यामुळे विरोधकांकडून हा मुद्दा अधिक तीव्र करण्यात आला आहे.
हिवाळी अधिवेशनानंतर महाविकास आघाडीतील नेत्यांच्या बैठकीत विरोधी पक्षनेतेपदावर चर्चा झाली. काँग्रेस आणि राष्ट्रवादी काँग्रेसच्या (शरद पवार गट) नेत्यांनीही ठाकरे गटाला या पदासाठी पाठिंबा दर्शवला आहे. मात्र, विधानसभेचे अध्यक्ष राहुल नार्वेकर यांच्याकडून अद्याप कोणताही निर्णय आलेला नाही.
मुद्दा अद्याप अनिर्णित
महाविकास आघाडीच्या नेत्यांनी या अधिवेशनाआधीच मातोश्री येथे बैठक घेतली होती. या बैठकीत उद्धव ठाकरे यांना विरोधी पक्षनेतेपदासाठी अंतिम निर्णय घेण्याचा अधिकार देण्यात आला होता. त्यानंतर भास्कर जाधव यांच्या नावाची अधिकृत शिफारस विधानसभा अध्यक्षांकडे पाठवण्यात आली. मात्र, हा मुद्दा अद्याप अनिर्णित राहिल्याने विरोधकांनी विधानसभा अध्यक्षांवर दबाव वाढवण्यास सुरुवात केली आहे.
गेल्या पंधरा दिवसांमध्ये दोन वेळा भास्कर जाधव आणि महाविकास आघाडीतील काही प्रमुख नेत्यांनी मुख्यमंत्री देवेंद्र फडणवीस तसेच विधानसभा अध्यक्ष राहुल नार्वेकर यांची भेट घेतली. त्यांनी या पदाविषयी निर्णय घेण्याची विनंती केली. मात्र, अधिवेशन संपण्याच्या उंबरठ्यावर असताना तरीही कोणताही ठोस निर्णय झालेला नाही.
पुढील दोन दिवसांत निर्णय घेण्यात आला नाही, तर सलग दोन अधिवेशने विरोधी पक्षनेतेविना पार पडल्याची नोंद होईल. त्यामुळे हा मुद्दा आता अधिक चर्चेत आला आहे. महाराष्ट्राच्या राजकीय समीकरणांमध्ये विरोधी पक्षनेतेपदाच्या विलंबाबाबत अनेक तर्कवितर्क लावले जात आहेत. हे अधिवेशन संपण्याआधी या विषयावर काही ठोस निर्णय होतो का, याकडे सर्वांचे लक्ष लागले आहे.
