महाराष्ट्राच्या आरोग्य क्षेत्रात क्रांतिकारी बदल घडवण्यासाठी झालेल्या उच्चस्तरीय बैठकीत महत्त्वपूर्ण निर्णय घेण्यात आले. मुख्यमंत्री देवेंद्र फडणवीस यांच्या नेतृत्वाखाली आरोग्य सेवा सशक्त करण्यासाठी ‘मिशन मोड’मध्ये योजना राबवली जाणार आहे.
सह्याद्री अतिथिगृहात नुकत्याच पार पडलेल्या महत्त्वपूर्ण बैठकीत महाराष्ट्राच्या आरोग्य यंत्रणेला नवसंजीवनी देणारे मोठे निर्णय घेण्यात आले. मुख्यमंत्री देवेंद्र फडणवीस यांच्या अध्यक्षतेखाली पार पडलेल्या या बैठकीत राज्यातील आरोग्य व्यवस्थेला अधिक सुसज्ज, व्यापक आणि कार्यक्षम बनविण्याच्या दृष्टीने एक व्यापक योजना तयार करण्याचे निर्देश देण्यात आले. ही योजना ‘मिशन मोड’ मध्ये एशियन डेव्हलपमेंट बँकेच्या सहकार्याने राबवण्यात येणार आहे, ज्याचा उद्देश राज्यातील नागरिकांना सर्वोत्तम आरोग्य सेवा प्रदान करणे हा आहे.
मुख्यमंत्री फडणवीस यांनी आरोग्य उपकेंद्रांपासून ते रेफरल रुग्णालयांपर्यंतच्या सर्व आरोग्य संस्थांना बळकट करण्यावर भर दिला. कर्करोगाच्या उपचारासाठी कीमोथेरपी आणि रेडिएशन थेरपी यासह एकात्मिक रेफरल सेवा विकसित करण्याचे आदेश देताना त्यांनी स्पष्ट केलं की या प्रक्रियेच्या अंमलबजावणीसाठी ठोस कार्यपद्धती आणि निश्चित कालमर्यादा असणे आवश्यक आहे. यासाठी वैद्यकीय शिक्षण विभाग आणि सार्वजनिक आरोग्य विभाग यांना संयुक्तरीत्या सविस्तर प्रकल्प अहवाल (DPR) तयार करण्यास सांगण्यात आले आहे. नवीन उपाययोजनांच्या माध्यमातून नागरिकांना दर्जेदार व वेगवान सेवा पुरविण्याची वचनबद्धता मुख्यमंत्री फडणवीस यांनी यावेळी व्यक्त केली.
Chandrashekhar Bawankule : नागपूरच्या गावगावांत दिसणार ‘खाकी‘
आरोग्य विस्तार
बैठकीत धाराशिवमध्ये नवीन रुग्णालय स्थापन करण्याचा प्रस्ताव सादर करण्यात आला. सरकारी वैद्यकीय महाविद्यालयांशी संलग्न रुग्णालयांवर वाढत्या लोकसंख्येचा आणि रुग्ण संख्येचा ताण लक्षात घेता स्वतंत्र रुग्णालयांची गरज अधोरेखित झाली आहे. या अनुषंगाने मुख्यमंत्री महोदयांनी नव्या रुग्णालयाची उभारणी लवकरात लवकर करण्याचे निर्देश दिले आहेत. पदव्युत्तर वैद्यकीय शिक्षण घेणाऱ्या विद्यार्थ्यांना ठराविक कालावधीसाठी सरकारी रुग्णालयांमध्ये सेवा देणे बंधनकारक करण्याच्या प्रस्तावावर विचार करण्याचे आदेशही त्यांनी दिले. या निर्णयामुळे ग्रामीण आणि दुर्गम भागातील आरोग्य सेवा सुधारणे अपेक्षित आहे.
बैठकीदरम्यान आरोग्य व्यवस्थापन माहिती प्रणाली (Health Management Information System), अवयव प्रत्यारोपण संस्थांची उभारणी, तसेच विविध जिल्ह्यांतील रुग्णालयांसाठी आवश्यक वैद्यकीय उपकरणांची खरेदी आणि निर्मिती यावरही सखोल चर्चा करण्यात आली. या निर्णायक बैठकीस आरोग्य मंत्री प्रकाश आबिटकर, एशियन डेव्हलपमेंट बँकेचे प्रतिनिधी, तसेच अनेक वरिष्ठ अधिकारी उपस्थित होते. या बैठकीत घेतलेले निर्णय राज्यातील आरोग्य व्यवस्थेच्या इतिहासात मैलाचा दगड ठरणार आहे. महाराष्ट्रातील प्रत्येक नागरिकासाठी आरोग्य सेवा अधिक प्रभावी आणि सुलभ होणार आहे.
