कृषीमंत्री माणिकराव कोकाटे यांच्या वादग्रस्त विधानांवर उपमुख्यमंत्री अजित पवारांनी नाराजी व्यक्त करत त्यांना संयमाने बोलण्याचा सल्ला दिला आहे.
राज्याचे कृषीमंत्री माणिकराव कोकाटे यांनी सलग वादग्रस्त वक्तव्य केल्यानंतर आता उपमुख्यमंत्री अजित पवार यांनी त्यांची कानउघाडणी केली आहे. कोकाटे यांच्या बोलण्यातून सातत्याने निर्माण होणाऱ्या वादांमुळे सरकारची अडचण वाढत आहे. कोकाटे यांच्या विधानांवर राज्यभरातून टीका होत असतानाच, अजित पवार यांनी त्यांना सल्ला देताना संयमाचे महत्त्व स्पष्ट केलं आहे.
माणिकराव कोकाटे यांनी अवकाळी पावसानंतर नाशिकमध्ये केलेल्या निरीक्षणाच्या वेळी शेतकऱ्यांबाबत वादग्रस्त विधान केल्याने मोठा गोंधळ निर्माण झाला आहे. त्यानंतर एका कार्यक्रमात कृषी विभागाबद्दल बोलताना त्यांनी पुन्हा एक अपमानास्पद विधान केलं, ज्यामुळे अजित पवार यांना हस्तक्षेप करावा लागला.
वादग्रस्त टीका ऐरणीवर
कोकाटे यांनी अवकाळी पावसानंतर झालेल्या नुकसानीबाबत शेतकऱ्यांशी संवाद साधताना, ढेकळांचे पंचनामे करायचे का ? असे बोलल्याने संतापाची लाट उसळली. शेतकऱ्यांच्या दुःखावर टीका करावी की मदत, हा प्रश्न सामान्य जनतेसमोर उभा राहिला. कृषी विभागासारख्या महत्त्वाच्या खात्याचे नेतृत्व करताना संवेदनशीलता आवश्यक असते, मात्र कोकाटे यांच्या शैलीवर अनेकांनी आक्षेप घेतला आहे. उपमुख्यमंत्री अजित पवार यांनी स्पष्ट शब्दांत कोकाटेंच्या विधानांवर नाराजी व्यक्त केली. त्यांनी म्हटलं की, काही गोष्टी बोलून दाखवण्याऐवजी मनात ठेवाव्यात. मी आधीच सांगितलं होतं की शेतकऱ्यांविषयी असं बोलणं टाळावं. पवार यांनी कोकाटेंच्या बोलण्याच्या शैलीवर अप्रत्यक्षपणे टीका करत त्यांना राजकीय जबाबदारीची जाणीव करून दिली.
एका सार्वजनिक कार्यक्रमात कोकाटे यांनी कृषी खातं ओसाड गावाची पाटीलकी असल्याचं विधान केलं. यामुळे कृषी खात्याच्या महत्त्वावरच प्रश्‍नचिन्ह निर्माण झालं. कोकाटे यांचं हे विधान केवळ शेतकऱ्यांना नव्हे तर राज्य सरकारच्या भूमिकेला धक्का पोहोचवणारं ठरलं. त्यांच्या या वक्तव्यानं शेतकरी संघटनांत असंतोष पसरला आहे. काही दिवसांपूर्वी कोकाटे यांनी कर्जमाफीवरूनही वादग्रस्त विधान केलं होतं. त्यांनी शेतकऱ्यांना उद्देशून म्हटलं होतं की, कर्ज घेता आणि मग पाच-दहा वर्ष वाट पाहता, कर्जमाफीच्या पैशांनी काय करता? या विधानामुळे कोकाटे यांच्यावर मोठ्या प्रमाणात टीका झाली होती. त्यांच्या या वक्तव्याचा व्हिडीओ सोशल मीडियावर व्हायरल झाला होता.
सरकारच्या प्रतिमेवर परिणाम
कोकाटे यांनी आपल्या विधानांबाबत स्पष्टीकरण देण्याचा प्रयत्न केला. त्यांनी सांगितलं की, अवकाळी पावसामुळे फळबागांचे मोठ्या प्रमाणात नुकसान झालं आहे. शेतात काहीच नसलेल्या ठिकाणी पंचनामे करून उपयोग नाही. मात्र त्यांच्या शब्दांतील बोचरेपणा आणि अविचारी शैलीमुळे लोकांच्या मनात संतापाची भावना निर्माण झाली आहे. राज्य सरकारमध्ये मंत्री असताना अशी वादग्रस्त विधाने सरकारची प्रतिमा मलीन करत आहेत. शेतकऱ्यांच्या हक्कांसाठी आवाज उठवणाऱ्या सरकारचेच मंत्री जर त्यांच्यावर टीका करत असतील, तर सामान्य जनतेमध्ये सरकारबद्दलचा विश्वास डळमळीत होऊ शकतो. अजित पवार यांचं हस्तक्षेप हे त्या दृष्टीने महत्त्वाचं ठरतं.
सध्याच्या काळात राजकारण केवळ बोलण्यावर नाही, तर बोलण्याची पद्धत आणि वेळ यावर अवलंबून आहे. मंत्री कोकाटे यांना अजित पवार यांनी दिलेला सल्ला ही एक सुसंवादाची दिशा आहे. शेतकऱ्यांच्या दुःखावर ओलेचिंब अश्रू पुसण्याऐवजी अश्लाघ्य विधाने करणं कुठल्याही नेत्यास शोभणारं नसतं.
