राहुल गांधी आणि विरोधी पक्षांनी महाराष्ट्रातील विधानसभा निवडणुकीत मोठ्या प्रमाणात मत चोरीचा आरोप करत निवडणूक आयोगाविरुद्ध जोरदार आंदोलन केले.
दिल्लीच्या राजकारणात पुन्हा एकदा मत चोरीचा मुद्दा स्फोटक ठरत आहे. 2024 लोकसभा आणि महाराष्ट्र विधानसभा निवडणुकीनंतरही हा वाद शमताना दिसत नाही. काँग्रेस नेते व विरोधी पक्षनेते राहुल गांधी यांनी भाजपवर निवडणूक आयोगाच्या संगनमताने मत चोरी केल्याचा गंभीर आरोप केला आणि त्यामुळे राजकीय वातावरण तापले आहे. मात्र, हा वाद महाराष्ट्रापुरता मर्यादित राहिला नाही, तर तो थेट केंद्रीय मंत्रिमंडळापर्यंत पोहोचला आहे. संसदेत देखील या आरोपांची जळजळ समोर आली आहे. 7 ऑगस्ट 2025 रोजी लोकसभेच्या पावसाळी अधिवेशनादरम्यान राहुल गांधींनी दिलेली 22 पानांची, 1 तास 11 मिनिटांची सादरीकरणाची चार्जशीट, राजकीय बॉम्ब ठरली आहे.
चार्जशीटमध्ये महाराष्ट्रातील विधानसभा निवडणुकीत मोठ्या प्रमाणात मत चोरी झाल्याचा पुरावा दाखवण्यात आल्याचा दावा आहे. राहुल गांधींच्या मते, मशीन रीडेबल मतदार यादी न देऊन निवडणूक आयोगाने भाजपसाठी निवडणूक चोरली. या आरोपांवर सोमवारी (11 ऑगस्ट) मतदार पडताळणी आणि मत चोरीच्या मुद्द्यावर 300 विरोधी खासदारांनी संसदेतून निवडणूक आयोगाच्या कार्यालयापर्यंत मोर्चा काढला. राहुल गांधी, प्रियंका गांधी, अखिलेश यादव यांच्यासह अनेक विरोधक मोर्चात सहभागी झाले, पण मोर्चा वाहतूक भवनाजवळच थांबवण्यात आला आणि पोलिसांनी सर्वांना ताब्यात घेतले. काँग्रेसमध्ये या घटनेनंतर असंतोष उफाळून आला आहे.
Sanjay Gaikwad : ‘बाप’ म्हणत भडकले, आता गोडगोड बोलून यू-टर्न घेतले
एक मत हक्क
खास करून यशोमती ठाकूर यांनी यावरून आपला संताप प्रकट केला. त्यांनी निवेदन दिले की, लोकशाहीत आंदोलन करण्याचा अधिकार आहे, पण शांततापूर्ण पद्धतीने जाणाऱ्या लोकप्रतिनिधींना रस्त्यावर बसून ठिय्या आंदोलन करावे लागेल अशी परिस्थिती का निर्माण केली जात आहे? जर निवडणूक आयोग आणि सरकारला काहीही चुकीचे केले नसते, तर विरोधकांची भीती का वाटते? यशोमती ठाकूर यांनी थेट निवडणूक आयोग आणि केंद्र सरकारवर जोरदार निशाणा साधला आहे. हा देश संविधानाने चालतो, मनमानीने नाही. निवडणूक आयोग व सरकारने विरोधकांच्या आवाजाला दाबण्याचा प्रयत्न करत असताना, मतदानाचा हिशोब घेण्याचा अधिकार कुणाला थोपवायचा आहे? असे त्यांनी प्रश्न उपस्थित केले.
मोर्चादरम्यान नाट्यमय घटना घडल्या. अखिलेश यादव यांनी बॅरिकेड्स पार करण्याचा प्रयत्न केला, मात्र पोलिसांनी त्यांना अडवले. अखेर ते रस्त्यावर बसले. प्रियंका गांधी, डिंपल यादवसह अनेक खासदार ‘वोट चोर गद्दी सोड’ अशी घोषणाबाजी करत होते. राहुल गांधी यांनी या आंदोलनाला संविधान वाचवण्याची लढाई ठरवून, एक व्यक्ती, एक मत या तत्त्वासाठी लढा देत असल्याचा ठाम विश्वास व्यक्त केला. राजकीय वातावरण आतापर्यंतच्या तुलनेत खूपच गरम झाले असून, निवडणूक आयोगावरचा दबाव वाढत चालला आहे.
