नागपूर महानगरपालिकेच्या निवडणुकीपूर्वी गणेशोत्सवाच्या उत्साहात राजकीय रंगही मिसळले आहेत. भाजपचा ‘विघ्नहर्ता’ कोण ठरेल, याची चर्चा जोरात सुरू आहे.
महाराष्ट्राच्या सांस्कृतिक हृदयात, गणेशोत्सवाचा उत्साह जोरात सुरू आहे. घराघरात, गल्लीबोळात गणरायाचे स्वागत गजानना, श्री गणराया आधी वंदू तुज मोरयाच्या गजराने होत आहे. ढोल-ताशांचा नाद, रंगीबेरंगी सजावट आणि भक्तीचा उत्साह यांनी नागपूर शहर गणेशमय झाले आहे. पण यंदा गणरायाच्या या उत्सवात फक्त भक्तीचा रंग नाही, तर राजकारणाचा रंगही मिसळला आहे. याला कारणही तसेच ठरले आहे. लवकरच स्थानिक स्वराज्य संस्थांची निवडणूक होणार आहे. सहा वर्षांच्या प्रतीक्षेनंतर सुप्रीम कोर्टाच्या आदेशाने निवडणुकीचा मार्ग मोकळा झाला आहे. प्रभाग रचनाही जाहीर झाली असून, प्रत्येक पक्षाने रणनीती आखायला सुरुवात केली आहे. नागपूर, ज्याला भारतीय जनता पक्षाचा (भाजप) बालेकिल्ला म्हणून ओळखले जाते, तिथेही राजकीय वातावरण तापले आहे. कोणत्याही शुभकार्यापूर्वी गणपती बाप्पाचे नाव घेतले जाते.
आता या निवडणुकीच्या रणसंग्रामातही प्रत्येकजण बाप्पाच्या चरणी साकडं घालताना दिसत आहे. मुख्यमंत्री देवेंद्र फडणवीस, केंद्रीय मंत्री नितीन गडकरी आणि महसूलमंत्री चंद्रशेखर बावनकुळे यांच्या गृहनगर असलेल्या नागपूरात महापालिका निवडणुकीसाठी कोण ठरेल खरा ‘विघ्नहर्ता’? हा प्रश्न आता सर्वांच्या मनात घोळतो आहे. महाराष्ट्र विधानसभा निवडणुकीच्या निकालावर नजर टाकली तर नागपूरात भाजपची कामगिरी मिश्र स्वरूपाची दिसते. दक्षिण-पश्चिम नागपूरात मुख्यमंत्री फडणवीस यांनी विजय मिळवला. तर पूर्व नागपूरात कृष्णा खोपडे यांनी बाजी मारली. दक्षिण नागपूरात मोहन मते आणि मध्य नागपूरात प्रवीण दटके यांनीही भाजपचा झेंडा फडकवला. पण पश्चिम आणि उत्तर नागपूरात पक्षाला अपयश आले. आता राष्ट्रीय स्वयंसेवक संघाची पवित्र भूमी असलेल्या या शहरात महापालिका निवडणुकीत भाजपचा गड कोण राखणार, याकडे सर्वांचे लक्ष लागले आहे.
स्पर्धात्मक लढाई
महापालिकेच्या या रणसंग्रामात दोन नावे चर्चेत आहेत. आमदार प्रवीण दटके आणि आमदार संदीप जोशी. प्रवीण दटके, मध्य नागपूरचे आमदार आहेत. ते यापूर्वी नगरसेवकही राहिले आहेत. यांचे नाव महापालिका निवडणुकीच्या नेतृत्वासाठी आघाडीवर आहे. त्यांचा अनुभव आणि स्थानिक पातळीवरील पकड यामुळे त्यांच्याकडे पक्षाची कमान येईल, अशी चर्चा आहे. पण त्याचवेळी, नुकतेच विधान परिषदेचे आमदार म्हणून निवडून आलेले संदीप जोशी यांचे नावही जोरात घेतले जात आहे. जोशी हे मुख्यमंत्री फडणवीस यांचे निकटवर्तीय आणि त्यांच्यासोबत शिक्षण घेतलेले सहकारी आहेत. त्यांच्या नावाला फडणवीस यांच्या नेतृत्वाचा पाठिंबा आहे, असे बोलले जाते. संदीप जोशी सध्या गावोगावी दौरे, बैठका आणि जनसंवादातून सक्रियपणे राजकीय मैदान गाजवत आहेत.
जोशी यांची ही सक्रियता पाहता, महापालिका निवडणुकीची धुरा त्यांच्याकडे जाण्याची शक्यता जास्त दिसते. प्रवीण दटके यांचा स्थानिक पातळीवरील अनुभव आणि जनसंपर्कही कमी नाही. त्यामुळे भाजपचा खरा ‘विघ्नहर्ता’ कोण ठरेल, हे पाहणे औत्सुक्याचे ठरणार आहे. दरम्यान, इतर पक्षही निवडणुकीच्या तयारीला लागले आहेत. पण संघाच्या भूमीत, भाजपचा गड राखण्याची जबाबदारी कोणाच्या खांद्यावर येईल, यावर सगळ्यांचे डोळे लागले आहेत. नागपूरच्या गल्लीबोळात गणरायाच्या स्वागताचा उत्साह आणि राजकीय रणधुमाळी यांचा अनोखा संगम पाहायला मिळत आहे. गणेशोत्सवाच्या या रंगीत वातावरणात, निवडणुकीच्या रणसंग्रामात कोण बाजी मारेल, हे लवकरच कळेल. पण एक नक्की, नागपूरच्या या लढाईत गणरायाच्या आशीर्वादाची सर्वांनाच गरज भासणार आहे.
Dayashankar Tiwari : महापालिका निवडणुकीपूर्वी भाजपची भव्य टीम तयार
