मराठा आरक्षणासाठी मनोज जरांगे पाटील मुंबईच्या आझाद मैदानावर उपोषण करत आहेत. ज्याला महायुती सरकारमधील मित्रपक्षातील आमदार अमोल मिटकरीने थेट पाठिंबा दिला आहे.
महाराष्ट्रात गणेशोत्सवाच्या भक्तिमय वातावरणात उत्साहाचे आणि आनंदाचे रंग उधळत असताना, राजकीय आखाड्यात मात्र मराठा आरक्षणाच्या मुद्द्याने चांगलाच धुरळा उडवला आहे. मुंबईच्या आझाद मैदानावर मराठा क्रांती मोर्चाचे नेते मनोज जरांगे पाटील यांनी 29 ऑगस्ट 2025 पासून उपोषणाला सुरुवात केली आहे. मराठा समाजाला ओबीसी प्रवर्गातून आरक्षण मिळावे, या मागणीसाठी त्यांनी पुकारलेल्या या लढ्याने संपूर्ण राज्याचे लक्ष वेधले आहे. लाखो मराठा बांधव मुंबईत दाखल झाले असून, आंदोलनाचा जोर वाढतच आहे. पहिल्या दिवशी फक्त एका दिवसाची परवानगी मिळाली असली, तरी जरांगे यांनी दुसऱ्या दिवशीही आझाद मैदानावर ठाण मांडले आहे.
परंतु या सगळ्यात खळबळ माजवणारी गोष्ट म्हणजे, सत्ताधारी महायुतीतील मित्रपक्षातील एका आमदाराने जरांगेंना थेट पाठिंबा जाहीर केला आहे. हे आमदार दुसरे, तिसरे कुणी नसून राष्ट्रवादी काँग्रेस अजित पवार गटाचे आक्रमक नेते अमोल मिटकरी आहेत. नेहमीच आपल्या सडेतोड वक्तव्यांनी आणि बिनधास्त शैलीने चर्चेत राहणारे अमोल मिटकरी यांनी यावेळी जरांगे यांच्या आंदोलनाला पाठिंबा देऊन राजकीय वर्तुळात भलताच गोंधळ उडवला आहे. ‘एक मराठा, लाख मराठा’ असा नारा देत मिटकरी यांनी जरांगेंच्या उपोषणाला जाहीर समर्थन दिले आहे. शेतमजुरी करणारा मराठा बांधव आज हक्कासाठी लढतोय, त्यांच्या लढ्याला बळ देणे माझे कर्तव्य आहे.
Vasudev Madavi : माओवाद्यांचा संहार करणारे राष्ट्रपती शौर्य पदकाचे मानकरी
समाजातील ताणतणाव वाढले
संवैधानिक मार्गाने सुरू असलेल्या आंदोलनावर आक्षेप घेणाऱ्यांकडे दुर्लक्ष करा, असे अमोल मिटकरी यांनी खणखणीतपणे सांगितले. मिटकरींची ही भूमिका महायुतीच्या अंतर्गत राजकारणात नवा ट्विस्ट आणणारी ठरली आहे. एकीकडे मुख्यमंत्री देवेंद्र फडणवीस, उपमुख्यमंत्री अजित पवार आणि एकनाथ शिंदे मराठा आरक्षणाच्या मुद्द्यावर तोडगा काढण्यासाठी धडपडत आहेत. अमोल मिटकरींची ही आक्रमक शैली नवीन नाही. यापूर्वीही त्यांनी अनेकदा आपल्या वक्तव्यांनी सत्ताधारी आणि विरोधकांना चकित केले आहे. यावेळीही ते थेट जरांगे यांच्या बाजूने उभे राहिले आहेत. 29 ऑगस्टच्या रात्री मुंबईत पावसाने हजेरी लावल्याने मराठा आंदोलकांनी सीएसएमटी रेल्वे स्थानकावर आश्रय घेतला होता.
दुसऱ्या दिवशी, म्हणजेच 30 ऑगस्ट 2025 रोजी, जरांगे पुन्हा एकदा आझाद मैदानावर उपोषणाला बसले. त्यांच्या या निर्धाराने मराठा समाजात उत्साह संचारला आहे. पण याचवेळी, मुख्यमंत्री फडणवीस यांनी आंदोलनाचा गैरफायदा घेणाऱ्यांना कडक इशारा दिला आहे. मराठा समाजाविषयी सरकार सकारात्मक आहे. पण काही जण जाणीवपूर्वक मराठा-ओबीसी समाजात तेढ निर्माण करत आहेत. अशा लोकांनी स्वतःची पोळी भाजण्याचा प्रयत्न करू नये, असा खणखणीत इशारा फडणवीस यांनी दिला. या वक्तव्यातून त्यांनी विरोधकांवर निशाणा साधत सामाजिक सलोख्याचे आवाहन केले आहे.मराठा आरक्षणाचा मुद्दा आता अधिकच तापला आहे. जरांगे यांचे उपोषण, मिटकरींचा पाठिंबा आणि फडणवीस यांचा इशारा यामुळे राजकीय वातावरण चांगलेच तापले आहे. मराठा समाजाच्या मागण्या आणि सरकारचा तोडगा यांच्यातील ताणतणाव कसा निवळणार, याकडे सर्वांचे लक्ष लागले आहे.
