गणेशोत्सवाच्या आनंदाच्या पार्श्वभूमीवर अकोला जिल्ह्यात पोलीस अधीक्षक अर्चित चांडक यांच्या नेतृत्वाखाली पोलिसांनी गुन्हेगारीवर कठोर कारवाई करत गोवंश तस्करांना अटक केली आहे.
नागपूरच्या रस्त्यांवर वाहतुकीला शिस्त लावणारे आता अकोल्याच्या गुन्हेगारीला आळा घालतांना दिसत आहे. अकोल्यात गुन्हेगारीच्या मुळावर घाव घालणारे हे ‘सुपरकॉप’ आहेत अर्चित चांडक. अकोल्याचे पोलीस अधीक्षक म्हणून त्यांनी पुन्हा एकदा आपली जादू दाखवली आहे. गणेशोत्सवाच्या आनंदी वातावरणात, जिथे सर्वत्र बाप्पांचा जय-जयकार सुरू आहे, तिथे चांडक यांनी आपल्या तीक्ष्ण नजरेने गुन्हेगारांना सळो की पळो करून सोडले आहे. अकोला जिल्ह्यातील गुन्हेगारीच्या काळ्या ढगांना पांगवत, त्यांनी जनतेला निर्भयतेचा सण साजरा करण्याची संधी दिली आहे. त्यांच्या धडाकेबाज कारवाईने अकोल्यातील जनता आता बाप्पाच्या आगमनासाठी उत्साहात आहे. कारण चांडक यांचे ‘सुरक्षा कवच’ त्यांच्यासोबत आहे.
नुकतेच बाळापूर तालुक्यातील वाहेगाव येथील कुख्यात तस्कर शेख सलीम उर्फ बाबू जमदार शेख रहुल्ला, वय 49, याला अर्चित चांडक यांनी आपल्या चक्रव्यूहात अडकवले होते. त्याच्या गुन्हेगारी कारनाम्यांनी परिसरात दहशत निर्माण केली होती, पण चांडक यांच्या सतर्कतेमुळे तो आता अकोला जिल्हा कारागृहात ‘विश्रांती’ घेत आहे. यापूर्वीही चांडक यांनी अनेक गुन्हेगारांना धूळ चारली आहे. आता गोवंश तस्करी विरुद्ध त्यांनी ‘ऑपरेशन प्रहार मोहीम’ राबवत अकोल्याला सुरक्षित करण्याचा विडा उचलला आहे. काही दिवसांपूर्वी चांडक यांना गोवंश तस्करीबाबत गुप्त माहिती मिळाली.
सणात सुरक्षा सुनिश्चित
चांडक यांनी तात्काळ पोलिस दलात काही बदल केले आणि स्थानिक गुन्हे शाखेतील काही पोलिसांच्या संशयास्पद हालचालींवर नजर ठेवली. 30 ऑगस्ट 2025 रोजी रात्री, हिवरखेड पोलीस स्टेशनचे पोहेकॉ प्रमोद चव्हाण यांना गुप्त बातमी मिळाली की, धोंडा आखर गावाकडून अडगाव बुकडे काही गोवंश बोलेरो गाडीतून कत्तलीसाठी नेले जात आहेत. चांडक यांच्या मार्गदर्शनाखाली पोलिसांनी नाकाबंदी करत, आरोपी नदीम खान उर्फ राजा दस्तगीर खान याला 6 गोवंशांसह रंगेहाथ पकडले. 1 लाख 10 हजार रुपये किमतीचे गोवंश आणि 6 लाख 50 हजार रुपये किमतीची बोलेरो असा एकूण आत लाखांहून अधिक रुपयांचा मुद्देमाल जप्त करण्यात आला. गोवंशांना संरक्षणासाठी अकोट येथील गौरक्षण संस्थेत पाठवण्यात आले आहे.
आरोपीविरुद्ध प्राणी संरक्षण कायद्यांतर्गत गुन्हा दाखल करून अटक करण्यात आली.अर्चित चांडक यांच्या नेतृत्वाखाली अकोला पोलिसांनी गुन्हेगारीविरुद्ध एक नवा मानदंड प्रस्थापित केला आहे. त्यांच्या धडाकेबाज कारवाईमुळे गणेशोत्सवाच्या सणासुदीच्या काळात अकोल्यातील जनता निर्धास्तपणे उत्सव साजरा करू शकते. हिवरखेड पोलीस स्टेशनचे ठाणेदार गजानन राठोड, पोहेकॉ प्रमोद चव्हाण, योगेश इंगळे, प्रफुल पवार, आणि दिपक ढोले यांनी अर्चित चांडक यांच्या मार्गदर्शनाखाली ही कारवाई यशस्वी केली. अर्चित चांडक यांनी केवळ गुन्हेगारांनाच नाही, तर पोलिस दलातील संशयास्पद घटकांवरही नजर ठेवली आहे. त्यांच्या या ‘सुपरकॉप’ अवताराने अकोल्याला एक सुरक्षा कवच प्राप्त झाले आहे. गुन्हेगार आता त्यांच्या चक्रव्यूहात अडकण्यास तयार असावेत, कारण अर्चित चांडक यांचा ‘प्रहार’ आता थांबणार नाही.
Akola : महापालिका निवडणुकीत ‘अनुप स्क्वेअर’ ठरेल का भाजपचे विघ्नहर्ता?
