नागपूरच्या कामठी मार्गावर बांधलेला डबल डेकर मेट्रो व्हायाडक्ट गिनीज वर्ल्ड रेकॉर्डमध्ये नोंदला गेला आहे. ज्यामुळे शहराची वाहतूक सुधारली आणि जागतिक स्तरावर नागपूरची ओळख वाढली आहे.
महाराष्ट्राची उपराजधानी, संत्र्यांची नगरी, मेट्रोसिटी, आयटी हब आणि आता जागतिक दर्जाच्या पायाभूत सुविधांचे शहर नागपूर. या शहराने विकासाच्या शिखरावर स्वार होत एक नवा इतिहास रचला आहे. मुख्यमंत्री देवेंद्र फडणवीस आणि केंद्रीय दळणवळण मंत्री नितीन गडकरी यांच्या जोडीने नागपूरला प्रगतीच्या नव्या उंचीवर नेले आहे. ही ‘छोटे मिया-बडे मिया’ जोडी अशक्य वाटणारी स्वप्ने साकार करण्यासाठी ओळखली जाते. त्यांच्या नेतृत्वाखाली नागपूरने विकासाची गंगा वाहत आणली आहे. आता एका नव्या विक्रमाने शहराला जागतिक नकाशावर आणखी ठळक केले आहे. कामठी मार्गावरील जगातील सर्वात लांब डबल डेकर मेट्रो व्हायाडक्टने गिनीज बुक ऑफ वर्ल्ड रेकॉर्ड्समध्ये आपले नाव कोरले आहे.
5.62 किमी लांबीचा हा पूल केवळ स्थापत्यकलेचा चमत्कार नाही, तर तंत्रज्ञान आणि नियोजनाचा एक उत्कृष्ट नमुना आहे. या ऐतिहासिक क्षणाला साजरे करताना मुख्यमंत्री देवेंद्र फडणवीस यांनी महामेट्रोच्या अधिकाऱ्यांचे कौतुक केले. हा पूल नागपूरच्या विकासाचा एक नवा पायंडा आहे. जो शहराला आंतरराष्ट्रीय स्तरावर एक वेगळी ओळख देतो. हा डबल डेकर व्हायाडक्ट चार स्तरांवर उभारला गेला आहे. जमिनीवर रस्ता, त्यावर महामार्ग, त्यावर मेट्रो आणि सर्वात वर पाच मेट्रो स्थानके. गड्डीगोदाम चौक, कडबी चौक, इंदोरा चौक, नारी रोड आणि ऑटोमोटिव्ह चौक ही स्थानके या पुलावर बांधण्यात आली आहेत. सिंगल कॉलम पिअरवर उभारलेला हा पूल स्थापत्य आणि तंत्रज्ञानाच्या क्षेत्रातील एक अनोखा पराक्रम आहे.
तंत्रज्ञानाने बदलले शहर
‘रिब अँड स्पाइन’ तंत्रज्ञानाचा वापर करून 1 हजार 650 टन क्षमतेचा हा प्रकल्प शहरी भागात यशस्वीपणे पूर्ण झाला आहे. यामुळे कामठी मार्गावरील वाहतूक कोंडी कमी होऊन नागरिकांना वेळ आणि इंधनाची बचत होत आहे. यापूर्वी 2022 मध्ये वर्धा रोडवरील 3.14 किमी लांबीच्या डबल डेकर व्हायाडक्टने गिनीज विक्रम नोंदवला होता. आता कामठी मार्गावरील हा नवा प्रकल्प त्या विक्रमाला मागे टाकत आहे. ही उपलब्धी नागपूरच्या विकासपुरुष नितीन गडकरी आणि देवेंद्र फडणवीस यांच्या दृष्टी आणि राजकीय इच्छाशक्तीचे प्रतीक आहे. या जोडीने अशक्य वाटणारी कामे शक्य करून दाखवली आहेत. आशियातील सर्वात मोठा पूल वर्धा रोडवर आधीच उभारला गेला. आता कामठीचा हा पूलही जागतिक पातळीवर गौरव मिळवत आहे.
नागपूरच्या या विकासकथेत फडणवीस आणि गडकरी यांची जोडी म्हणजे एक अजेय शक्ती आहे. त्यांच्या नेतृत्वाखाली शहराने मेट्रो, आयटी हब, स्मार्ट सिटी आणि आता जागतिक दर्जाच्या पायाभूत सुविधांचे केंद्र अशी ओळख मिळवली आहे. या डबल डेकर व्हायाडक्टमुळे वाहतूक व्यवस्था अधिक सुकर आणि गतिमान झाली आहे. नागपूर आता फक्त संत्र्यांची नगरी नाही, तर तंत्रज्ञान आणि प्रगतीचे माहेरघर आहे. या प्रकल्पाने शहरातील नागरिकांना सुविधा तर मिळालीच, शिवाय नागपूरचे नाव जागतिक स्तरावर झळकले आहे. ही उपलब्धी केवळ एक पूल नाही, तर नागपूरच्या उज्ज्वल भविष्याचा पाया आहे. गडकरी आणि फडणवीस यांच्या मार्गदर्शनाखाली नागपूरने सिद्ध केले आहे की, दृढनिश्चय आणि नियोजनासमोर कोणतेही आव्हान मोठे नाही. या विक्रमामुळे नागपूरच्या विकासाला नवी गती मिळाली आहे. शहर आता जागतिक स्तरावर आपली छाप पाडण्यासाठी सज्ज आहे.
Parinay Fuke : दिला शब्द खरा ठरला, संविधानातच राहून निर्णय झाला
