एखाद्या यशस्वी पुरुषाच्या मागे नेहमीच एका स्त्रीचा हात असतो हे नेहमीच म्हटल्या जाते. पुरुषाचा संघर्ष अनेकदा त्या स्त्रीच्या साहसात दडलेला असतो असच दृश्य महाराष्ट्राच्या राजकारणात सध्या स्पष्टपणे दिसून येत आहे.
काही वर्षांपूर्वी बॉलिवूडच्या ‘ऐतराज’ चित्रपटाने प्रेक्षकांच्या मनात घर केले होते. करीना कपूर, प्रियंका चोपडा आणि अक्षय कुमार यांच्या दमदार अभिनयाने सजलेल्या या चित्रपटात करीना कपूरने साकारलेली विश्वासाने परिपूर्ण पत्नीची भूमिका आजही प्रेक्षकांच्या स्मरणात आहे. ‘जब पति पर किसी बला का साया पड़ जाता हैं, तब पत्नी ही उसकी नज़र उतारती हैं’, असा तिचा दमदार संवाद आजही गाजतो. हीच ताकद आणि निष्ठा प्रत्यक्ष जीवनातही दिसते, ती म्हणजे शेतकरी नेते रविकांत तुपकर यांच्या पत्नी, शर्वरी तुपकर यांच्या रूपाने. शर्वरी तुपकर या उच्चशिक्षित, कायद्याची जाण असलेल्या वकील आहेत.
शर्वरी या नेहमीच आपल्या पतीच्या खांद्याला खांदा लावून त्यांची साथ देत असतात. त्या शहरात वकिली करत सुखी आयुष्य जगू शकल्या असत्या, पण आपला पती शेतकरी आहे. नेहमी शेतकऱ्यांसाठी लढत असतो, याचा विचार करत त्यांनी पतीची साथ दिली आहे. शर्वरी यांनी शेतकऱ्यांच्या हक्कासाठी लढणाऱ्या आपल्या पतीच्या स्वप्नांना नेहमीच पंख दिले आहे. जेव्हा जेव्हा पतीवर संकट येईल तेव्हा तेव्हा मी मदतीला धावून जाईल, असा संकल्प त्यांचा नेहमीच असतो. ब्रिटिश काळात क्रांतिकाऱ्यांवर ब्रिटिशांनी चाबूक चालवत जुलूम केले. तसेच आजही सरकारकडून अनेक आंदोलकांवर खोटे गुन्हे दाखल होतात.
न्यायालयात सत्याचा विजय
जेव्हा कधी रविकांत तुपकर यांनी शेतकऱ्यांच्या हक्कांसाठी रस्त्यावर उतरून आंदोलने केली, तेव्हा सरकारने त्यांचा आवाज दाबण्याचा प्रयत्न केला आहे. रविकांत तुपकर यांच्यावरही अनेकदा गुन्हे दाखल झाले. पोलिसांनी अटकेचे प्रयत्नही केले. पण प्रत्येक संकटात शर्वरी तुपकर यांनी आपल्या पतीच्या पाठीशी ढाल बनून उभ्या राहिल्या. साडीचा पदर खोचत त्यांनी काळा कोट घातला आणि कोर्टात युक्तिवाद करत आपल्या पतीला सही सलामत बाहेर काढले. इतकंच नव्हे, तर त्यांनी असा दमदार युक्तिवाद केला की, कोर्टाने पोलिसांनाही चांगलाच दणका दिला. नुकतंच बुलढाणा जिल्हा व सत्र न्यायालयाने एका महत्त्वपूर्ण प्रकरणात रविकांत तुपकर आणि त्यांच्या सहकाऱ्यांची निर्दोष मुक्तता केली.
2013 मध्ये बुलढाणा शहरातील मटण दुकानाच्या विरोधात तुपकरांनी तीव्र आंदोलन केले होते. क्रीडा संकुल रोड, राजमाता चौक, सोळंके ले-आऊट येथील हे मटण दुकान परिसरातील नागरिकांसाठी डोकेदुखी ठरले होते. घाण, दुर्गंधी आणि मांसविक्रीच्या नियमांचे उल्लंघन यामुळे स्थानिक नागरिक त्रस्त झाले होते. अन्न व औषध प्रशासन आणि नगरपालिका यांच्या नाकर्तेपणामुळे हा प्रश्न गंभीर बनला होता. अखेर, नागरिकांनी रविकांत तुपकर यांच्याकडे आपली व्यथा मांडली आणि तुपकरांनी अन्न विभागाचे सहायक आयुक्त घनश्याम दंदे यांच्याविरोधात आक्रमक भूमिका घेतली. हे आंदोलन त्या काळात खूप गाजले.
जनतेसाठी उठले आवाज
गेल्या 12 वर्षांपासून हे प्रकरण बुलढाणा जिल्हा न्यायालयात सुरू होते. शर्वरी तुपकर यांनी आपल्या कायदेशीर कौशल्याने प्रभावी युक्तिवाद केला. सर्व साक्षी आणि पुरावे तपासल्यानंतर अतिरिक्त सत्र न्यायाधीश ए. जी. संत यांनी 2 सप्टेंबर 2025 रोजी रविकांत तुपकर आणि त्यांच्या सहकाऱ्यांना निर्दोष मुक्त केले. शर्वरी यांच्या युक्तिवादामुळे हा विजय मिळाल्याची चर्चा न्यायालय परिसरात रंगली. या निकालानंतर रविकांत तुपकर म्हणाले, सत्याचा नेहमीच विजय होतो. जनतेच्या हक्कांसाठी आवाज उठवणे हा गुन्हा आहे का? कितीही खोटे गुन्हे दाखल केले, तरी आम्ही डगमगणार नाही. रक्ताच्या शेवटच्या थेंबापर्यंत आम्ही शेतकऱ्यांसाठी लढत राहू.
गरज पडली तर पुन्हा पुन्हा तुरुंगात जाऊ, पण रस्त्यावर उतरून जनतेच्या प्रश्नांसाठी लढू. शर्वरी तुपकर यांनी आपल्या पतीच्या लढ्याला केवळ साथच दिली नाही, तर त्यांच्या प्रत्येक संकटात त्यांना कायदेशीर आणि नैतिक आधार दिला. प्रत्येक यशस्वी पुरुषामागे एका महिलेचा हात असतो, असं म्हणतात. रविकांत तुपकर यांच्या शेतकरी चळवळीच्या यशामागे त्यांच्या आईचे संस्कार आणि शर्वरी तुपकर यांचा खंबीर पाठिंबा आहे. शर्वरी यांनी आपल्या शिक्षणाचा आणि वकिलीच्या कौशल्याचा उपयोग शेतकऱ्यांच्या हक्कांसाठी लढण्यात केला. त्यांचा हा लढा ‘ऐतराज’ चित्रपटातील करीना कपूरच्या भूमिकेशी थेट जोडला जाऊ शकतो. साडी आणि काळा कोट यांचा संगम घेऊन त्या कोर्टात उभ्या राहतात तेव्हा खऱ्या अर्थाने सत्य आणि न्यायाचा विजय होतो.
