उपमुख्यमंत्री अजित पवार आणि आयपीएस अधिकारी अंजना कृष्णा यांच्यातील व्हिडीओ कॉल वादाने महाराष्ट्राच्या राजकारणात चांगलंच खळबळ उडवली आहे.
महाराष्ट्राच्या राजकीय आखाड्यात सध्या नाट्याचा तमाशा रंगला आहे. त्यात केंद्रस्थानी आहेत उपमुख्यमंत्री अजित पवार आणि त्यांचे खंदे समर्थक, राष्ट्रवादी काँग्रेसचे आक्रमक आमदार अमोल मिटकरी. मराठा-ओबीसी आरक्षणाच्या वादानंतर आता अजित पवारांचा एक व्हिडीओ कॉल सोशल मीडियावर व्हायरल होऊन गोंधळ उडवून देत आहे. या कॉलमध्ये अजित पवार आयपीएस अधिकारी अंजना कृष्ण यांना खडसावताना दिसत आहेत. पण हा वाद इथेच थांबला नाही, तर मिटकरींनी तर थेट अंजना यांच्या यूपीएससी पदवीवरच प्रश्नचिन्ह उपस्थित करत केंद्रीय लोकसेवा आयोगाला पत्र लिहिलं. पण अवघ्या काही तासांत मिटकरींनी माघार घेत माफी मागितली. तरीही, सोशल मीडियापासून ते प्रसारमाध्यमांपर्यंत मिटकरींच्या या कृतीने टीकेची आग भडकली आहे.
सगळा प्रकार म्हणजे राजकीय ड्राम्याचा नवा अंकच जणू. माढा तालुक्यातील कुर्डू गावात मुरूम उत्खननावरून स्थानिक आणि पोलिसांमध्ये बाचाबाची झाली. यावेळी करमाळ्याच्या पोलिस उपअधीक्षक अंजना कृष्ण घटनास्थळी दाखल झाल्या. गावकऱ्यांशी वाद रंगत असताना राष्ट्रवादीचे कार्यकर्ते बाबा जगताप यांनी थेट अजित पवारांना फोन लावला आणि तो अंजना यांच्या हातात दिला. पण अंजनांना अजित पवारांचा आवाज ओळखता आला नाही. मी उपमुख्यमंत्री अजित पवार बोलतोय, ही कारवाई थांबवा, असं पवारांनी दोनदा सांगितलं, पण अंजना यांनी माझ्या फोनवर कॉल करा असं म्हणत पवारांना डिवचलं. यावर संतापलेले पवार म्हणाले, इतकी हिम्मत आहे का?
सोशल मीडियावर वाद
माझा चेहरा तरी ओळखशील ना? मग त्यांनी थेट व्हिडीओ कॉलवर अंजनांना खडसावलं. तहसीलदारांना सांग, माझा आदेश आहे, असं पवारांनी बजावलं. हा सगळा प्रकार कॅमेऱ्यात कैद झाला आणि सोशल मीडियावर व्हायरल होताच वादाला तेल ओतलं गेलं. या प्रकरणात अमोल मिटकरींनी अजित पवारांना पाठिंबा देत अंजना कृष्ण यांच्यावर हल्लाबोल केला. त्यांनी थेट यूपीएससीच्या कागदपत्रांची चौकशी करा, असं पत्र केंद्रीय लोकसेवा आयोगाला लिहिलं. पण ही आगळीक त्यांना चांगलीच भोवली. सोशल मीडियावर मिटकरींना आता यूपीएससीवरही शंका? असे ट्रोल्स सुरू झाले. प्रसारमाध्यमांनीही त्यांच्या या वक्तव्याला बेजबाबदार ठरवलं. अवघ्या काही तासांत मिटकरींनी माफी मागितली, पण आता त्यांचं नाव वादाच्या केंद्रस्थानी आहे.
मिटकरींची ही शैली नवीन नाही. याआधीही त्यांनी अनेकदा अशी वक्तव्यं करत स्वतःच्या पायावर कुर्‍हाड मारली आहे. पण यावेळी थेट आयपीएस अधिकाऱ्याच्या पात्रतेवर प्रश्नचिन्ह उपस्थित करणं त्यांना चांगलंच महागात पडलं आहे. सोशल मीडियावर मिटकरी आणि पवार यांच्यावर टीकेची झोड उठली आहे. विरोधकांनीही या मुद्द्यावरून सत्ताधारी पक्षाला घेरलं आहे. अधिकाऱ्यांवर दबाव टाकणं हा सत्तेचा गैरवापर आहे, असा आरोप होत आहे. दुसरीकडे, अजित पवारांचे समर्थक म्हणतात, पवारांनी फक्त गावकऱ्यांचा प्रश्न सोडवण्याचा प्रयत्न केला, यात चुकीचं काय? पण हा वाद आता राजकीय रंगमंचावरून सामान्य माणसाच्या गप्पांपर्यंत पोहोचला आहे. अजित पवारांचा राग, अंजना कृष्ण यांचं उत्तर आणि अमोल मिटकरींची आगळीक यामुळे हा वाद आता गल्लीपासून दिल्लीपर्यंत चर्चेचा विषय ठरला आहे. मिटकरींची माफी हा वाद शांत करेल की आणखी पेटवेल, हे पाहणं औत्सुक्याचं आहे.
