अकोला शहरातील उपेक्षित प्रभागांचा विकास हा आता चर्चेचा केंद्रबिंदू ठरला आहे. आमदार साजिद खान पठाण यांच्या नेतृत्वाखाली काँग्रेस नगरसेवकांनी मनपा आयुक्तांकडे समान निधी वाटप आणि विकासाची मागणी जोरदारपणे मांडली.
अकोला शहराच्या विकासाच्या ध्यासाने प्रेरित, आमदार साजिद खान पठाण यांनी काँग्रेसच्या नगरसेवकांना सोबत घेऊन महानगरपालिकेचे आयुक्त तथा प्रशासक सुनील लहाने यांची भेट घेतली. शहरातील उपेक्षित भागांच्या विकासासाठी निधी वाटपात समानता आणि पारदर्शकता आणण्याची मागणी त्यांनी आग्रहाने केली. शहरातील अनेक प्रभाग, विशेषतः काँग्रेसच्या नगरसेवकांचे प्रभाग, गेल्या काही वर्षांपासून विकासापासून वंचित आहेत. यामागे निधी वाटपातील असमानता कारणीभूत आहे, असा मुद्दा त्यांनी ठामपणे मांडला. या भेटीत त्यांनी विकासकामांना गती देण्यासाठी प्रशासकीय पातळीवर तातडीने पावले उचलण्याचे आवाहन केले.
आमदार पठाण यांच्या नेतृत्वाखाली काँग्रेस नगरसेवकांनी शहरातील अविकसित भागांचे दुखणे आयुक्तांसमोर मांडले. विशेषतः दलीत बहुल प्रभाग आणि जुन्या शहरातील गल्लीबोळींमधील दयनीय अवस्था त्यांनी स्पष्ट केली. या भेटीत त्यांनी प्रशासकांना विकासाच्या दृष्टीने नवे नियोजन करण्याची विनंती केली. जेणेकरून उपेक्षित भागांचा कायापालट होईल. आयुक्त लहाने यांनीही या मागण्यांचा सकारात्मक विचार करत, लवकरच संबंधित प्रभागांची पाहणी करून गरजेनुसार निधी वाटप आणि विकासकामांना प्राधान्य देण्याचे आश्वासन दिले.
उपेक्षित प्रभागांचा विकास
गेल्या दोन वर्षांहून अधिक काळ अकोला महानगरपालिकेत प्रशासकीय राजवट आहे. या काळात शहराला मोठ्या प्रमाणात निधी उपलब्ध झाला. परंतु त्याचे वाटप असमान झाल्याने काही प्रभाग विकासापासून कोसोदूर राहिले. विशेषतः प्रभाग क्रमांक 1 आणि 2, जिथे दलीत समाजाची मोठी लोकसंख्या आहे. तिथे विकासकामांचा अभाव जाणवतो. पठाण यांनी या प्रभागांमधील रस्त्यांची दुरवस्था, पावसाळ्यात घरांमध्ये शिरणारे पाणी आणि मूलभूत सुविधांचा अभाव यावर बोट ठेवले. त्यांनी प्रशासकांना या समस्यांचे गांभीर्य समजावून सांगत, तातडीने उपाययोजना करण्याची मागणी केली.
आमदार साजिद खान पठाण यांच्या नेतृत्वाखाली काँग्रेसने अकोल्याच्या सर्वांगीण विकासासाठी पुढाकार घेतला आहे. या भेटीत मोहम्मद इरफान, सुवर्णरेखा जाधव, चांदणी शिंदे, पराग कांबळे, फिरोज खान, आकाश कवडे यांच्यासह अनेक नगरसेवक आणि पदाधिकारी उपस्थित होते. त्यांनी एकजुटीने उपेक्षित भागांना विकासाच्या मुख्य प्रवाहात आणण्याचा संकल्प व्यक्त केला. आयुक्त लहाने यांनीही या मागण्यांना सकारात्मक प्रतिसाद देत, विकासकामांना गती देण्यासाठी सर्वतोपरी प्रयत्न करण्याचे आश्वासन दिले. आमदार पठाण यांच्या या प्रयत्नांमुळे अकोल्याच्या अविकसित भागांना नवे बळ मिळण्याची आशा निर्माण झाली आहे.
