नवरात्रीच्या उत्सवात जेव्हा देवीच्या शक्तीचा जागर होतो, तेव्हा नागपूरमध्ये खाकीतील महाकाली सज्ज होते. आयपीएस रश्मिता राव नारीशक्तीच्या सुरक्षेसाठी आपल्या दशभुजांनी गुन्हेगारांवर करडी नजर ठेवतात.
नवरात्र म्हणजे शक्तीचा उत्सव, देवीच्या नऊ रूपांचा जागर आणि अन्यायाविरुद्ध उभे राहण्याचा अटल निश्चय. या पवित्र सणात, जेव्हा सर्वजण आई दुर्गेच्या चरणी नतमस्तक होतात. तेव्हा नागपूर शहरात एक खरीखुरी ‘महाकाली’ आपल्या खाकी वर्दीतील तेजाने नारीशक्तीच्या रक्षणासाठी सज्ज झाली आहे. ही आहे आयपीएस रश्मिता राव, ज्या केवळ पोलिस अधिकारी नसून, नारीसुरक्षेच्या मिशनवर कार्यरत असलेली एक अजेय योद्धा आहे. त्यांच्या कणखर पोलिसिंग शैलीने गुन्हेगारांचे धाबे दणाणले आहे. तर त्यांच्या संवेदनशील मनाने समाजातील प्रत्येक स्त्रीच्या सुरक्षेची कवचकुंडले बांधली आहेत.
रश्मिता राव यांचे व्यक्तिमत्त्व म्हणजे शक्ती आणि करुणेचा अनोखा संगम. फार कमी लोकांना माहित आहे की त्या महाकालीच्या भक्त आहेत. त्यांच्या व्हॉट्सअँप स्टेटसवर नेहमीच महाकालीचे तेजस्वी चित्र झळकते. जणू त्या स्वतःला खाकीतील महाकालीच मानतात. रात्रीच्या गहन अंधारात, जेव्हा महाकालीचे अनुष्ठान जागृत होते. तेव्हा रश्मिता राव रात्रभर गस्त घालत शहराच्या प्रत्येक कोपऱ्यात नजर ठेवतात. रात्रीच्या सन्नाट्यात त्या गुन्हेगारांना सळो की पळो करतात. पहाटे पुन्हा आपल्या कार्यालयात अथक कर्तव्याला सज्ज होतात. कौटुंबिक जबाबदाऱ्या सांभाळताना त्यांनी आपल्या कर्तव्यनिष्ठेला कधीच ढळू दिले नाही. त्यांच्या या अविरत समर्पणामुळे त्या खऱ्या अर्थाने ‘रात्री जागृत असलेली देवी’ ठरल्या आहेत.
Chandrashekhar Bawankule : नागपूरकरांच्या प्रत्येक प्लॉटला मिळणार रजिस्ट्रीचा हक्क
रक्षणासाठी अनोखा प्रयोग
नवरात्रीचा उत्साह म्हणजे गरब्याची धूम, रंगीबेरंगी वातावरण आणि एकत्र येण्याची उमेद. पण या उत्सवात महिलांच्या सुरक्षेचा प्रश्नही तितकाच महत्त्वाचा. याच उद्देशाने डीसीपी रश्मिता राव यांनी नागपूरच्या झोन चारमध्ये एक अभिनव उपक्रम हाती घेतला आहे. गरबा स्थळांवर महिला बीट मार्शल पोलिसांची संख्या वाढवून त्यांनी सुरक्षेचा एक अभेद्य किल्ला उभारला आहे. विशेष म्हणजे, साध्या वेशातील महिला आणि पुरुष पोलिसांना गरब्याच्या ठिकाणी तैनात करून त्यांनी गुन्हेगारी प्रवृत्तींवर करडी नजर ठेवली आहे.
रश्मिता राव यांचा हा उपक्रम केवळ पोलिसिंगपुरता मर्यादित नाही, तर तो नारीशक्तीला बळ देणारा एक सामाजिक संदेश आहे. त्यांच्या नेतृत्वाखाली गरबा स्थळे आता केवळ आनंदाचे केंद्र नसून, सुरक्षिततेचे आश्रयस्थान बनले आहेत. त्यांनी दाखवलेली ही तत्परता आणि संवेदनशीलता प्रत्येक महिलेला निर्भयपणे उत्सव साजरा करण्याची प्रेरणा देते. रात्रीच्या गस्तीपासून ते दिवसाच्या कार्यालयीन कामापर्यंत, रश्मिता राव यांनी आपल्या कार्यशैलीने एक नवा आदर्श निर्माण केला आहे.
रश्मिता राव यांचा हा उपक्रम नवरात्रीच्या उत्सवापुरता मर्यादित नसून, त्यामागे एक गहन उद्देश आहे. तो म्हणजे प्रत्येक महिलेला सुरक्षित आणि सन्मानाचे जीवन जगण्याची हमी देणे. त्यांनी उभारलेली ही सुरक्षा व्यवस्था म्हणजे समाजातील प्रत्येक स्त्रीला बळ देण्याचा एक संदेश आहे. खाकी वर्दीतील ही महाकाली आपल्या दशभुजांनी गुन्हेगारांना शिक्षा तर करतेच, पण त्याचवेळी नारीशक्तीला प्रोत्साहन आणि संरक्षणही देते. रश्मिता राव यांच्या या प्रयत्नांमुळे नागपूरच्या नवरात्रीला एक नवा आयाम मिळाला आहे. तो म्हणजे निर्भयतेचा, शक्तीचा आणि सुरक्षिततेचा.
