अमरावतीच्या शिक्षक जगतात लोकशाहीचा नवा संकल्प आकार घेत आहे. संघटित शिक्षकवर्गाने मतदानाच्या माध्यमातून शिक्षण आणि समाज दोन्ही क्षेत्रांत परिवर्तनाची ज्योत प्रज्वलित करण्याची तयारी सुरू केली आहे.
महाराष्ट्राच्या राजकीय आखाड्यात अमरावती विभाग सध्या धमाल उडवत आहे. आगामी निवडणुकीच्या रणधुमाळीत शिक्षकांचा गट आपली ताकद आजमावण्यास सज्ज झाला आहे. अखिल भारतीय राष्ट्रीय शैक्षिक महासंघाने यापूर्वी गणपतराव वैद्य, नानासाहेब लंके, वसंतराव मालधुरे, दिवाकर पांडे यांसारख्या दिग्गजांना विधान परिषदेत पाठवून शिक्षकांचा ठसा उमटवला आहे. प्राथमिक शाळांपासून महाविद्यालयांपर्यंत. सर्व शिक्षक, प्राचार्य आणि व्यवस्थापकांना एका धाग्यात बांधणारी ही संघटना अमरावती विभागात आपल्या विशाल जाळ्याने प्रभाव पाडत आहे. महाराष्ट्र राज्य शिक्षक परिषदेची ख्याती आणि संत गाडगेबाबा अमरावती विद्यापीठ शाखेची ऊर्जा यांनी निवडणुकीच्या रंगमंचाला नवे चैतन्य मिळाले आहे. नुकत्याच पार पडलेल्या सदस्यता नोंदणीने या अभियानाला आणखी बळ मिळाले आहे.
जलाराम नगरातील शैक्षिक महासंघाच्या विभागीय कार्यालयात नुकतीच संयुक्त सभा पार पडली. ज्याने अमरावतीच्या शैक्षणिक वर्तुळात उत्साहाची लहर उसळली. प्राचार्य डॉ. मीनल भोंडेंच्या नेतृत्वाखाली झालेल्या या सभेत निवडणुकीच्या रणनीतीवर मंथन झाले. निवडणूक आयोगाने सुरू केलेल्या मतदार नोंदणीला गती देण्यासाठी शंभर टक्के नोंदणी आणि मतदानाचा संकल्प घेण्यात आला. बोगस नोंदणीला आळा घालण्यासाठी टास्क फोर्स स्थापन झाली. 6 नोव्हेंबरपर्यंत पहिल्या टप्प्यात जास्तीत जास्त नोंदणीचा ध्यास घेतला गेला. सहा जिल्ह्यांसाठी प्रमुख नेमले गेल्यामुळे शिक्षकांच्या राजकीय यात्रेला नवा वेग मिळाला.
Bihar Election : प्रशांत किशोर यांनी फेकला उमेदवारीचा दुसरा डाव
मतदानाचा ध्यास
अमरावती शिक्षक मतदारसंघातून शिक्षकच आमदार निवडला जावा. या तत्त्वाने प्रेरित अभियानाने गावागावात जोश संचारला आहे. निवडणूक आयोगाच्या नियमांनुसार पात्र शिक्षकांची नोंदणी करणे हा मुख्य उद्देश ठरला. प्राथमिक, माध्यमिक आणि उच्च शिक्षणातील शिक्षकांना एकत्र आणून शंभर टक्के मतदानाचे लक्ष्य ठेवले गेले आहे. या अभियानाने नव्या नेतृत्वाला संधी मिळणार आहे. राष्ट्रवादी विचारसरणीचा शिक्षक आमदार विधान परिषदेत शिक्षकांचा आवाज बुलंद करेल, अशी खात्री वाटत आहे.
डॉ. मीनल भोंडे आणि डॉ. सुमित पवार यांना विभागीय मतदार नोंदणी अभियान प्रमुख म्हणून निवडले गेले. तर अमरावती शहरासाठी डॉ. ओमप्रकाश मुंदे. ग्रामीणसाठी डॉ. प्रमोद गारोडे निवडले गेले, तर अकोल्यासाठी डॉ. शिवाजी नागरे. बुलढाण्यासाठी डॉ. मनोज व्यवहारे निवडले गेले. वाशिमसाठी डॉ. ठकसेन राजगुरे आणि यवतमाळसाठी डॉ. राधेश्याम चौधरी यांना जबाबदारी मिळाली. तालुका स्तरावरही प्रमुख नेमले गेले. ज्यामुळे शालेय आणि उच्च शिक्षणाच्या दोन्ही पंखांना बळ मिळाले. या रचनेने निवडणुकीच्या तयारीला चांगलाच वेग आला आहे.
सभेत शैक्षिक महासंघाचे डॉ. मंगेश अडगोकर, डॉ. दिनेश खेडकर, डॉ. अरुण हरणे, प्राचार्य डॉ. डी. टी. इंगोले, प्राचार्य डॉ. स्मिताताई देशमुख उपस्थित होते. तसेच महाराष्ट्र राज्य शिक्षक परिषदेचे रमेशराव चांदूरकर, राजेंद्र वडनेरकर, सुरेशकुमार पाटील, डॉ. आशिष निमकर, डॉ. संजय रामावत उपस्थित होते. त्याबरोबरच डॉ. निलेश बोडखे, रामानंद पुरसानी, योगेश बुधवानी, दिलीप इखार, सुधीर अवघड, उमेश लाखे, भास्कर इंगोले यांच्या उपस्थितीने उत्साह वाढला. ही एकजूट अमरावती शिक्षक मतदारसंघातून सक्षम शिक्षक आमदार निवडून आणेल. शंभर टक्के मतदानाने विधान परिषदेत शिक्षकांचा जयघोष करेल, याची खात्री आहे.
