महाराष्ट्राच्या राजकीय रणांगणात लवकरच मिनी मंत्रालयाची निवडणूक रंगणार आहे. निवडणुकीचं रणांगण सज्ज झालं असून, प्रत्येक पक्षातील नेते आणि उमेदवार आता सत्तेच्या या महायुद्धात उतरायला तयार झाले आहेत.
महाराष्ट्रात स्थानिक स्वराज्य संस्थांच्या निवडणुकीचा बिगुल वाजल्यानंतर आता तारखांकडे सर्वांचे लक्ष लागले आहे. वर्षानुवर्षे प्रलंबित असलेली ही निवडणूक आता सर्वोच्च न्यायालयाच्या आदेशानुसार 31 जानेवारी 2026 पर्यंत पूर्ण करावी लागणार आहे. निवडणूक आयोगाची तयारी अंतिम टप्प्यात आहे. येत्या काही दिवसांत तारखांची घोषणा होण्याची शक्यता आहे. महायुतीचे मंत्री दिलीप वळसे पाटील यांनी मंचर येथील युवक-युवती मेळाव्यात बोलताना सांगितले की, 5 नोव्हेंबर रोजी निवडणूक जाहीर होऊ शकतात. त्याच दिवसापासून राज्यात आचारसंहिता लागू होईल, ज्यामुळे राजकीय वातावरणात एक नवीन ऊर्जा येईल. ही निवडणूक तीन टप्प्यात होणार असल्याचा अंदाज आहे.
पहिल्या टप्प्यात नगरपालिका आणि नगरपंचायती, दुसऱ्या टप्प्यात जिल्हा परिषद आणि पंचायत समित्या, तर तिसऱ्या टप्प्यात महापालिका निवडणूक पार पडणार आहे. मुंबई महानगरपालिकेची (बीएमसी) निवडणूक जानेवारीच्या मध्यावर, म्हणजे 15 ते 20 जानेवारी दरम्यान होण्याची शक्यता वर्तवली जात आहे. मागील पाच ते सात वर्षांपासून राज्यातील स्थानिक स्वराज्य संस्थांची निवडणूक रखडलेली आहे. मुंबई मनपाची शेवटची निवडणूक 2017 मध्ये झाली होती. आता सर्वोच्च न्यायालयाच्या दबावामुळे आयोगाने वेग वाढवला आहे. प्रत्येक टप्प्यातील मतमोजणी दुसऱ्या दिवशीच होणार आहे. राज्यात एकूण 246 नगरपालिका आणि 42 नगरपंचायतींच्या निवडणुकीची घोषणा पहिल्या टप्प्यात होऊ शकते.
Ravi Rana : प्रहारच्या कार्यकर्त्याकडून मुंडके छाटण्याची धमकी
पक्षांची रणनीती सज्ज
21 दिवसांतच ही निवडणूक पार पडणार आहे. मग लगेचच जिल्हा परिषद आणि पंचायत समित्यांची निवडणूक होणार. शेवटच्या टप्प्यात 29 महानगरपालिकांची निवडणूक होईल. ज्यात मुंबईची बीएमसी स्वतंत्रपणे घेण्याची शक्यता आहे. जानेवारीच्या पहिल्या आठवड्यात हे सर्व घडेल, असा विश्वास अनेकांकडून व्यक्त होत आहे. ही निवडणूक म्हणजे केवळ मतदान नाही, तर स्थानिक विकासाच्या मुद्द्यांवर चर्चा, प्रचाराच्या जिंगल्स आणि नेत्यांच्या भाषणांच्या जंगी मैफिली असतील. गेल्या काळात ओबीसी आरक्षण, वॉर्ड रचना यासारख्या मुद्द्यांमुळे ही निवडणूक रखडली होती. पण आता न्यायालयाच्या हस्तक्षेपाने मार्ग मोकळा झाला आहे. या निवडणुकींमुळे राज्यातील राजकीय पक्षांना नवीन आव्हाने आणि संधी मिळणार आहेत.
महायुती, महाविकास आघाडी आणि अन्य पक्ष आपापल्या रणनीती आखत आहेत. महाराष्ट्रात मागील निवडणुकींचा इतिहास पहिला तर, स्थानिक मुद्दे राष्ट्रीय राजकारणावरही परिणाम करतात. 2017 बीएमसी निवडणुकीत शिवसेना आणि भाजप यांच्यातील स्पर्धा राज्यातील राजकारणाला नवीन वळण देणारी ठरली. आता 2025-26 मध्ये हे रणांगण पुन्हा गाजणार आहे. निवडणूक आयोगाने सर्वोच्च न्यायालयाच्या डेडलाइनचे पालन करण्यासाठी विशेष टीम नेमली आहे. त्यामुळे प्रक्रिया वेगवान होत आहे.या निवडणुकांमुळे लाखो उमेदवार आणि करोडो मतदार सक्रिय होतील. ग्रामीण ते शहरी भागात सर्वत्र उत्साह दिसेल. पण आव्हानेही आहेत. मतदार जागृती, निष्पक्ष निवडणूक आणि सुरक्षा व्यवस्था. एकंदरीत, हे ‘मिनी विधानसभा’ म्हणजे राज्याच्या विकासाची एक मोठी पायरी आहे. ज्यात स्थानिक नेते भविष्यातील मोठ्या राजकारणासाठी तयार होतील.
