राज्यात स्थानिक स्वराज्य संस्थांच्या निवडणुकीची घोषणा होताच राजकीय वातावरण अक्षरशः तापू लागले आहे. प्रत्येक पक्ष प्रचाराच्या रणांगणात उतरला असताना, मुख्यमंत्री देवेंद्र फडणवीस यांनी शिवसेना (उद्धव बाळासाहेब ठाकरे) पक्षप्रमुख उद्धव ठाकरे यांच्या मराठवाडा दौऱ्यावर चिमटा काढत सणसणीत पलटवार केला आहे.
पत्रकारांशी बोलताना फडणवीस म्हणाले, उद्धव ठाकरे पहिल्यांदाच घराबाहेर पडले आहेत, त्याचा मला आनंद आहे. पण ते फक्त टोमणे मारण्यापलिकडे काहीच करू शकत नाहीत. त्यांनी विकासावर भाषण केलं असेल तर मला दाखवा आणि हजार रुपये मिळवा. उद्धव ठाकरे यांनी मराठवाडा दौऱ्यात शेतकऱ्यांशी संवाद साधताना सरकारवर फसवणुकीचा आरोप केला होता. त्यांनी सांगितले की, “कर्जमाफीसाठी सरकारने पुढील वर्षी जून महिन्याची तारीख दिली आहे, कारण तेव्हाच स्थानिक निवडणुका आहेत. म्हणजे सरकार निवडणूक लक्षात घेऊन शेतकऱ्यांची फसवणूक करत आहे.” या आरोपांना उत्तर देताना फडणवीस यांनी उद्धव ठाकरे यांच्या राजकारणावरच प्रश्नचिन्ह उपस्थित केले.
महायुती एकत्रच
फडणवीसांनी मनसे अध्यक्ष राज ठाकरे यांनाही लक्ष्य केले. अलीकडेच निवडणूक आयोगाच्या पत्रकार परिषदेवर टीका करताना राज ठाकरे यांनी तळपायाची आग मस्तकात गेली, असे म्हटले होते. यावर फडणवीस म्हणाले, राज ठाकरे यांना एकच उत्तर हवंय, निवडणूक पुढे ढकला. पण सुप्रीम कोर्टाच्या आदेशानुसार ते शक्य नाही. त्यामुळे त्यांना अपेक्षित उत्तर मिळणार नाही. यानंतर मुख्यमंत्री फडणवीस यांनी स्थानिक स्वराज्य निवडणुकांमध्ये महायुतीचाच विजय निश्चित असल्याचा ठाम विश्वास व्यक्त केला. आमचे तीनही पक्ष आपापल्या पातळीवर निर्णय घेतील, पण महायुती एकच आहे. काही ठिकाणी युती झाली नाही, तरी निवडणुकीनंतर ती होईल. महाराष्ट्रातील जनता मोठ्या प्रमाणात महायुतीलाच कौल देईल, असे ते म्हणाले.
https://thelokhitlive.com/bombay-high-court-cancels-hike-in-rate-of-electricity-rates/
विरोधी पक्ष गेल्या काही महिन्यांपासून मतचोरी आणि मतदारयादीतील अनियमिततेवरून सरकारवर निशाणा साधत आहेत. काँग्रेस नेते राहुल गांधी यांनी तर मतदारयादी शुद्धीकरणाची मागणी करत सरकारला चांगलंच अडचणीत आणलं होतं. परंतु निवडणूक आयोगाने अखेर राज्यातील बहुप्रतिक्षित निवडणुकांची घोषणा करताच राजकीय वातावरण चांगलेच तापले आहे. मराठवाड्यात उद्धव ठाकरे यांचा दौरा, तर फडणवीसांचा पलटवार. राज्याच्या राजकारणात आता वाद, टीका, टोलेबाजी आणि निवडणुकीचा रंग एकत्र मिसळला असून, येत्या काही दिवसांत महाराष्ट्राची राजकीय रणभूमी अधिकच गरम होणार हे निश्चित.
