बच्चू कडू यांनी राधाकृष्ण विखे पाटील यांचे वाहन फोडण्याचे फर्मान सोडले आहे. यावरून राजकीय वादळ निर्माण झालं आहे.
आमदार बच्चू कडू यांनी राधाकृष्ण विखे पाटील यांच्या विरोधात विधान केले आहे. या विधानानंतर राजकीय वातावरण तापले आहे. कडू यांच्या वक्तव्याचा भाजप आमदार प्रवीण तायडे यांनी समाचार घेतला आहे. तायडे आक्रमक झाले आहेत. त्यांनी तीव्र प्रतिक्रिया व्यक्त केली आहे. तायडे म्हणाले, ‘बच्चू कडू हे प्रक्षोभक विधाने करून राज्यातील कायदा आणि सुव्यवस्था बिघडवण्याचा प्रयत्न करीत आहेत.’
तायडे पुढे म्हणाले, ‘राधाकृष्ण विखे पाटील यांना बच्चू कडूंइतकाच अनुभव आहे. ज्येष्ठ नेत्यांबद्दल अशी विधाने करणे हे राजकीय शिष्टाचाराचे उल्लंघन आहे.’ आमदार तायडे यांनी उपमुख्यमंत्री एकनाथ शिंदे यांनी या प्रकरणात हस्तक्षेप करावा अशी मागणी केली. बच्चू कडूंवर कारवाई करावी, असा मुद्दाही त्यांनी उचलून धरला.
वादाला सुरुवात
भाजप नेते आणि राज्याचे कॅबिनेट मंत्री राधाकृष्ण विखे पाटील यांनी शेतकरी कर्जमाफीबाबत विधान केले. या विधानानंतर प्रहार संघटनेचे अध्यक्ष बच्चू कडू आक्रमक झालेत. राधाकृष्ण विखे पाटील यांच्या गाडीची तोडफोड करणाऱ्याला एक लाख रुपये बक्षीस देण्यात येईल, अशी घोषणा कडू यांनी केली. विखे पाटील यांची गाडी दिसली तर ती तोडू, असा इशाराही बच्चू कडू यांनी दिला. विशेष म्हणजे अलीकडेच बच्चू कडू यांनी मुंबई उच्च न्यायालयाच्या नागपूर खंडपीठाने संयम बाळगण्याचा सल्ला दिला.
तत्पूर्वी भाजपचे माजी मंत्री आमदार डॉ. परिणय फुके यांनीही बच्चू कडू यांना सल्ला दिला होता. कडू यांनी स्टंटबाजी बंद करावी, असे फुके म्हणाले होते. विशेष म्हणजे कडू यांच्या नागपुरातील आंदोलनावर न्यायालयाने ताशेरे ओढले. राज्याचा कारभार चालविणारे मंत्रालय मुंबईत आहे. अशात कडू यांनी नागपुरात आंदोलन केले. ही स्टंटबाजी असल्याची टीका अनेकांनी केली. विशेष म्हणजे गरीब शेतकऱ्यांचे नेतृत्व करणारे कडू आंदोलनादरम्यान आलीशान अशा हॉटेलमध्ये दिसले होते.
कोर्टानं देखील बच्चू कडू यांना झापलं होतं. नागपुरातील आंदोलनादरम्यान रस्ता मोकळा करण्याचे आदेश त्यांना न्यायालयाने दिले होते. त्यानंतर त्यांनी कोर्टाबाबत प्रतिक्रिया व्यक्त केली. त्यावरून न्यायालयानं त्यांना आधी अभ्यास करा, मग बोला असा सल्ला दिला होता. माजी आमदार बच्चू कडू हे आधीपासूनच स्टंटबाजी आंदोलनांसाठी प्रसिद्ध आहेत. त्यामुळे त्यांच्यावर टीकाही झाली आहे. अलीकडेच बच्चू कडू यांनी मंत्रिपद न मिळाल्यानं महायुतीपासून फारकत घेतली. तेव्हापासून ते आंदोलन करीत आहेत.
