नांदेडच्या धर्तीवर वंचित आणि काँग्रेसच्या एकत्रीकरणाची चर्चा सुरू झाली आहे. महापालिका निवडणुकीत हा फार्मूला वापरला जाणार का, अशी चर्चा आहे.
नागपुरातील वंचित बहुजन आघाडीच्या दोन पदाधिकाऱ्यांना निलंबित करण्यात आले आहे. पक्षाच्या विरोधात काम केल्याचा ठपका त्यांच्यावर ठेवण्यात आला आहे. या निलंबनानंतर वंचित बहुजन आघाडी आणि काँग्रेसच्या एकत्रीकरणाची चर्चा सुरू झाली आहे. राज्यात महापालिका निवडणूक होणार आहे. या निवडणुकीत नांदेडनंतर वंचित आणि काँग्रेस एकत्र येणार असल्याची चर्चा आता राजकीय वर्तुळात सुरू झाली आहे. नांदेडमध्ये काँग्रेससोबत वंचितने फिफ्टी-फिफ्टी पद्धतीने युती केली आहे.
नांदेडप्रमाणे नागपूर, अकोला, अमरावती, चंद्रपूर महापालिकेत देखील ही युती होणार का, याकडे सगळ्यांचे लक्ष लागले आहे. सद्य:स्थितीत वंचित बहुजन आघाडीमध्ये व्यापक बदल बघायला मिळत आहेत. प्रकाश आंबेडकर यांनी पक्षातील तरूणाईला संधी देण्याचा निर्धार केलेला दिसत आहे. त्यानुसार सुजात आंबेडकर, सिद्धांत पाटील हे आता फ्रंटफूटवर आले आहेत. एका दृष्टीने हे चांगलेही आहे. बहुजन समाजातील तरूणाईला त्यामुळे व्यापक आणि सक्षम व्यासपीठ मिळणार आहे. मात्र काँग्रेस आणि वंचित बहुजन आघाडी एकत्र येऊ नये, अशी अनेकांची इच्छा आहे. वंचितमधील काही पदाधिकाऱ्यांनाही असे वाटत आहे.
निलंबनानंतर भावना
पक्षातून निलंबित झाल्यानंतर वंचित बहुजन आघाडीच्या नागपुरातील दोन पदाधिकाऱ्यांनी आपली भूमिका मांडली आहे. विवेक हाडके आणि प्रफुल माणके हे आता समोर आले आहेत. व्हिडीओ संदेशातून त्यांनी पक्षाच्या विरोधात कोणतेही काम केले नाही, असे स्पष्ट केले आहे. वंचित बहुजन आघाडी बहुजन पक्षांसोबत एकत्र राहावी, असे वाटत असल्याचे त्यांनी स्पष्ट केले आहे. यावरून कदाचित नांदेडनंतर वंचित अन्य ठिकाणी काँग्रेससोबत येण्याच्या तयारीत तर नव्हती ना, असा प्रश्न उपस्थित केला जात आहे.
वंचित बहुजन आघाडी पश्चिम विदर्भात बऱ्यापैकी जोर आहे. राज्यातही काही ठिकाणी पक्षाचे प्राबल्य बहुजन समाजात आहे. परंतु पूर्व विदर्भात बहुजन समाज पार्टीकडे लोक केडर म्हणून पाहतात. अशात वंचित बहुजन आघाडीने दोन पदाधिकाऱ्यांना निलंबित केल्यामुळे पक्षाला काही फरक पडले का, अशी विचारणा होत आहे. तर या प्रश्नाचे उत्तर नाही असे आहे. चंद्रपुरातही अलीकडच्या काळात वंचित बहुजन आघाडीने काही बदल केले. जे पदाधिकारी पक्षहिताचे काम करीत नाहीत, त्यांना प्रकाश आंबेडकर कठोरपणे बाजूला करीत आहेत. पक्षाच्या हितासाठी असे निर्णय कधी कधी गरजेचे ठरतात, असे वंचितच्या पदाधिकाऱ्यांचे म्हणणे आहे. वंचित बहुजन आघाडी आणि प्रकाश आंबेडकर यांची राजकीय भूमिका स्पष्ट आहे.
प्रवेश शक्य
यापूर्वीच्या निवडणुकीत प्रकश आंबेडकर यांनी महाविकास आघाडीसोबत जाण्यासाठी पुढाकार घेतला. परंतु काँग्रेसने त्यांचा मार्ग रोखला होता. विशेषत: तत्कालीन प्रदेशाध्यक्ष आमदार नाना पटोले हे या मार्गातील ‘स्पीडब्रेकर’ ठरले होते. त्यांनी वंचितचे पदाधिकारी धैर्यवर्धन पुंडकर यांना बैठकीच्या ठिकाणी ताटकळत ठेवले होते. मात्र आता काँग्रेसमधील ‘पटोलेशाही’ संपली आहे.
हर्षवर्धन सपकाळ नवीन प्रदेशाध्यक्ष आहेत. काँग्रेस आणि महाविकास आघाडीसाठी जे हिताचे असेल असेच निर्णय सपकाळ घेत आहेत. त्यामुळेच कदाचित नांदेडमध्ये वंचित-काँग्रेस एकत्रीकरण शक्य झाले. सरतेशेवटी महाविकास आघाडी आणि वंचितचा हेतू एकच आहे. राष्ट्रीय स्वयंसेवक संघ आणि भाजपची ताकद संपविणे. बहुजन समाजाला बळकट करणे. आता या प्रयत्नांना आणखी बळकटी मिळेल, असे दिसत आहे.
