निवडणुकीच्या काळात तेली समाजाच्या पदाधिकाऱ्याशी घेतलेला पंगा भंडाऱ्या ठाणेदारांना भोवला आहे. पोलिस अधीक्षक नुरूल हसन यांनी याप्रकरणी कारवाई केली आहे.
नगर परिषद निवडणूक अंतिम टप्प्यात आली आहे. अशात तेली समाजाकडून भंडाऱ्याचे पोलिस निरीक्षक उल्हास भुसारी यांच्या विरोधात तक्रार दाखल करण्यात आली. या तक्रारीची दखल घेत पोलिस अधीक्षक नुरूल हसन यांनी तडकाफडकी भुसारी यांना रजेवर पाठविले आहे. त्यांचा पदभार कारधाचे पोलिस निरीक्षक गोकुळ सूर्यवंशी यांना सोपविण्यात आला आहे. कारधा पोलिस ठाण्याचा पदभार तात्पुरत्या स्वरूपात सहाय्यक पोलिस निरीक्षक प्रशांत साखरे यांच्याकडे देण्यात आला आहे. भुसारी यांच्या विरोधात तेली समाजाचे पदाधिकारी विनोद भुरे यांनी लेखी तक्रार दाखल केली होती.
भुरे यांच्या विरोधात पोलिसांकडे कोणतीही लेखी तक्रार नव्हती. त्यानंतरही 22 नोव्हेंबर रोजी भुसारी यांनी विनाकारण आपल्याला वाहनान कोंबल्याचा आरोप भुरे यांनी लेखील तक्रारीत केला. राजकीय हेतुने भुसारी यांनी हे कृत्य केल्याचा आरोप पोलिस अधीक्षक नुरूल हसन यांना भेटल्यानंतर केला. विशेष म्हणजे भुरे यांच्या पत्नी मनिषा या नगर परिषद निवडणूक लढत आहेत. भाजपच्या त्या उमेदवार आहेत. भंडाऱ्यातील प्रभाग क्रमांक सात (ब) मधून त्यांनी उमेदवारी अर्ज दाखल केला आहे. अशात भुसारी यांनी कोणतेही लेखी आदेश नसताना केलेल्या कारवाईमुळे राजकीय वर्तुळात खळबळ उडाली आहे.
साहेब कुठे गेले?
भंडाऱ्याचे पोलिस निरीक्षक उल्हास भुसारी यांनी राजकीय आदेशावरून भुरे यांना दमदाटी करण्याचा प्रयत्न केल्याचा आरोप तेली समाज पंच कमेटीकडून करण्यात आला आहे. ‘साहेबाच्या’ इशाऱ्यावर भुसारी यांनी ही दमदाटी करण्याचा प्रयत्न केला. भुसारी यांच्या विरोधात ज्यावेळी कारवाई झाली, तेव्हा त्यांचे साहेब धावून आले नाही, असं तेली समाज पंच कमेटीनं स्पष्ट केलं. याप्रकरणी तेली समाजानं पोलिस अधीक्षक नुरूल हसन यांचं लक्ष वेधलं. पोलिसांचं काम निवडणुकीत कुणालाही दमदाटी करण्याचं नाही, असं कमेटीच्या पदाधिकाऱ्यांनी हसन यांच्या निदर्शनास आणून दिलं.
भुसारी यांनी आपल्या कृतीतून तेली समाजाच्या पदाधिकाऱ्यांला तुच्छ वागणूक दिली. त्यामुळं संतापलेल्या समाजानं भुसारी यांच्या विरोधात कारवाई मागणी लावून धरली. 23 नोव्हेंबरला निवदेन प्राप्त होताच हसन यांनी तातडीनं कारवाईला सुरुवात केली. त्यांनी भुसारी यांना रजेवर पाठवले. भुसारी यांनी ठणठणीत असतानाही ऐन निवडणुकीच्या काळात रुग्णनिवेदन देत रजा मागितली. त्यामुळं साहेबांशी सलगी भुसारी यांना भोवल्याचं सांगितलं जात आहे. भंडारा जिल्ह्यात आपली मनमानी करणाऱ्या साहेबांची स्वत: त्यांच्या पक्षाकडून व मित्र पक्षाकडून कोंडी करण्याचं ठरलं आहे.
साहेबांच्या जवळ असलेल्या काही अधिकाऱ्यांना आतापर्यंत चौकशीची साडेसाती लागली आहे. अशात आपलं कर्तव्य बजावणं सोडून दमदाटी करत सुटणं खपवून घेतलं जाणार नाही, असा संदेश या कारवाईतून ‘दादांनी’ दिला आहे. त्यामुळं भंडाऱ्यात कुणी कितीही दावा करीत असलं तरी चलती कोणाची आहे, याचा स्पष्ट संदेश प्रशासनातील सगळ्यांमध्ये गेला आहे.
Bhandara Municipal Council : अखेर करण चव्हाण यांची भंडारातून बदली
भोंडेकरांना पाठिंबा नाही
पोलिसांच्या या कारवाईनंतर तेली समाजाने एक पत्र काढले आहे. त्यात आमदार नरेंद्र भोंडेकर यांच्या डॉ. अश्विनी भोंडेकर यांना पाठिंबा नसल्याचं जाहीर करण्यात आलं आहे. तेली समाजाच्या नावानं एक पत्र सोशल मीडियावर व्हायरल झालं आहे. त्याचा खुलासा करण्यात आला आहे. तेली समाज पंच कमेटीचे अध्यक्ष बाळाकृष्ण सेलोकर, सचिव अशेाक निमकर यांच्या स्वाक्षरीचं हे पत्र व्हायरल झाल्यानं शिवसेना एकना शिंदे गटाच्या अडचणीत वाढ झाली आहे. भोंडेकर यांच्या पत्नी नगराध्यक्ष पदाची निवडणूक लढत आहेत, हे उल्लेखनीय.
