भंडारा जिल्ह्यात गेल्या अनेक महिन्यांपासून गाजत असलेल्या भ्रष्टाचार प्रकरणी आणखी एक घडामोड घडली आहे.
जल पर्यटनातून भ्रष्टाचाराचे पाणी मुरविणाऱ्या श्रीआर्या कन्स्ट्रक्शन आणि श्रीहन इन्फ्रास्ट्रक्चर प्रायव्हेट लिमिटेडला मोठा धक्का बसला आहे. भंडाऱ्यात सध्या या कंपनीकडून जल पर्यटनाचे काम करण्यात येत होते.
या कामाला तत्काळ थांबविण्याचे आदेश देण्यात आले आहेत. भंडारा नगर परिषदेचे मुख्याधिकारी जुम्मा प्यारेवाले यांनी हे आदेश दिले आहेत. योग्य ती परवानगी घेण्यात आली नसल्याने हे काम थांबविण्यात येत असल्याचं प्यारेवाले यांनी दोन्ही कंपनीला दिलेल्या पत्रात नमूद केले आहे.
यासंदर्भात माजी मंत्री आमदार डॉ. परिणय फुके यांनी मुख्यमंत्री देवेंद्र फडणवीस यांच्याकडे तक्रार केली होती. फुके यांचे पत्र मिळताच मुख्यमंत्री फडणवीस यांनी जिल्हाधिकाऱ्यांना कारवाईचे आदेश दिले होत. याप्रकरणी यापूर्वीच भंडाऱ्याचे तत्कालीन मुख्याधिकारी करण चव्हाण यांची बदली करण्यात आली आहे.
शिवसेना उद्धव बाळासाहेब ठाकरे पक्षाचे जिल्हा प्रमुख संजय रेहपाडे यांनी तक्रार केली होती. रेहपाडे यांनी मुख्यमंत्री देवेंद्र फडणवीस यांना ही तक्रार पाठवली होती. त्यानंतर 15 नोव्हेंबर 2025 रोजी आमदार डॉ. फुके यांनी याप्रकरणी मुख्यमंत्री देवेंद्र फडणवीस यांना पत्र लिहिले.
निर्विवाद वर्चस्व
भंडारा-गोंदिया जिल्ह्यातील राजकारणात आमदार डॉ. परिणय फुके यांचं निर्विवाद वर्चस्व असल्याचं पुन्हा एका यातून सिद्ध झालं आहे. मुख्यमंत्री देवेंद्र फडणवीस डॉ. फुके यांचा शब्द खाली जाऊ देत नाहीत, हेच जल पर्यटनाची कामं थांबविण्यात आल्याच्या घटनेवरून सिद्ध होत आहे.
आर्या कन्स्ट्रक्शन, श्रीहन इन्फ्रास्ट्रक्चर या दोन कंपन्यांनी संगनमत करून कोट्यवधी रुपयांचा घोळ केल्याचा आरोप आहे. दलित वस्ती व नागरी सुविधा-सेवा निधीतील हा भ्रष्टाचार आहे. अधिकारी आणि काही राजकीय मंडळींनी हा भ्रष्टाचार केला आहे. यातील प्रत्येक दोषी आता जेलमध्ये जाऊ शकतो, अशी स्थिती आहे. त्यामुळं भंडाऱ्यातील या भ्रष्टाचाराचा आता सोक्षमोक्ष होणार आहे.
भंडारा शहरात उघडकीस आलेल्या या भ्रष्टाचारामागे वेगळाच मास्टरमाइंड आहे. याची चर्चा प्रशासन आणि राजकीय वर्तुळात आहे. सद्य:स्थितीत कारवाई, चौकशीचा फेरा केवळ अधिकाऱ्यांपुरता आहे. मात्र अधिकाऱ्यांना प्याद्यांसारखे हलविणारा ‘वजीर’ही लवकरच टिपला जाणार असल्याचं ठामपणे बोललं जात आहे.
भंडाऱ्यातील राजकीय वर्तुळात सध्या हा ‘वजीर’ आपलं वर्चस्व दाखविण्यासाठी धडपड करीत आहे. मात्र आपल्याच पक्षातून त्याचा विरोध सुरू झाला आहे. पदोपदी या वजीराला करा ‘राजा’ शह आणि मात देत आहे. त्यावरून वजीराची आगामी काळात चौफेर कोंडी होणार यात दुमतच नाही.
