भंडारा जिल्ह्याच्या विकासासाठी सतत आग्रही असणारे आमदार म्हणजे डॉ. परिणय फुके. त्यांनी जाहीर सभेत मुख्यमंत्र्यांकडे एक मागणी केली. मात्र मुख्यमंत्र्यांनी त्यांना भरभरून देण्याचा शब्द दिला.
भंडारा जिल्ह्याच्या विकासासाठी माजी मंत्री आमदार डॉ. परिणय फुके सतत आग्रही असतात. भंडाऱ्यात निवडणूक प्रचारासाठी देवेंद्र फडणवीस यांनी जाहीर सभा घेतली. सभेत आमदार डॉ. फुके यांनी एका मुद्द्याची मागणी मुख्यमंत्र्यांकडे मागणी केली. मात्र फडणवीस यांनी डॉ. फुके यांना भरभरून देणार असल्याच शब्दच देऊन टाकला. त्यामुळं सभेत फडणवीस-फुके यांचा जयजयकार झाला.
सिंधी समाजाच्या हक्कांसाठी आमदार डॉ. परिणय फुके यांनी मुख्यमंत्री देवेंद्र फडणवीस यांच्यासमोर शब्द टाकला. डॉ. फुके यांनी शब्द टाकताच आपल्य संबोधनात मुख्यमंत्र्यांनी त्यांना शब्द देऊन टाकला. सिंधी समाजाचे प्रश्न सुटतील. जमिनीच्या पट्ट्यांचे मालकी हक्क त्यांना मिळतील. इतकेच नव्हे तर महामार्गाची ‘समृद्धी’ देखील देणार असल्याचे फडणवीस म्हणाले. गडचिरोलीचा कायापालट होत आहे.
विकासाची हमी
गडचिरोलीत होत असलेल्या उद्योगाचा लाभ भंडाऱ्याला देऊ. गडचिरोच्या औद्योगिक विकासाचा लाभ भंडाराला दिल्याशिवाय स्वस्थ बसणार नाही. त्यामुळे डॉ. फुके यांनी मांडलेला विकासाचा प्रत्येक मुद्दा पूर्ण केला जाईल. भाजपचे नगराध्यक्ष निवडून द्या. भंडारा जिल्ह्याचा विकास तुमचा देवाभाऊ आणि फुके करतील अशी ग्वाही देखील मुख्यमंत्री देवेंद्र फडणवीस यांनी जाहीर सभेतून मतदारांना दिली.
मुख्यमंत्री देवेंद्र फडणवीस म्हणाले, भंडारा जिल्ह्यातील ज्या मैदानावर सभा होत आहे, ते ऐतिहासिक आहे. या मैदानावर डॉ. बाबासाहेब आंबेडकर यांनी निवडणूक सभा घेतली होती. त्याच निवडणुकीत काँग्रेसनं बाबासाहेबांना पराभूत केलं. त्यामुळं काँग्रेसनं आजपर्यंत काय केलं हे विसरून चालणार नाही. त्यामुळे त्याच मैदानावरून विजयाचा संकल्प करायला पाहिजे. परिवर्तनाचा संकल्प केला पाहिजे.
प्रत्येक शहराच्या विकासाचा आराखडा आपल्याकडे तयार आहे. महायुतीचं सरकार कोणत्या शहराचा कसा विकास करेल हे ठरलं आहे. त्यामुळं यंदाच्या निवडणुकीत आपण कोणावरही टीका केलेली नाही. टीका करण्याची गरजही भासणार नाही. ज्यांच्याकडे विकासचा दृष्टीकोन असतो, त्यांना टीका करावी लागत नाही. आता ग्रामीण भागाच्या तुलनेत शहरांचाही वेगाने विकास होत आहे, असंही फडणवीस म्हणाले.
गडकरींचा मंत्र
फडणवीस यांनी केंद्रीय मंत्री नितीन गडकरी यांचा भाषणात उल्लेख केला. ते म्हणाले की गडकरी नेहमी एक मुद्दा सांगतात. कोणताही गोष्ट विनाकामाची नाही. प्रत्येक गोष्टीत काही ना काही मूल्य असते. ‘नथिंग इज वेस्ट. एव्हरीथिंग इज वेल्थ.’ गडकरी हे सांगतात ते खरं आहे, असं फडणवीस म्हणाले. भंडाऱ्यातील प्रत्येक वेस्टला वेल्थ करायचं आहे, असं त्यांनी नमूद केलं.
भंडारा जिल्ह्यातील सगळे अतिक्रमण नियमित करण्यात येणार आहेत. अनेकांना मालकी हक्काचे पट्टे देण्यात येणार आहेत. यासंदर्भातील निर्णय झालेला आहे. कोणत्याही नागरिकावर अन्याय होणार नाही. मालकी हक्काचे पट्टे सगळ्यांना मिळतील. झुडपी जंगलावर अनेक लोक राहतात. त्यांनाही जमीन आणि घरकूल मिळणार असल्याचे फडणवीस म्हणाले. सगळ्यांना त्यांचे हक्क मिळतील, अशी ग्वाही देखील फडणवीस यांनी दिली.
