लोकसभा निवडणुकीनंतर रविकांत तुपकर यांनी स्थानिक स्वराज्य संस्था निवडणूक मैदानात उतरण्याचा निर्णय घेतला आहे.
शेतकरी नेते रविकांत तुपकर आता पुढील लढाईसाठी सज्ज झाले आहेत. बुलढाणा शहरातील एका बैठकीत त्यांनी क्रांतिकारी शेतकरी संघटनेची नवी दिशा जाहीर केली. बैठकीत कार्यकर्त्यांना संबोधित करताना तुपकरांनी जिल्हा परिषद, पंचायत समिती निवडणुकीसाठी शंखनाद केला. राज्यात सध्या नगर परिषद, नगर पंचायत निवडणूक सुरू आहे. त्यानंतर लगेचच जिल्हा परिषद, पंचायत समिती निवडणूक होऊ शकते. यासाठी तुपकर आणि त्यांचे सहकारी निवडणूक मैदानात उतरणार आहेत.
शेतकरी प्रश्न, संघटनेची भूमिका, आगामी आंदोलन आणि निवडणुकीची तयारी याबाबत बैठकीत विचारमंथन करण्यात आलं. तुपकर म्हणाले की, शेतकऱ्यांचे प्रश्न अद्यापही दुर्लक्षित आहेत. सोयाबीन, कापसासारख्या पिकांना योग्य भाव नाही. वन्यप्राण्यांचा त्रास कायम आहे. प्राण्यांच्या त्रासामुळे शेतकरी अस्वस्थ आहे. शेतकऱ्यांच्या या वेदना संपवण्यासाठी लढा सुरू आहे. पुढेही तितक्याच ताकदीने लढत राहायचे आहे.
Ravikant Tupkar : निवडणूक आयोगाचा कारभार म्हणजे लोकशाहीवर हल्ला
वेदना कळल्या
तुपकर म्हणाले की, महाराष्ट्रातील सर्व शेतकऱ्यांना एकत्र करावे लागेल. त्यातून नवी शेतकरी चळवळ उभी करायची आहे. दिवंगत शरद जोशी यांच्या विचारांची प्रेरणा आहे. या विचारांमुळे आपण चळवळीत आलो. त्यांची पुस्तकं वाचून शेतकऱ्यांच्या गरिबीची खरी कारणं कळली. सरकारची धोरणंच शेतकऱ्यांच्या गरीबीचं मुळं आहे. सरकारचे धोरण म्हणजे शेतकऱ्यांचे मरण आहे.
लोकसभा निवडणुकीत पराभव झाला. तरी आपण शेतकऱ्यांची एकता मजबूत करण्यात यशस्वी झालो आहोत. कार्यकर्त्यांच्या परिश्रमामुळे अडीच लाख लोकांना एकत्र आणता आलं. हा पराभव नसून शेतकरी चळवळीचा पाया आहे. केंद्रीय राज्यमंत्री प्रतापराव जाधव यांच्यावर रविकांत तुपकर यांची सडकून टीका केली. जाधव पदाचा दुरुपयोग करीत आहेत. आपल्यावर व कार्यकर्त्यांवर खोट्या केसेस करत आहेत, असं तुपकर म्हणाले.
सुडाचं राजकारण
‘क्रांतिकारी’चे जिल्हाध्यक्ष ज्ञानेश्वर टाले यांना तडीपार करण्यात आलं. प्रशासनावर दबाव टाकला जात आहे. शेतकरी चळवळ संपविण्याचा प्रयत्न जाधव करत आहेत. शेतकरी चळवळ कधीही संपणार नाही. प्रतापराव जाधव यांचा निवडणुकीचा खर्च 100 कोटी रुपये होता. पैशांचा माज आम्हाला दाखवू नका, असं तुपकर यांनी सांगितलं.
आम्ही सर्वसामान्य शेतकरी आहोत. आम्ही कुणाला घाबरत नाही. कितीही खोट्या केसेस केल्या, तरी घाबरणार नाही. कार्यकर्त्यांना तडीपरी केलं. पण विचारधारा तडीपार करता येणार नाही. गरज पडली तर दिल्लीतही आंदोलन करायला तयार आहोत. क्रांतिकारी शेतकरी संघटना आगामी जिल्हा परिषद आणि पंचायत समिती निवडणूक लढेल. त्यातूप पद मिळवणं महत्त्वाचे नाही, असंही तुपकर यांनी स्पष्ट केलं.
निवडणुकीचं कारण
निवडणूक लढत पद मिळवणं हा हेतू नाही. पदाला न्याय देणं महत्त्वाचं आहे. आपण जन्माला आलो तेव्हा आपले हात स्वच्छ होते. ते हात तसेच स्वच्छा ठेवायचे आहेत. आपल्यावर कोणताही डाग नको. संघटनेचे जाळे गावोगावी, घराघरांत पोहोचवायचे आहे. त्यासाठी लवकरच कार्यकारिणीचा विस्तार केला जाईल, असं रविकांत तुपकर यांनी स्पष्ट केलं. नागपूरमध्ये झालेल्या आंदोलनाचा उल्लेखही त्यांनी केला.
नागपुरातील आंदोलनामुळे सरकारकडून तारीख मिळाली. मात्र शेतकऱ्यांचे प्रश्न सुटले नाहीत. त्यामुळे पुन्हा एकदा आंदोलनाचे हत्यार काढावे लागेल. मोठे आंदोलन उभारावे लागेल. त्यातून सरकारवर दबाव आणावा लागेल. वन्यजीवांना प्रश्न निकाली काढावा लागेले. पिकांना हमीभावासाठी संघर्ष करावा लागेले. कर्जमाफी करून घ्यावी लागेले. पिकविम्याच्या मुद्द्यावर आक्रमक व्हावं लागेल, असं तुपकर यांनी स्पष्ट केलं.
