बुलढाणा जिल्ह्यातील लोणार सरोवर जगप्रसिद्ध आहे. तर या स्थळाकडे पर्यटकांना आकर्षित करण्यासाठी मंत्री शंभूराज देसाई यांनी मोठी घोषणा केली आहे.
जगप्रसिद्ध लोणार सरोवराच्या नैसर्गिक आणि ऐतिहासिक महत्त्वाला ग्लोबल स्तरावर अधिकाधिक प्रसिद्धी मिळावी, तसेच स्थानिक आणि आंतरराष्ट्रीय पर्यटकांना आकर्षित करण्यासाठी महाराष्ट्र सरकारने मोठी घोषणा केली आहे. राज्याचे पर्यटन मंत्री शंभूराज देसाई यांनी ‘लोणार पर्यटन महोत्सव’ सुरू करण्याचा निर्णय घेतला असून, यावर्षीपासून हा महोत्सव भव्य प्रमाणावर साजरा केला जाणार आहे.
सुमारे 50 हजार वर्षांपूर्वी उल्कापाताने तयार झालेले लोणार सरोवर हे जगातील मोजक्या खाऱ्या आणि क्षारयुक्त सरोवरांपैकी एक आहे. जैवविविधता, ऐतिहासिक संदर्भ आणि वैज्ञानिक संशोधनासाठी महत्त्वाचे असलेले हे ठिकाण अनेक वर्षांपासून पर्यटक आणि अभ्यासकांचे आकर्षण राहिले आहे.
मुख्यमंत्री Devendra Fadnavis यांच्यावर हक्कभंग गुन्हा दाखल करणार
पर्यटनाला चालना देण्यासाठी नवा उपक्रम
पर्यटन मंत्री शंभूराज देसाई यांनी बुलढाण्यात आयोजित बैठकीत या पर्यटन महोत्सवाच्या आयोजनाबाबत माहिती दिली. देसाई यांनी सांगितले की, “लोणार सरोवर हे महाराष्ट्राच्या नावलौकिकात महत्त्वाची भूमिका बजावते. त्यामुळे त्याच्या पर्यटन विकासासाठी महोत्सवाचे आयोजन करण्यात येणार आहे. यामुळे स्थानिक अर्थव्यवस्थेला मोठी चालना मिळेल आणि देशविदेशातील पर्यटकांना लोणारचे सौंदर्य आणि महत्त्व अधिक चांगल्या प्रकारे समजेल.”
या पर्यटन महोत्सवात विविध सांस्कृतिक आणि साहसी उपक्रमांचे आयोजन करण्यात येणार आहे. त्यामध्ये लोणार सरोवराच्या ऐतिहासिक आणि वैज्ञानिक प्रवासाचा थरारक अनुभव दाखविला जाईल. तज्ज्ञांच्या मार्गदर्शनाखाली लोणार सरोवर, दौलताबाद किल्ला, सिद्धेश्वर मंदिर यांसारख्या ऐतिहासिक ठिकाणांची सफर करून माहिती देण्यात येईल. लोकनृत्य, गाणी, स्थानिक कला यांचा जल्लोष. निसर्गप्रेमींसाठी विशेष जंगल ट्रेक आणि साहसी उपक्रम तयार करण्यात येतील. मराठमोळ्या पदार्थांचा स्वाद आणि स्थानिक कलाकारांच्या कलाकृतींची प्रदर्शनी आयोजित करण्यात येतील.
प्रस्ताव येतात, प्रस्ताव जातात; Nagpur Corporation झोपतच राहतात
स्थानिक अर्थव्यवस्थेला फायदा
हा महोत्सव स्थानिक नागरिकांसाठी सुवर्णसंधी ठरणार आहे. हॉटेल्स, होम-स्टे, गाईड सेवा, वाहतूक व्यवस्था यामुळे स्थानिक रोजगार वाढेल. याशिवाय, लोणारचे खास पदार्थ, हस्तकला, आणि पारंपरिक वस्त्र विक्रीसाठी उत्तम संधी निर्माण होईल.
राज्य सरकारने लोणार पर्यटनाला चालना देण्यासाठी विविध योजनांचा आराखडा तयार केला आहे. यामध्ये पर्यटन सुविधा सुधारण्यासाठी निधी वाटप होईल. पर्यटकांसाठी उत्तम वाहतूक आणि निवास व्यवस्था निर्माण करण्यात येईल. सरोवरच्या संवर्धनासाठी विशेष प्रकल्प आखले जातील.
शास्त्रज्ञ, निसर्गप्रेमींसाठी पर्वणी
लोणार सरोवराच्या पाण्यातील अनोख्या जैवविविधतेचा अभ्यास करण्यासाठी जगभरातील वैज्ञानिक येथे येतात. भविष्यात येथे वैज्ञानिक संशोधन केंद्र स्थापन करण्याचाही सरकारचा विचार आहे. त्यामुळे हा महोत्सव केवळ पर्यटनापुरता मर्यादित न राहता वैज्ञानिक दृष्टिकोनातूनही महत्त्वपूर्ण ठरणार आहे.
‘लोणार पर्यटन महोत्सव’मुळे महाराष्ट्राच्या पर्यटन नकाशावर नव्या पर्वाची सुरुवात होणार आहे. यामुळे लोणार सरोवराची जागतिक ओळख अधिक दृढ होईल आणि इथले सौंदर्य अनुभवण्यासाठी लाखो पर्यटक या ठिकाणी आकर्षित होतील.
