आक्रमक आमदार जितेंद्र आव्हाड यांनी अमेरिकेच्या वंशवादी धोरणांवर तिखट शब्दांत हल्ला चढवत मोदी सरकारवर जोरदार टीका केली. अमेरिका आपला बाप नाही, या घोषणेसह त्यांनी भारतीय नागरिकांच्या हक्कांसाठी सरकारला कठोर भूमिका घेण्याचे आवाहन केले.
महाराष्ट्राच्या विधिमंडळाच्या अर्थसंकल्पीय अधिवेशनाच्या पहिल्याच दिवशी राष्ट्रवादी काँग्रेसचे आक्रमक आमदार जितेंद्र आव्हाड हातात बेड्या घालून विधान भवनात पोहोचले. हे दृश्य पाहताच संपूर्ण माध्यमांचा कॅमेरा त्यांच्यावर रोखला गेला. या आंदोलनाचा रोख केवळ राज्य सरकारवर नव्हता, तर थेट अमेरिकेच्या धोरणांवर होता.
आव्हाडांनी अमेरिकेवर तिखट शब्दांत टीका करत म्हटले की, अमेरिकेने भारतीय नागरिकांवर जो अन्याय सुरू केला आहे, त्याला प्रत्युत्तर देण्यासाठी भारताने कठोर भूमिका घ्यायला हवी. अमेरिकेच्या वंशवादी धोरणांमुळे अनेक भारतीय कुटुंब उद्ध्वस्त होत आहेत. ट्रम्प प्रशासनाने आखलेल्या कठोर धोरणांमुळे हजारो भारतीय नागरिकांना देशाबाहेर हुसकावले जात आहे.
आव्हाडांचे कडवट शब्द
भारतीयांना विमानात कोंबून पाठवले जात आहे, त्यांचे पाय साखळदंडात अडकवले जात आहेत, हातात बेड्या घातल्या जात आहेत, शौचालयालाही जाण्यास परवानगी दिली जात नाही, उपाशी पोटी भारतात फेकले जात आहे. हा प्रकार अमानुष आणि लाजिरवाणा आहे. भारत सरकार अमेरिकेपुढे गुडघे टेकले असून अमेरिकेच्या धोरणांचा विरोध करण्याऐवजी शांतपणे तमाशा पाहत आहे. सरकार भारतीयांच्या अब्रूचे लिलाव करत आहे. आपल्या लोकांना अमानुष वागणूक मिळत असताना सरकारकडून कोणतीही ठोस भूमिका घेतली जात नाही.
भारत आजही गुलामगिरीत
जितेंद्र आव्हाड यांनी थेट भारत सरकारलाही धारेवर धरले. मोदी सरकार अमेरिकेसमोर हात जोडून उभे आहे. अमेरिकेचे धोरण भारतीय नागरिकांना वंशभेदी अत्याचार सहन करण्यास भाग पाडत असतानाही केंद्र सरकार हसतमुखाने अमेरिकेच्या पुढाऱ्यांसोबत फोटोसेशन करत आहे. अमेरिकेच्या विरोधात आवाज उठवला नाही, तर भविष्यात हे धोरण आणखी कठोर होईल. हुशार आणि कष्टाळू भारतीय तरुणांना अमेरिकेने बाहेर फेकले आहे, पण त्यांचे भवितव्य सुरक्षित करण्यासाठी सरकारकडे कोणताही ठोस प्लॅन नाही. घोषणाबाजी आणि खोट्या राष्ट्रभक्तीच्या नावाखाली सामान्य लोकांना फसवले जात आहे.
भारतीयांचा अपमान
भारतीय नागरिकांना अमेरिकेत हिणवलं जात आहे, त्यांची स्वप्ने उद्ध्वस्त केली जात आहेत. मेहनतीच्या जोरावर भारतीयांनी अमेरिकेत स्थिरता मिळवली, पण आता त्यांच्या गरजा संपल्यानंतर त्यांना बाहेर फेकले जात आहे. भारत सरकार अमेरिकेचे गुलाम असल्यासारखी भूमिका घेत आहे. भारतीय नागरिकांना अमेरिकेतून हुसकावले जात आहे, तरीही सरकार गप्प आहे. आपल्या लोकांना वाचवण्यासाठी कोणताही प्रयत्न होत नाही. या धोरणाचा फटका अनेक कुटुंबांना बसला आहे.
जागे होण्याचे आवाहन
भारतीय नागरिकांचा अमेरिकेत होणारा अपमान सहन केला जाणार नाही. भारताने अमेरिका आणि तिच्या मनमानी धोरणांविरोधात कठोर पाऊल उचलण्याची वेळ आली आहे. सरकारच्या निष्क्रियतेमुळे पुढच्या पिढ्यांना मोठ्या अडचणींचा सामना करावा लागेल.लोकांनी अमेरिकेच्या विरोधात बोलायची भीती बाळगू नये. सरकारच्या पोकळ आश्वासनांना बळी पडू नये. या गुलामगिरीला विरोध करण्यासाठी आता ठोस पावले उचलणे गरजेचे आहे. अन्यथा, भावी पिढ्यांना देश सोडून जायला भाग पाडले जाईल.
राजकीय खळबळ
जितेंद्र आव्हाड यांच्या या आक्रमक भूमिकेमुळे राजकीय वर्तुळात खळबळ माजली आहे. केंद्र सरकारने या टीकेला काय उत्तर द्यायचे, याकडे सगळ्यांचे लक्ष लागले आहे. अमेरिकेतील भारतीय नागरिकांना न्याय मिळवून देण्यासाठी सरकार कोणते पाऊल उचलणार, हे पाहणे महत्त्वाचे ठरणार आहे.
