अमरावती शहरात मोठ्या प्रमाणावर बेकायदेशीर बांगलादेशी स्थलांतरित सक्रिय असल्याचा आरोप भाजप संसद अनिल बोंडे यांनी केला आहे.
22 एप्रिल 2025 रोजी जम्मू-काश्मीरमधील पहलगाम येथे झालेल्या दहशतवादी हल्ल्याने संपूर्ण देश हादरला. या हल्ल्याने एक धक्कादायक सत्य उघडकीस आणले. ते म्हणजे भारतात मोठ्या संख्येने बेकायदेशीर बांगलादेशी नागरिक वास्तव्यास आहेत. विशेषतः महाराष्ट्रात या घुसखोरांची संख्या लक्षणीय आहे. यामुळे स्थानिक प्रशासन आणि पोलिस यंत्रणा सतर्क झाल्या आहेत. या पार्श्वभूमीवर, अमरावती जिल्ह्यातील परिस्थितीने पुन्हा एकदा सर्वांचे लक्ष वेधले आहे. भाजपचे खासदार अनिल बोंडे यांनी अमरावती शहरात बेकायदेशीर बांगलादेशी घुसखोरांचा मोठ्या प्रमाणात सुळसुळाट असल्याचा गंभीर आरोप केला आहे.
बोंडे यांनी स्वतः रहाटगावजवळील रस्त्यावर उतरून वाहनांची तपासणी केली आणि संशयितांना पोलिसांच्या स्वाधीन केले. खासदार अनिल बोंडे यांनी नागपूर महामार्गावरून सिटीलँड आणि बिझीलँड या व्यावसायिक संकुलांमध्ये कामाला जाणाऱ्या काही संशयितांना ताब्यात घेतले. त्यांनी असा दावा केला की, हे बेकायदेशीर स्थलांतरित शहरातील गुन्हेगारीला खतपाणी घालत आहेत. अमरावतीत बेकायदेशीर बांगलादेशींची संख्या झपाट्याने वाढत आहे. यामुळे कायदा आणि सुव्यवस्थेचा प्रश्न तर आहेच. पण राष्ट्रीय सुरक्षेलाही धोका निर्माण होऊ शकतो, असे त्यांनी ठणकावून सांगितले. त्यांच्या या पाऊलामुळे स्थानिक पोलिस आणि प्रशासनावर कारवाईचा दबाव वाढला आहे.
NCP : काका पुतण्याची जुगलबंदी रंगली, राजकीय मंचावर धमाल मचली
राष्ट्रीय सुरक्षेवर गंभीर परिणाम
खासदार अनिल बोंडेंनी या प्रकरणाची तातडीने चौकशी करून कठोर कारवाईची मागणी केली आहे. त्यांचे म्हणणे आहे की, बेकायदेशीर स्थलांतरितांचा प्रश्न केवळ स्थानिक गुन्हेगारीपुरता मर्यादित नाही, तर याचा थेट परिणाम देशाच्या अंतर्गत सुरक्षेवर होऊ शकतो. जर यावर वेळीच नियंत्रण ठेवले नाही, तर अमरावतीसाठी ही एक मोठी सामाजिक आणि सुरक्षाविषयक समस्या ठरू शकते, असा इशारा त्यांनी दिला. त्यांनी पोलिसांना या प्रकरणात तत्परतेने तपास करून दोषींवर कडक कारवाई करण्याचे आवाहन केले आहे. या घटनेने महाराष्ट्रातील बेकायदेशीर स्थलांतरितांचा प्रश्न पुन्हा एकदा चर्चेत आणला आहे.
पूर्वी भाजप नेते किरीट सोमय्या यांनी विदर्भात येऊन या समस्येकडे लक्ष वेधले होते. त्यांनी देखील अनेक ठिकाणी बेकायदेशीर बांगलादेशींवर कारवाई केली होती. त्यांची ही मोहीम अद्यापही सुरू असताना, अमरावतीतील हा नवीन प्रकार पुन्हा एकदा धक्कादायक ठरला आहे. पहलगाम हल्ल्यानंतर उघडकीस आलेली ही परिस्थिती आता केवळ स्थानिक पातळीवर न राहता राष्ट्रीय पातळीवर चर्चेचा विषय बनली आहे.अमरावतीतील या घडामोडींमुळे स्थानिक नागरिकांमध्येही चिंतेचे वातावरण आहे. बेकायदेशीर स्थलांतरितांचा वाढता प्रभाव हा केवळ अमरावतीपुरता मर्यादित नसून, संपूर्ण महाराष्ट्रात आणि देशभरात हा प्रश्न गंभीर बनत आहे.
प्रशासन आणि पोलिस यंत्रणांनी यावर तातडीने उपाययोजना करणे गरजेचे आहे. खासदार बोंडेंच्या आरोपांमुळे आता पोलिस यंत्रणा किती प्रभावीपणे कारवाई करते, याकडे सर्वांचे लक्ष लागले आहे.
