स्थानिक स्वराज्य संस्थांच्या निवडणुकीची रणधुमाळी रंगली आहे. अनेक नेत्यांच्या नगराध्यक्ष होण्याच्या स्वप्नाला नवे पंख फुटत आहेत. अशात भंडारा जिल्ह्यात एक नेता चांगलाच ओव्हर कॉन्फिडन्समध्ये दिसत आहे.
महाराष्ट्राच्या राजकीय वर्तुळात सध्या एक वेगळीच रणधुमाळी सुरू आहे. स्थानिक स्वराज्य संस्थांची निवडणूक जवळ येताच प्रत्येक पक्षाने कंबर कसली आहे. प्रभाग रचना झाल्यानंतर आरक्षण सोडत जाहीर झाली. अशात अर्ज न भरताच भंडारा जिल्ह्यातील एका गावात नेत्याने आपला राज्याभिषेक होणारच या ओव्हर कॉन्फिडन्समध्ये बॅनरबाजी सुरू केली आहे.
असाच ओव्हर कॉन्फिडन्समध्ये लोकसभा निवडणुकीत भाजपच्या नवनीत राणा यांना नडला होता. त्यांनी निकालाच्या आधीच विजयाचे पोस्टर गावभर लाऊन टाकले होते. मात्र यश काँग्रेसचे बळवंत वानखेडे यांना मिळाले. त्यामुळे नवनीत राणा यांचे चांगलेच हसू झाले होते. अशी चूक भंडारा जिल्ह्यातील एक नेता करत आहे. पदावर आपला अभिषेक झालाच म्हणून समजा, असे त्याला वाटत आहे. त्यामुळे उमेदवारी मिळणार की नाही याचा पत्ता नसतानाही या नेत्याने गावभर आपली पोस्टर पब्लिसिटी सुरू केली आहे.
आला उंट पहाडाखाली
भंडारा जिल्ह्यातील एका नगर परिषदेमध्ये आपलाच अभिषेक होणार हे ठामपणे सांगणाऱ्या नेत्याला त्याच्याच पक्षातून विरोध आहे. या नेत्याने विधानसभा निवडणुकीमध्ये उमेदवाराला पराभूत करण्यासाठी चांगलेच प्रयत्न केले. मात्र संबंधित उमेदवाराला यश मिळाले. नगरपरिषदेच्या निवडणुकीमध्ये आता हा नेता खिंडीत सापडला आहे.
तुमसर मध्ये उंट आयता पहाडाखाली आला आहे. त्यामुळे आपल्या गळ्यामध्ये पराभवाची माळ घालू पाहणाऱ्या या नेत्याचा दम संबंधित विजयी उमेदवार, आपल्या गमछाने घोटण्याचा प्रयत्न नक्कीच करणार आहे. तुमसरमध्ये आचारसंहिता जाहीर होण्यापूर्वीच रंगलेले पोस्टरवॉर सध्या चर्चेचा विषय ठरत आहे. मात्र उमेदवारी न मिळाल्यास हेच पोस्टर संबंधित नेत्याचे हसू होण्याचे कारण ठरू नये, अशी चर्चा आहे.
दादा हे काय?
महाराष्ट्राच्या राजकारणात ‘दादा’गिरी करणाऱ्या नेत्याच्या पक्षातील अंतर्गत कलह सर्वांना भंडाऱ्यात माहिती आहे. आपला राजकीय ‘अभी’षेक झालाच पाहिजे, यासाठी एक नेता प्रचंड तयारी करत आहे. मात्र त्याला ‘गुलाबी’ रुमाल रोखणार हे नक्की दिसत आहे. रुमालधारी नेत्याने आपल्या एका खास व्यक्तीला उमेदवारी मिळावी यासाठी चांगलाच जोर लावणे सुरू केले आहे.
एकाच पक्षातील दोन नेत्यांमधील अंतर्गत वाद इतका गंभीर आहे की, पक्षाच्या एकूण रणनीतीवर परिणाम होताना दिसेल. यात ‘दादांचे’ नुकसान होणार हे नक्की. या दोघांना ‘बावन बावन’ करायला लावण्याची तयारी तिसऱ्या एका नेत्याने केली आहे. हा नेता नगरपरिषद निवडणुकीत उभा राहण्याच्या तयारीत आहे. भंडारा जिल्ह्यातील तुमसरमध्ये विरोधी तर मोहाडीत सत्ताधारी नेता प्रबळ आहे. त्यामुळे विजयाचा अभिषेक करून घ्यायचा असल्यास ‘चरण’स्पर्श करण्याची वेळ येऊ शकते, असे बोलले जात आहे.
Pankaj Bhoyar : शिक्षण क्षेत्रातील रिक्तता संपविण्याचा संकल्प
या सर्व घडामोडींमध्ये एक गोष्ट स्पष्ट आहे की, महाराष्ट्रातील स्थानिक निवडणूक केवळ जागा जिंकण्यापुरत्या मर्यादित राहिलेल्या नाहीत. त्या आता व्यक्तिगत महत्वाकांक्षा, पक्षांतर्गत कलह आणि नवीन संधींच्या खेळात रूपांतरित झाल्या आहेत. तुमसरमध्ये नेत्यांच्या या ओढाताणीत कुणाला फायदा होणार हे रंजक ठरणार आहे.
