आरोपीच्या मृत्युचे प्रकरण अमरावती ग्रामीणमधील आठ पोलिसांच्या अंगलट आले आहे.
अमरावती ग्रामीण पोलिस दलात गाजत असलेल्या चांदूर रेल्वे येथील हत्येप्रकरणी कारवाईला सुरुवात झाली आहे. याप्रकरणी पोलिस अधीक्षक विशाल आनंद यांनी आठ जणांना निलंबित केले आहे. पकड वॉरंट असलेल्या एका आरोपीला अटक केल्यानंतर त्याचा मृत्यू झाला होता. याप्रकरणी न्यायालयीन चौकशी करण्यात आली होती. चौकशीतील अहवालाच्या आधारावर चांदूर रेल्वे पोलीस स्टेशनमधील आठ कर्मचाऱ्यांविरुद्ध गुन्हा नोंदविण्यात आला आहे.
चौकशीत आठही पोलिस दोषी आढळल्याने त्यांच्या विरोधात संगनमताने हत्येचा गुन्हा दाखल करण्यात आला आहे. गुन्हा दाखल झाल्याने सर्व आठ कर्मचाऱ्यांना सेवेतून निलंबित करण्यात आले आहे. याह सहाय्यक पोलिस उपनिरीक्षक (ASI) राजकुमार मुलामचंद जैन यांचाही समावेश आहे. पोलीस हवालदार विशाल मुकुंद रंगारी, महिला पोलीस शिपाई अश्विनी शामराव आखरे, सरिता वैद्य, पोलीस हवालदार प्रविण रामदास मेश्राम यांचाही निलंबित कर्मचाऱ्यांमध्ये समावेश आहे. पोलीस शिपाई अलीम हकीम गवळी, अमोल अमृत घोडे, पोलीस नाईक प्रशांत ढोके यांच्या विरोधातही निलंबन कारवाई करण्यात आली आहे.
Winter Assembly : नागपूर करार वाचवणार की निवडणुकीचा फटका बसणार?
चौकशीत ठपका
आरोपीच्या मृत्युप्रकरणी न्यायालयीन चौकशी करण्यात आली. चौकशी अहवालात अटकेत असलेल्या आरोपीच्या मृत्यूसाठी गार्ड इंचार्ज व गार्ड ड्युटीवर असलेल्या पोलीसांना जबाबदार धरण्यात आले आहे. आठही कर्मचाऱ्यांच्या कृतीमुळे अमरावती ग्रामीण पोलिसांची प्रतिमा मलीन झाल्याचा ठपका ठेवण्यात आला आहे. कर्मचाऱ्यांनी बेशिस्त वर्तन केले. कर्तव्यात निष्काळजीपणा दाखवला, असेही अहवालात स्पष्टपणे नमूद आहे. आठही कर्मचाऱ्यांना निलंबन कालावधीत अमरावती ग्रामीण पोलिस मुख्यालय येथे हजर राहावे लागणार आहे.
चांदूर रेल्वे पोलिस ठाण्याचे तत्कालीन पोलीस निरीक्षक अजय अहीरकर यांच्याविरोधातही कारवाई प्रस्तावित करण्यात आली आहे. पोलिस निरीक्षकांविरुद्ध कारवाईबाबत पोलिस दलातील वरिष्ठ अधिकाऱ्यांना लेखी अहवाल सादर करण्यात आल्याची माहिती अमरावती ग्रामीण पोलिस अधीक्षक कार्यालयाकडून देण्यात आली. नितेश मेश्राम याला अटक करण्यात आली होती. कोठडीत असताना नितेश फिट आल्याने कोसळला. जमिनीवर कोसळल्यामुळे नितेशचा उजवा खांदा निखळला. त्यामुळे त्याला उपचारासाठी चांदूर रेल्वे येथील ग्रामीण रुग्णालयात दाखल करण्यात आले.
Sanjay Gaikwad : मित्रपक्षाच्या आमदारानेच उघडलं निवडणूक आयोगाचं ‘पितळ’
ग्रामीण रुग्णालयातील डॉक्टरांनी नितेशला अमरावतीच्या जिल्हा सामान्य रुग्णालयात हलविण्याची सूचना पोलिसांना केली. पोलिसांनी नितेशला अमरावतीला आणत पहिले सत्र न्यायालयात नेले. त्यानंतर त्याला कारागृहात नेण्यात आले. कारागृहातील प्रक्रिया पूर्ण झाल्यानंतर नितेशला अमरावती शहरातील जिल्हा सामान्य रुग्णालयात दाखल करण्यात आले. मात्र उपचारादरम्यान दोन दिवसांनी नितेशचा मृत्यू झाला. अकोल्याच्या शासकीय वैद्यकीय महाविद्यालयात तीन डॉक्टरांच्या टीमने नितेशचे पोस्टमॉर्टम केले. पोलिस कोठडीत आरोपीचा मृत्यू झाल्याने नियमाप्रमाणे न्यायालयीन चौकशी सुरू करण्यात आली. चौकशी निरीक्षकांसह कर्मचारी दोषी आढळल्याने त्यांच्या विरोधात संगनमताने खुनाचा गुन्हा नोंदविण्यात आला.
