नागपूरच्या उत्तरेकडील झपाट्याने विस्तारत असलेल्या खापरखेडा परिसराला आता शहर पोलिसांची अधिकृत छाया मिळाली आहे. खापरखेडा पोलिस ठाण्याचा नागपूर शहर पोलिस आयुक्तालयात समावेश होऊन शहरातील ठाण्यांची संख्या आता 35 झाली आहे.
नागपूरच्या उत्तरेकडील क्षितिजावर एक नवा अध्याय सुरु झाला आहे. शहराचा विस्तार वेगाने झेपावत असतानाच आता खापरखेडा पोलिस ठाण्याला देखील नागपूर शहर पोलीस आयुक्तालयाच्या कुशीत स्थान मिळालं आहे. हा निर्णय म्हणजे केवळ प्रशासकीय फेरबदल नाही, तर नागपूरच्या सुरक्षा व्यवस्थेचा पुनर्गठन आहे. राज्य शासनाने दिलेल्या आदेशामुळे आता नागपूर शहरातील एकूण पोलिस ठाण्यांची संख्या 35 वर पोहोचली आहे.
राज्य गृहमंत्रालयाचे उप सचिव रा.ता. भालवणे यांनी 28 जुलै रोजी अधिकृत परिपत्रक जारी करत खापरखेडा पोलिस ठाण्याचा समावेश नागपूर शहर पोलीस आयुक्तालयात करण्याचा निर्णय जाहीर केला. या ठाण्याची नव्याने विभागणी परिमंडळ 6 अंतर्गत करण्यात आली असून, यामध्ये आधीपासून कलमना आणि पारडी पोलिस ठाण्यांचा समावेश आहे.
मोठा निर्णय
खापरखेडा परिसरात औष्णिक वीज निर्मिती केंद्र, खासगी कंपन्या व सरकारी यंत्रणांमधील कामगार मोठ्या संख्येने वास्तव्यास आहेत. त्यामुळे या परिसरात नागरी व औद्योगिक वाढ झपाट्याने होत असून, परिणामी गुन्हेगारी घटना आणि लोकवस्तीमध्येही वाढ होत आहे. याच पार्श्वभूमीवर खापरखेडा पोलिस ठाण्याला शहर पोलीस व्यवस्थेमध्ये सामावून घेण्याचा निर्णय घेण्यात आला.
या नव्या समावेशामुळे खापरखेडा पोलिस ठाण्याला शहर पोलिस दलातून ५६ पोलीस अधिकारी व अंमलदार दिले जाणार आहेत. यामध्ये निरीक्षक, उपनिरीक्षक, हवालदार, शिपाई यांचा समावेश असून, कार्यक्षमतेत लक्षणीय वाढ अपेक्षित आहे. सध्या वापरात असलेली खापरखेडा पोलिस ठाण्याची इमारत देखील शहर आयुक्तालयाच्या ताब्यात देण्यात येणार आहे.
Yashomati Thakur : पालकमंत्र्यांच्या दुर्लक्षतेमुळे घरकुल लाभार्थ्यांची कटकट वाढली
अडचणींवर होणार मात
पूर्वी खापरखेडा हा ग्रामीण पोलिसांच्या अधिपत्याखाली होता. त्यामुळे गुन्ह्यांच्या तपासात विभागीय मर्यादा अडथळा ठरत होती. परंतु आता शहर पोलीस आयुक्तालयांतर्गत समावेश झाल्याने त्या अडचणी दूर होणार असून, क्राईम मॅनेजमेंट अधिक सुसूत्र होणार आहे. स्थानिक गुन्ह्यांच्या जलद तपासाला चालना मिळेल, अशी प्रशासनाची अपेक्षा आहे.
हा निर्णय केवळ ठाण्यांच्या सीमारेषांपुरता मर्यादित नाही, तर तो नागपूर शहराच्या उत्तर दिशेने वाढणाऱ्या सुरक्षित आणि नियोजित विकासाचा मजबूत पाया आहे. आता खापरखेडा परिसरातील नागरिकांना शहर पोलीस सेवा अधिक जवळून मिळणार असून, कायदा व सुव्यवस्थेचा बळकटीकरण होणार आहे.
खापरखेडा पोलिस ठाण्याचा नागपूर शहरात समावेश ही एक दूरगामी आणि योजित कृती आहे. यामुळे उत्तर नागपूरमधील सुरक्षा यंत्रणा अधिक गतिमान होणार असून, नागपूर शहराचा भौगोलिक विस्तार आणखी बळकट होणार आहे. नागपूरचा हा नवा विस्तार म्हणजे केवळ भौगोलिक घडामोड नव्हे, तर सुरक्षिततेच्या दिशेने टाकलेलं एक ठोस पाऊल आहे.
