माजी मंत्री आमदार डॉ. परिणय फुके आणि चंद्रशेखर बावनकुळे यांच्या उपस्थितीत नागपूर जिल्ह्याच्या सर्वांगीण विकासासाठी महत्त्वपूर्ण बैठक पार पडली.
मुख्यमंत्री देवेंद्र फडणवीस यांचे गृहनगर असलेल्या नागपूर जिल्ह्याला विकासाच्या नव्या उंचीवर नेण्यासाठी महसूल मंत्री चंद्रशेखर बावनकुळे आणि भाजपचे माजी मंत्री आमदार डॉ. परिणय फुके यांनी जोमाने पुढाकार घेतला आहे. महसूल मंत्री चंद्रशेखर बावनकुळे आणि राज्यमंत्री आशिष जयस्वाल यांच्यासोबत एकत्र येत डॉ. फुके यांनी नागपूरच्या सर्वांगीण प्रगतीसाठी एक महत्त्वाकांक्षी पाऊल टाकले आहे. जिल्हाधिकारी कार्यालयातील नियोजन भवनात 18 ऑगस्ट रोजी झालेल्या नियोजन समितीच्या आढावा बैठकीत त्यांनी आपली दृष्टी आणि कृतीशीलता यांचा प्रत्यय आणला. या बैठकीत शहर आणि ग्रामीण भागातील अनेक महत्त्वाच्या मुद्यांवर सखोल चर्चा झाली, ज्यामध्ये बावनकुळे आणि डॉ. फुके यांनी आपल्या ठाम भूमिकेने सर्वांचे लक्ष वेधले. नागपूरच्या रस्त्यांवर बंद पडलेले तब्बल दोन हजार सीसीटीव्ही कॅमेरे, अपुऱ्या आरोग्य सुविधा, ग्रामीण भागातील शाळांची दुरवस्था आणि तीर्थक्षेत्रांचा विकास यांसारख्या मुद्यांवर त्यांनी ठोस उपाययोजना सुचवल्या.
Voting Fraud : निवडणूक आयोगाविरोधात काँग्रेसने उगारली महाभियोगाची तलवार
स्मार्ट नागपूर दृष्टिकोन
मुख्यमंत्री फडणवीस यांनी इंटेलिजेंट अँड इंटीग्रेटेड ट्रॅफिक मॅनेजमेंट सिस्टमसाठी 197 कोटी रुपये मंजूर केले. पण सीसीटीव्ही बंद असणे हे नागपूरसारख्या स्मार्ट शहराला शोभत नाही, असे सडेतोड मत त्यांनी व्यक्त केले. त्यांनी तातडीने यावर कार्यवाही करण्याची मागणी केली. जेणेकरून नागपूरकरांना सुरक्षित वातावरण मिळेल. महसूल मंत्र्यांनी आणि डॉ. फुके यांनी केवळ शहरी भागच नव्हे, तर ग्रामीण नागपूरच्या विकासावरही विशेष लक्ष केंद्रित केले. त्यांनी मोहपा, वडोदा आणि पाचगाव येथील नव्या पोलिस ठाण्यांना मंजुरी मिळाल्याची माहिती देत, यासाठी जागा आणि स्मार्ट पोलिस स्टेशन बांधण्याची गरज अधोरेखित केली. गुन्हेगारीवर नियंत्रण हा आपला प्राधान्याचा विषय आहे. यासाठी निधी आणि मनुष्यबळाची गरज आहे, असे ते म्हणाले. त्यांनी जिल्हा परिषद शाळांच्या दुरुस्तीसाठी आणि विद्यार्थ्यांना पुस्तके मिळण्यासाठी निधीची मागणी केली.
आजही हजारो विद्यार्थी पुस्तकांपासून वंचित आहेत. शिक्षण ही आपली प्राथमिकता असायला हवी, असे त्यांनी ठणकावून सांगितले. शहरातील प्रभागांमध्ये बेंचसारख्या मूलभूत सुविधा लावण्यासाठीही डॉ. फुके यांनी नियोजन समितीच्या माध्यमातून निधी उपलब्ध करून देण्याचा प्रस्ताव मांडला. नगरसेवक नसले तरी माजी नगरसेवकांना जबाबदारी देऊन आपण प्रभागांचा विकास साधू शकतो, अशी बावनकुळे यांची सूचना होती. याशिवाय, सावनेर तालुक्यातील कोच्छी धारणातून नरखेड, जलाल खेड्यापर्यंत पाणी नेण्याची योजना आणि वाळू घाटांवर सीसीटीव्ही बसवण्याची मागणी त्यांनी लावून धरली. विकास हा टप्प्याटप्प्याने होणार आहे. प्रत्येक तालुक्यासाठी स्वतंत्र विकास आराखडा तयार करूया, असे आवाहन त्यांनी केले. चंद्रशेखर बावनकुळे आणि डॉ. परिणय फुके यांच्या या कृतीशील दृष्टिकोनामुळे नागपूरच्या विकासाला नवी गती मिळणार आहे. दोघांच्या प्रत्येक सूचनेतून नागपूरकरांच्या हितासाठीची तळमळ आणि दूरदृष्टी दिसून येते. नागपूरला खऱ्या अर्थाने स्मार्ट आणि समृद्ध शहर बनवायचे आहे. यासाठी आपण सर्वांनी एकत्र येऊन काम करूया, असे आवाहनही त्यांनी केले.
