अकोला तालुक्यातील अतिवृष्टी आणि ढगफुटीमुळे शेतकऱ्यांचे प्रचंड नुकसान झाले असून जनजीवन विस्कळीत झाले आहे. या संकटावर तातडीने उपाययोजना करण्यासाठी आमदार रणधीर सावरकर यांनी प्रशासनाला कठोर निर्देश दिले आहेत.
अकोला तालुक्यात अतिवृष्टी आणि ढगफुटीच्या घटनांनी शेतकऱ्यांचे मोठे नुकसान केले आहे. शेतातील पिके पाण्याखाली गेली आहेत. रस्ते, नाले, पूल यांचे मोठ्या प्रमाणावर नुकसान झाले आहे. विजेचा पुरवठा खंडित झाला असून अनेक गावांमध्ये जनजीवन विस्कळीत झाले आहे. या गंभीर परिस्थितीत रोगराईचा प्रादुर्भाव रोखण्यासाठी आरोग्य विभागाने तातडीने उपाययोजना हाती घ्याव्यात, असे आदेश आमदार रणधीर सावरकर यांनी अधिकाऱ्यांना दिले.
तहसील कार्यालयात झालेल्या विशेष बैठकीत कृषी विभाग, महसूल विभाग, सार्वजनिक बांधकाम विभाग, वीज वितरण कंपनी तसेच पंचायत समितीच्या अधिकाऱ्यांची उपस्थिती होती. शेतकऱ्यांच्या भावना जाणून घेताना तसेच अधिकाऱ्यांच्या अडचणींचा आढावा घेताना आमदार सावरकर यांनी प्रशासनाला नुकसानभरपाई, रस्ते दुरुस्ती, वीजपुरवठा पुनर्संचयित करणे यासंदर्भात ठोस पावले उचलण्याचे आदेश दिले.
Chandrashekhar Bawankule : काँग्रेसच्या महाभियोगाची मागणी लोकांची दिशाभूल
पिकांचे नुकसान
अकोला तालुक्यातील आठ मंडळांमध्ये अतिवृष्टीमुळे 50 टक्क्यांपेक्षा अधिक शेतीचे नुकसान झाले आहे. घुसर, परसोबळे, दहिगाव गावंडे आणि कोलखेड जागीरसह अनेक गावांत पिकांचे मोठे नुकसान झाले आहे. याशिवाय जिल्ह्यातील इतर पाच तालुक्यांतही शेतीचे मोठे नुकसान झाल्याची नोंद झाली आहे. आमदार सावरकर यांनी तातडीने सर्वेक्षण करून अहवाल शासनाकडे पाठविण्याचे आदेश दिले आहेत. अनेक शेतकऱ्यांना अद्याप पीक विमा रकमेचा लाभ मिळालेला नाही. त्यामुळे शासनाकडे पाठपुरावा करून विम्याचे पैसे व नुकसानभरपाई त्वरित शेतकऱ्यांच्या हाती पोहोचविण्याचे निर्देश देण्यात आले.
अतिवृष्टीमुळे अनेक रस्ते उद्ध्वस्त झाले आहेत. वाहतुकीची मोठी गैरसोय निर्माण झाली आहे. सार्वजनिक बांधकाम विभागाला तातडीने प्रस्ताव तयार करून रस्त्यांची दुरुस्ती करण्याचे आदेश देण्यात आले आहेत. तसेच वीज खांब कोसळल्यामुळे वीजपुरवठा ठप्प झाला आहे. हे खांब तातडीने उभे करून वीज पुरवठा सुरळीत करावा, असे निर्देश आमदारांनी दिले. अकोला तालुक्यातील 44 हून अधिक घरे पावसामुळे कोसळली असून अनेक कुटुंब बेघर झाली आहेत. या कुटुंबांना तातडीने मदत आणि नुकसानभरपाई देण्याचे आदेशही दिले गेले.
Supreme Court : सहाच्या छायेत बहात्तर लाख मतांचा आरोप कोसळला
शासन तत्पर
बैठकीदरम्यान कृषी, महसूल, बांधकाम, वीज वितरण आणि पंचायत समितीतील अधिकारी उपस्थित होते. येत्या तीन दिवसांत सर्वेक्षणाची प्रक्रिया पूर्ण करून अहवाल शासनाकडे सादर करण्याचे आदेश दिले गेले आहेत. जिल्ह्याचे पालकमंत्री आकाश फुंडकर, खासदार अनुप धोत्रे, आमदार प्रकाश भारसाकले, हरीश पिंपळे व इतर लोकप्रतिनिधींशी चर्चा करून परिस्थितीवर तोडगा काढण्याची ग्वाही देण्यात आली आहे. आमदार रणधीर सावरकर यांनी ग्रामीण भागातील अडचणी समजून घेत शेतकऱ्यांच्या भावना जाणून घेतल्या. नैसर्गिक आपत्तीचा सामना प्रशासन व समाज मिळून करणार आहे. शेतकऱ्यांना शासनाकडून योग्य ती मदत दिली जाईल, यावर त्यांनी भर दिला.
