अकोला पश्चिम विधानसभा मतदारसंघात 15 हजारांची वाढ घेऊनही झालेल्या पराभवानंतर आगामी निवडणुकीपूर्वी भाजपला अकोल्यात व्यापक बदल गरजेचे झाले आहेत.
अकोल्याच्या भाजपमध्ये नेत्यांनी केलेल्या अपमानामुळं सच्चे कार्यकर्ते दिसेनासे झाले आहेत. अशात आगामी स्थानिक स्वराज्य संस्था निवडणुकीत मुख्यमंत्री देवेंद्र फडणवीस, माजी प्रदेशाध्यक्ष तथा महसूल मंत्री चंद्रशेखर बावनकुळे व विद्यमान प्रदेशाध्यक्ष रवींद्र चव्हाण यांनी अकोला भाजपच्या बाबत काही कठोर निर्णय घेणे काळाची गरज झाली आहे. कोणी कितीही नाकारत असले तरी काँग्रेसचे आमदार साजिद खान पठाण यांनी अकोल्यातील लोकप्रियता वाढत चालली आहे. भाजपमध्ये आता कोणतेही प्रामाणिक पदाधिकारी, कार्यकर्ते उरलेले नाहीत. केवळ काही चाटुगिरी करणाऱ्यांचा पदांची खैरात वाटण्यात येत आहे. त्यामुळे निष्ठावान कार्यकर्ते व आरएसएसचे स्वयंसेवकही नाराज आहे.
भाजपचे अकोल्यात अस्तित्व वाचवायचे असेल तर प्रदेश आणि जिल्हा कार्यकारिणीत व्यापक बदल आता गरजेचे झाले आहे. अकोला पूर्वचे आमदार रणधीर सावरकर यांच्याकडे पक्षातील दोन लाभाची पदं आहेत. सावरकर हे प्रदेश कार्यकारिणीवर आहेत. याशिवाय त्यांना विधिमंडळात प्रतोद पदही देण्यात आले आहे. अशा परिस्थितीत आमदार रणधीर सावरकर यांनी पक्षाच्या हितासाठी काही त्याग करणे नितांत गरजेचे आहे. एक व्यक्ती एक पद ही भाजपची शिस्त आहे. चंद्रशेखर बावनकुळे महसूल मंत्री झाल्यानंतर ते प्रदेशाध्यक्ष पदापासून दूर झाले. त्यांच्या जागेवर रवींद्र चव्हाण यांना नियुक्त करण्यात आले. हा बदल स्वत: बावनकुळे यांनी आनंदानं स्वीकारला. असाच मनाचा मोठेपणा आता आमदार रणधीर सावरकर यांनी दाखविणे गरजेचे आहे.
नव्यांना हवी संधी
आमदार रणधीर सावरकर हे पाटील समाजाचे प्रतिनिधीत्व करतात. अकोला जिल्ह्यात या समाजाचे प्राबल्य सर्वाधिक आहे. अलीकडेच त्यांच्याच परिवारातील अनुप धोत्रे हे खासदार झाले आहेत. पाटील समाजाच्या मताधिक्याचा विचार केल्यास सावरकर स्वत: नव्या चेहऱ्यांना पुढे येऊ देतील यात शंकाच नाही. कोणाबद्दलही मनात राग धरून ठेवणे किंवा पदासाठी इतरांसारखे पुढेपुढे करणाऱ्यांपैकी रणधीर सावरकर अजिबातच नाही. विधानसभा निवडणुकीत विजय झाल्यानंतर त्यांना मंत्रिपद मिळावे, अशी अनेकांची इच्छा होती. परंतु ते शक्य होऊ शकले नाही. त्यामागे अनेक कारणे असू शकतात. या विषयाचा बाऊ न करता सावरकर इमानेइतबारे अकोल्यात भारतीय जनता पार्टीच्या विस्तारासाठी दिवसरात्र एक करीत आहेत.
सावरकर यांच्या कार्यकाळात भारतीय जनता पार्टी अकोल्यात त्या स्थानावर गेली, जी आजपर्यंतच्या इतिहासात कधीच गेली नव्हती. त्यामुळंच त्यांना आता प्रतोद पद देण्यात आलं आहे. अशात सावरकर यांनी किंवा भाजपनं पाटील समाजाचा विचार खासदार अनुप धोत्रे, किशोर मांगटे पाटील किंवा मूर्तिजापूरचे आमदार हरीश पिंपळे यांचा प्रदेश कार्यकारिणीमध्ये महत्वाच्या पदावर विचार करणे काळाची गरज झाली आहे. खासदार अनुप धोत्रे हे युवा चेहरा आहे. कार्यकर्त्यांना कसे सांभाळायचे हे त्यांचा चांगलेच ठाऊक आहे. जमिनीवर पाय ठेऊन पक्षासाठी काम करणारा नेता म्हणून अनुप धोत्रे यांच्याकडे पाहिले जाते.
अनुप धोत्रे यांना प्रदेश कार्यकारिणीमध्ये घेऊत त्यांना संपूर्ण स्वतंत्रपणे निर्णय घेण्याचे आदेश भाजपने दिले तर अकोल्यातील पाटील समाजाला आनंद झाल्याशिवाय राहणार नाही. दुसरे नाव म्हणजे किशोर मांगटे पाटील. मांगटे हे भाजपच्या सगळ्यात जुन्या कार्यकर्त्यांपैकी एक आहेत. अकोल्यात जेव्हा भाजपचे काहीच अस्तित्व नव्हते तेव्हापासून किशोर मांगटे यांनी काम केले आहे. शेतकरी जसा शेतीची मशागत करून शिवार फुलवितो. अगदी त्याच पद्धतीने किशोर मांगटे पाटील यांनी संजय धोत्रे, पांडुरंग फुंडकर, गोवर्धन शर्मा यांच्या खांद्याला खांदा लावत भाजपला मोठे केले आहे. त्यांनाही प्रदेश कार्यकारिणी महत्वाचे पद देऊन भाजप त्यांच्या निष्ठेचे बक्षीस देऊ शकते.
पिंपळेही प्रामाणिक
पक्षातील ज्येष्ठत्वाचा विचार केला तर मूर्तिजापूरचे आमदार हरीश पिंपळे यांचे कामही मोठे आहे. विधानसभा निवडणुकीच्या वेळी त्यांची उमेदवारी सगळ्यात उशिरा जाहीर करण्यात आली. नितीन गडकरींचा समर्थक म्हणून त्यांना भाजपचे डिवचण्याचा प्रयत्न केला, असा अपप्रचार त्यावेळी झाला. हरीश पिंपळे हे देखील माणुसकी जपत कार्यकर्ता जोडणारा माणूस म्हणून ओळखले जातात. त्यांच्यावरही प्रदेश किंवा जिल्ह्याची संपूर्ण जबाबदारी दिल्यास पिंपळे यांच्या समाजाचा सन्मानच भाजपकडून होणार आहे.
अकोला पश्चिम विधानसभा मतदारसंघात अलीकडेच आमदार गोवर्धन शर्मा यांचे निधन झाले. सलग 30 वर्ष हा मतदारसंघ भाजपच्या ताब्यात होता. मात्र साजिद खान पठाण विजयी झाल्यामुळे या मतदारसंघात भाजपचे मट्टीपलीत झाले आहे. याच मतदारसंघातील मतांच्या आधारावर भाजपचे अकोला महानगरपालिका निवडणुकीतील भवितव्य ठरणार आहे. त्यामुळे अकोला महानगरराची जबाबदारी गोवर्धन शर्मा यांचे चिरंजीव अनुप शर्मा किंवा किशोर मांगटे पाटील यांच्याकडे संयुक्तपणे सोपविण्यात आल्यास अकोल्यात जादू होऊ शकते. त्यातून भाजपला अकोल्यातील हिंदी भाषिक मतदार, पाटील समाजातील मतदार आपल्याकडे आकर्षित करणे सोयीचे होईल.
किशोर मांगटे पाटील यांची काम करण्याची शैली थोडी आक्रमक आहे. ते स्पष्टवक्ते आहेत. मात्र आपल्या बोलण्यातून त्यांनी आजपर्यंत भाजपमध्ये किंवा भाजपच्या बाहेरही राजकीय वैरी तयार केलेले नाही. त्यामुळे भाजप शर्मा-पाटील या ‘कॉम्बो प्लान’चा विचारही करू शकते. अकोला जिल्ह्यातील दोन मतदारसंघात भाजपचा पराभव झाला आहे. बाळापूर आणि अकोला पश्चिम सध्या भाजपकडून गेला आहे. उर्वरित सर्व मतदारसंघ आणि अकोला महापालिका वाचविण्यासाठी भाजपला शर्थीचे प्रयत्न करावे लागणार आहेत. अशात भाजपच्या काही नेत्यांनी स्वत: पदाचा त्याग करून नवीन चेहऱ्यांना संधी देणे गरजेचे आहे. भारतीय जनता पार्टीनेही केवळ भावनेच्या आहारी न जाता पक्षाच्या हितासाठी मोठे निर्णय घेणे गरजेचे आहे.
संघाचाही समावेश
प्रदेश किंवा जिल्हास्तरावरील कार्यकारिणी नियुक्त करताना भाजपने राज्यात सर्वत्र एक आगळावेगळा प्रयोग राबवून पाहण्यास हरकत नाही, असे मत व्यक्त होत आहे. राष्ट्रीय स्वयंसेवक संघाच्या सच्च्या आणि निष्ठावान स्वयंसेवकांपैकी काहींना प्रदेश आणि जिल्हा कार्यकारिणीत स्थान द्यावे. महायुतीचे सरकार सत्तेवर आल्यानंतर मुख्यमंत्री देवेंद्र फडणवीस यांनी राज्याच्या इतिहासात मोठा धाडसी निर्णय घेतला. मंत्रिमंडळ स्थापन करताना नवीन प्रयोग त्यांना राबविला. तसाच धाडसी निर्णय देवाभाऊ यांनी प्रदेश आणि जिल्ह्यांची कार्यकारिणी तयार करतानाही घ्यावा, अशी अनेकांची इच्छा आहे.
मन मोठं करावं
विधानसभा निवडणुकीच्यावेळी अनेकांची नाराजी पुढे आली. हिंदू संस्कृतीत माफ करणाऱ्याचं मन मोठं असतं असं सांगितलं जातं. अकोल्यात निवडणुकीच्या वेळी जे काही घडलं असेल ते सगळं विसरून भाजपनं पुन्हा काही लोकांना सोबत घेणं गरजेचं आहे. यात माजी महापौर सुमन गावंडे, अश्विनी हातवळणे, माजी नगरसेवक सतीश ढगे, गिरीश गोखले, हरीश अलीमचंदानी, माजी आमदार नारायणराव गव्हाणकर अशी मोठी यादी सांगता येईल. कोणताही पक्ष म्हणजे केवळ बोटावर मोजण्याइतके चार ते पाच लोक नसतात. एकजुटीने काम करणाऱ्या समुहातून पक्ष तयार होत असतो. आतापर्यंत भाजपने स्थानिक नेत्यांपैकी अनेकांच्या हिशोबाने काम केले. त्याचा काय परिणाम झाला हे विधानसभा निवडणुकीत दिसले. त्यामुळे अकोल्यात भाजपचा बुरूज अभेद्य ठेवायचा असेल तर काही कठोर निर्णय पक्षाला घ्यावेच लागणार आहेत.
एखाद्या व्यक्तीला कोणताही आजार झाला तर डॉक्टर अत्यंत कडू औषध-गोळ्यांचा डोस देतो. कधीकधी वेदना देणारे इंजेक्शन, सलाइनही टोचतो. यामागे संबंधित रुग्णाला छळावे हा उद्देश डॉक्टरचा अजिबात नसतो. पेशंट वाचला पाहिजे हा प्रामाणिक हेतू असतो. सध्या अकोल्यातील भाजप व्हेंटिलेटरवर येत आहे. कोणी कितीही नाकारले तरी ‘ग्राऊंड रिएलिटी’ हिच आहे. त्यामुळे व्हेंटिलेटरवर जात असलेल्या पक्षाला वाचविण्यासाठी भाजपने डॉक्टरसारखी भूमिका घेणे काळाची गरज आहे. एक महापालिका गेल्याने किंवा एका विधानसभेत, एका लोकसभेत पराभव झाल्याने आमचे काहीच वाकडे होत नाही, असे म्हणणे भ्रम आहे. एका मतानेही एखाद्याचा पराभव होते. एक आमदार कमी पडल्यानेही सरकारला बहुमतासाठी इतरांच्या पाया पडावे लागते, ही वस्तुस्थिती नाकारून चालणार नाही. त्यामुळं आपल्याच पक्षाला वाढवायचे की संपवायचे हे भाजपलाच ठरवायचे आहे.
