अकोला पश्चिम विधानसभा मतदार संघाचे काँग्रेसचे आमदार साजिद खान पठाण यांनी भाजप कार्यकर्ते विजय संदलकर यांच्या कुटुंबाच्या दुर्दैवी प्रसंगात तत्काळ मदत केली.
महाराष्ट्राच्या राजकारणात भारतीय जनता पार्टी आणि काँग्रेस यांच्यातील कट्टर विरोधकत्व हे कुणापासूनही लपून राहिलेले नाही. साध्या-साध्या गोष्टींवरही हे पक्ष एकमेकांवर धाव घेऊन येतात, ताशेरे उडवतात आणि एकमेकांना घेरतात. त्यांच्या प्रत्येक हालचालीत एकमेकांना खाली पाडण्याचा, नेत्यांना फोडण्याचा कट असतो. परंतु अकोल्यात हे दृश्य आता बरेच वेगळे होत चालले आहे. भाजपचे नेते आता माणुसकीची जपेनासे झाले आहेत. याचा फायदा काँग्रेसचे आमदार साजिद खान पठाण यांना होत आहे.
विजय संदलकर नावाचे भारतीय जनता पार्टीचे कार्यकर्ते आहेत. ते अकोल्याच्या माळीपुरा भागामध्ये राहतात. गेल्या 30 वर्षांपासून भाजपसाठी निष्ठावंत कार्यकर्ते म्हणून ते काम करीत आहेत. त्यांच्या प्रत्येक श्वासात भाजप आहे. दिवस-रात्र ते भाजपमय असतात असे म्हणणे चुकणार नाही. अर्थात त्यांच्या बाबतीत जे घडले, याची तक्रार त्यांनी केलेली नाही. परंतु संपूर्ण अकोला भाजपमध्ये सध्या संदलकर यांना देण्यात आलेल्या वागणुकीची चर्चा आहे.
संवेदनशीलता नाही
भारतीय जनता पार्टीच्या संदलकरांकडे काही दिवसांपूर्वी एक दुर्दैवी घटना घडली. त्यांच्या कुटुंबातील एका सदस्यांचे निधन झाले. खरंतर अपेक्षित वेगळेच होते. संदलकर यांच्याकडे कौटुंबिक सदस्यांचे निधन झाल्यानंतर, आपल्या कार्यकर्त्यावर दुःखाचा डोंगर कोसळला म्हणून भारतीय जनता पक्षाचे नेत्यांनी तत्काळ तिथे जाणे आणि तातडीने संदलकर यांना मदत करणे अपेक्षित होते. परंतु अकोला भारतीय जनता पार्टीतले नेते हे माणुसकी विसरले.
अकोला भाजपमधील नेत्यांना माणसाची किंमत काय असते याची त्यांना अजिबात जाणीव नाही. यामुळे चार दिवसपर्यंत संदलकर यांच्याकडे भाजपचा कोणताही नेता फिरकला नाही. याउलट अकोला पश्चिमचे काँग्रेस आमदार साजिद खान पठाण यांना ज्यावेळी कळलं की, संदलकर यांच्या कुटुंबावर संकट आलेलं आहे, त्यावेळी साजिद खान पठाण हे तातडीने माळीपुरा भागातील ते संदलकर यांच्याकडे गेले.
Corporation Elections : नागपूरच्या हृदयात भाजप-काँग्रेसची जोरदार टक्कर
म्हणून पराभव
कदाचित विरोधी पक्षातील एक नेता, एका कार्यकर्त्याला फोडायचे आणि आपल्याकडे घ्यायचे किंवा चमकोगिरी करायची असा साजिद खान पठाण यांचा उद्देश असेल, अशी टीका त्यांच्यावर होऊ शकते. पण वस्तुस्थिती ही आहे की, कारण कोणतेही असो साजिद खान पठाण हे तातडीने तिथे काही तासातच पोहोचले. त्यानंतर त्यांनी स्वतः तहसीलदार आणि पोलिसांना फोन करून संदलकर यांना आवश्यक ती मदत मिळेल याची सोय लावली. इतकेच नव्हे तर, सुमारे एक ते दीड तासपर्यंत आमदार साजिद खान पठाण आणि त्यांचे सहकारी हे संदलकर यांच्या घरी तळ ठोकून होते.
जोपर्यंत सर्व प्रक्रिया मार्गी लागत नाही, तोपर्यंत साजिद खान संदलकर यांच्याकडे होते. विजय संदलकर हे अंतरात्म्यातून भाजपचे सच्चे कार्यकर्ते आहेत. त्यांनी जरी या विषयाची कुठेही वाच्यता केली नसली, तरीही भाजपच्या गोटामध्ये या विषयाची प्रचंड चर्चा आहे. भारतीय जनता पार्टीला आपल्या आयुष्यातील 30 वर्ष देणाऱ्या एका कार्यकर्त्याकडे दुःखाच्या प्रसंगामध्ये जाण्यासाठी भाजपच्या नेत्यांना वेळ मिळाला नाही. आता हे सर्व नेते गणेश उत्सवात स्वतः चमकोगिरी करत आहे. जे नेते आपल्या कार्यकर्त्यांच्या दुःखात जात नाही, ते अकोल्यातील नागरिकांना काय मदत करणार, असा प्रश्न उपस्थित होत आहे.
Maharashtra Police : बाळाचे पाणावलेले डोळे, खाकीही अस्वस्थ पण..
भारतीय जनता पार्टीतील नेत्यांबद्दल किती नाराजी आहे, ती कशामुळे आहे याची प्रचिती आता यातून आली आहे. याउलट चमकोगिरी म्हणा किंवा दिखावा म्हणा, असा कितीही आरोप झाला तरी काँग्रेसचे आमदार साजिद खान पठाण यांची लोकप्रियता सध्या अकोला पश्चिम विधानसभा मतदार संघामध्ये वाढत आहे. प्रत्येक ठिकाणी पोहोचणे लोकांच्या मदतीला धावून जाणे असा क्रम त्यांनी सुरू केला आहे.
दिवंगत आमदार गोवर्धन शर्मा यांनी अकोला पश्चिम विधानसभा मतदार संघामध्ये सलग 30 वर्ष भारतीय जनता पार्टीचा झेंडा फडकवला. हा झेंडा मोडून फेकण्याचे काम भाजपने स्वतःच केले आहे. तेही आपल्या कर्मामुळे. साजिद खान पठाण यांचा विजय झाला. आता साजिद खान पठाण हे आमदार झाल्यामुळे ते अनेक वर्षांपर्यंत या मतदारसंघावर आपले वर्चस्व कायम राहावं यासाठी प्रयत्न करत आहेत.
आताही ओव्हर कॉन्फिडन्स
विशेष म्हणजे साजिद खान पठाण आणि बाळापूरचे शिवसेना उद्धव ठाकरे गटाचे आमदार नितीन देशमुख यांना छुपा पाठिंबा भारतीय जनता पार्टीकडूनच होता. साजिद खान पठाण हे यापूर्वी अकोला महानगरपालिकेच्या राजकारणामध्ये सक्रिय होते. त्यावेळी भाजपमधीलच काही नेते त्यांना डोक्यावर घेऊन नाचत होते. आता तेच नेते साजिद खान पठाण यांच्याविरुद्ध मैदानामध्ये उतरले आहेत. त्यामुळे हे नेते किती दोगले आहेत, हे सर्वांना कळले आहे.
परिस्थिती काही जरी असली, तरीही साजिद खान पठाण यांना हे ठाऊक आहे, की अकोला महानगरपालिकेवर सत्ता मिळवायची असेल, तर अकोला पश्चिम विधानसभा मतदारसंघांमध्ये आपले नेटवर्क मजबूत केले जाणे अत्यंत गरजेचे आहे. परंतु या सगळीकडे भारतीय जनता पार्टीच्या नेत्याचे अद्यापही दुर्लक्ष आहे. ते आपसी गटबाजी मध्ये गुंतून पडलेले आहेत. सध्याही ते ओव्हर कॉन्फिडन्समध्ये आहेत. त्यांची मुजोरी अद्यापही सुरू आहे.
भाजपचे दोन नेते आहेत. त्यातील एकाला वाटते की दुसरा मोठा होऊ नये. दुसऱ्याला वाटते की आधीच्याचे राजकीय अस्तित्वच संपले पाहिजे. त्यामुळे हे नेते आपसामध्ये एकमेकांविरुद्ध माहिती पेरण्यामध्ये गुंतले आहेत. याच नेत्यांना डोक्यावर घेऊन भाजपची प्रदेश कार्यकारणी सध्या नाचत आहे. जोपर्यंत हे दोन्ही नेते प्रवाहातून दूर होत नाही, तोपर्यंत अकोल्यामध्ये भारतीय जनता पार्टी व्हेंटिलेटरच असे सर्वांचे म्हणणे आहे.
भारतीय जनता पार्टी अकोल्यामध्ये मरणाच्या अवस्थेमध्ये आहे. भारतीय जनता पार्टीचा जीव अकोल्यामध्ये जर वाचवायचा असेल, तर योग्य मार्गाने साजिद खान पठाण यांना टक्कर देणे अत्यंत गरजेचे आहे. त्यासाठी अकोल्याच्या संपूर्ण भारतीय जनता पार्टीच्या कार्यकारणीमध्ये आणि नेत्यांच्या वागणुकीमध्ये व्यापक बदल केला जाणे ही आता काळाची गरज झाली आहे. जोपर्यंत हे बदल होत नाही, तोपर्यंत अकोल्यामध्ये भाजपचे काही खरे नाही अशी प्रतिक्रिया आता व्यक्त होत आहे.
