मनोज जरांगे पाटील यांच्या नेतृत्वाखालील मराठा आरक्षण आंदोलन यशस्वी ठरले आहे. सरकारने समाजाच्या बहुसंख्य मागण्या संविधानाच्या चौकटीत मान्य केल्या आहेत.
महाराष्ट्रात मराठा आरक्षणाचा लढा गेल्या काही दिवसांपासून जणू रणरागिणीच्या तलवारीसारखा तळपत होता. मुंबईच्या आझाद मैदानात मनोज जरांगे पाटील यांनी ठिय्या मांडला होता. त्यांच्या धगधगत्या आंदोलनाने अखेर यशाचा गुलाल उधळला आहे. मराठा समाजाच्या मागण्यांना सरकारने मान्यता दिली आहे. हा लढा विजयी जल्लोषात संपला. मुख्यमंत्री देवेंद्र फडणवीस यांच्या नेतृत्वाखालील महायुती सरकारने संविधानाच्या चौकटीत राहून मराठ्यांच्या मागण्यांना न्याय दिला आहे. यात भाजपचे विद्यमान नेते तथा माजी मंत्री आमदार डॉ. परिणय फुके यांचा शब्दही खरा ठरला आहे. त्यांनी काही दिवसांपूर्वी ठणकावून सांगितले होते की, संविधानाच्या कक्षेतच मराठ्यांचा लढा यशस्वी होईल. त्यांचा तो शब्द आता प्रत्यक्षात उतरला आहे.
हैदराबाद गॅझेटियर लागू करण्याच्या मागणीला यश मिळाल्याने मराठवाड्यातील लाखो मराठ्यांना कुणबी प्रमाणपत्राचा मार्ग मोकळा झाला. गावकी, भावकी आणि कुळातील नोंदींच्या आधारे आता कुणबी प्रमाणपत्र मिळणार आहे, आणि मराठा समाजाला शासकीय लाभांचे दार खुले झाले आहे. राजेहो, तुमच्या पाठबळाने आम्ही जिंकलो, असा विजयी हुंकार मनोज जरांगे पाटील यांनी आझाद मैदानातून दिला. उपस्थित मराठा बांधवांनी टाळ्यांच्या गजरात हा क्षण साजरा केला. या आंदोलनाने महाराष्ट्राच्या सामाजिक आणि राजकीय पटलावर एक नवा अध्याय लिहिला आहे. डॉ. परिणय फुके यांनी या आंदोलनाच्या काळात आपली भूमिका ठामपणे मांडली. त्यांनी जरांगे पाटील यांना संविधानाच्या कक्षेत राहून मागण्या मांडण्याचा सल्ला दिला होता. संविधानाच्या बाहेर कोणताही कायदा बनवता येणार नाही, असे त्यांनी स्पष्ट केले होते.
Sudhakar Kohale : माजी आमदारांसह प्रवाशांनी घेतला इंडिगोचा थरारक अनुभव
आंदोलनाला नवी दिशा
डॉ. फुके यांच्या या शब्दांना आता यशाची किनार लाभली आहे. डॉ. फुके यांनी मराठा आरक्षणाच्या इतिहासाचा दाखलाही दिला. 2014 ते 2019 या काळात देवेंद्र फडणवीस यांच्या नेतृत्वाखाली मराठा समाजासाठी उचललेल्या पावलांचा उल्लेख केला. त्यांच्या या दूरदृष्टी आणि संयमाने मराठा समाजाच्या भावनांना योग्य दिशा मिळाली. महायुती सरकारने आंदोलनादरम्यान जीव गमावलेल्या आंदोलकांच्या कुटुंबांना आर्थिक मदत आणि नोकरी देण्याचा निर्णय घेतला आहे. तसेच, आंदोलनकर्त्यांवरील गुन्हे मागे घेण्याचे आश्वासनही दिले आहे. हा निर्णय लोकशाही मार्गाने, संवाद साधून आणि सर्वांगीण विचार करून घेण्यात आला आहे, असे डॉ. फुके यांनी सांगितले. मुख्यमंत्री देवेंद्र फडणवीस यांनी कठीण प्रसंगातही संवेदनशीलता आणि दूरदृष्टी दाखवली.
त्यांच्या नेतृत्वाखालील सरकारने मराठा समाजासाठी ऐतिहासिक निर्णय घेतला, असे डॉ. फुके यांनी अभिमानाने नमूद केले. 27 ऑगस्टपासून गणपती बाप्पाच्या आगमनाने महाराष्ट्रात उत्साह संचारला असताना, मराठा आरक्षणाचा मुद्दा पुन्हा एकदा चर्चेच्या केंद्रस्थानी आला. 29 ऑगस्ट 2025 रोजी मनोज जरांगे पाटील यांनी मुंबईच्या रस्त्यांवर आंदोलनाचा झेंडा पुन्हा उभारला. या आंदोलनाला प्रत्युत्तर देताना डॉ. फुके यांनी संविधानाच्या चौकटीतच आव्हान स्वीकारण्याची भूमिका घेतली. त्यांनी जरांगे पाटील यांना अवास्तव मागण्यांपासून परावृत्त करत, संविधानिक मार्गाने मराठा समाजाच्या कल्याणासाठी योजना मागण्याचा सल्ला दिला होता. त्यांच्या या शब्दांनी आंदोलनाला नवी दिशा मिळाली. आता मराठा समाजाच्या मागण्यांना यश मिळाले आहे. या विजयाने महाराष्ट्राच्या राजकीय रंगमंचावर सामाजिक न्यायाचा नवा टप्पा गाठला आहे.
Yashomati Thakur : किरीट सोमय्यांना लागले जात-धर्मात फूट पाडण्याचे वेड
डॉ. परिणय फुके यांच्यासारख्या नेत्यांच्या संयमी आणि संविधाननिष्ठ भूमिकेमुळे मराठा समाजाचा हा लढा यशस्वी झाला. हा विजय मराठा समाजाचा आहे, संविधानाचा आहे, महाराष्ट्राचा आहे असे डॉ. फुके यांनी सांगितले.
