उपमुख्यमंत्री अजित पवारांचा एका महिला आयपीएस अधिकाऱ्याशी संवाद साधतानाचा व्हिडीओ सोशल मीडियावर जोरदार व्हायरल झाला आहे. ज्यामुळे सोशल मीडियापासून ते गल्लीबोळापर्यंत सगळीकडे जोरदार चर्चेला सुरुवात झाली आहे.
महाराष्ट्राच्या राजकीय रंगमंचावर सध्या एक नवा ड्रामा रंगला आहे. उपमुख्यमंत्री अजित पवार आणि आयपीएस अधिकारी अंजना कृष्णा यांच्यातील फोनवरील संभाषणाची एक व्हिडीओ क्लिप सोशल मीडियावर व्हायरल झाली आणि त्याने सगळ्यांचेच कान टवकारले. ‘मी तुझ्यावर कारवाई करेन, तुझी इतकी डेअरिंग आहे का?’ असे तिखट संवाद या व्हिडीओत ऐकायला मिळाले. यामुळे अजित पवारांना ‘व्हिलन’ ठरवताना अंजना कृष्णा यांना ‘लेडी सिंघम’ म्हणून गौरवले जात आहे. पण हा वाद फक्त शब्दांचा नाही. प्रशासकीय कामात हस्तक्षेप आणि राजकीय दबाव यांचा गंभीर मुद्दा यातून समोर आला आहे. या प्रकरणाने सोशल मीडियापासून ते रस्त्यावरील चर्चेपर्यंत सगळीकडे खळबळ माजवली आहे. सोशल मीडियापासून चौकातील चहाच्या टपरी पर्यंत, सगळीकडे एकच गाजतंय.
अजितदादा ‘व्हिलन’, तर अंजना कृष्णा ‘लेडी सिंघम’. महिला अधिकाऱ्यांशी संवाद साधताना कशी पद्धत ठेवावी, हे आता प्रत्येकजण सोशल मीडियाच्या माध्यमातून अजित दादांना सांगताना दिसत आहे. यामुळे हा वाद अधिकच तळमळतोय आणि चर्चेचा तापमान उंचावला आहे. अजित पवार यांनी ट्विटरवर स्पष्टीकरण देताना म्हटले, माझा हेतू कायद्याच्या अंमलबजावणीत हस्तक्षेप करण्याचा नव्हता, तर परिस्थिती शांत ठेवण्याचा होता. पण त्यांचं हे स्पष्टीकरण आगीत तेल ओतण्यासारखंच ठरलं. दुसरीकडे, राष्ट्रवादी काँग्रेसचे आमदार अमोल मिटकरी यांनी अंजना यांच्या UPSC नेमणुकीची चौकशी करण्याची मागणी करणारे पत्रच केंद्रीय लोकसेवा आयोगाला पाठवले. पण नंतर त्यांनी सोशल मीडियावर दिलगिरी व्यक्त करत, ही माझी वैयक्तिक भूमिका होती, पक्षाची नाही, असं सांगत माघार घेतली. पण तोपर्यंत हा वाद चांगलाच तापला होता.
Devendra Fadnavis : महाज्योतीतून ओबीसींसाठी नवे संधीचे पर्व सुरू
बाबा चिलम व्हायरल
संपूर्ण नाट्याचा क्लायमॅक्स अजून बाकी होता. ज्या तालुका अध्यक्ष बाबा जगताप यांच्यासाठी अजित पवारांनी अंजना यांना खडसावलं, तोच बाबा आता पंढरपूरात चिलम फुंकताना कॅमेऱ्यात कैद झाला. हा व्हिडीओ व्हायरल होताच, राष्ट्रवादीच्या कार्यकर्त्यांपासून ते विरोधकांपर्यंत सगळ्यांचे डोळे विस्फारले. बाबा यापूर्वी अवैध मुरूम उत्खनन, सरकारी कामात अडथळा आणि अधिकाऱ्यांना धमकावण्याच्या प्रकरणांमुळे कुप्रसिद्ध होते. आता त्यांच्या या ‘नशिल्या’ कृत्याने अजित पवारांच्या अडचणींत आणखी भर पडली आहे. ज्याच्यासाठी दादांनी इतका रिस्क घेतला, तोच आता चिलम फुंकतोय? असा प्रश्न सर्वत्र विचारला जात आहे. या सगळ्या गदारोळात अंजना कृष्णा यांनी मात्र आपलं कर्तृत्व आणि संयमाने सर्वांचं लक्ष वेधलं. सोलापूर जिल्ह्यातील करमाळा तालुक्यात डेप्युटी सुपरिटेंडेंट ऑफ पुलिस म्हणून कार्यरत असलेल्या अंजना यांचा प्रवास प्रेरणादायी आहे.
केरळमधील तिरुअनंतपुरम येथे साध्या कुटुंबात जन्मलेल्या अंजना यांच्या आई कोर्टात टायपिस्ट आणि वडील कापड व्यवसायी आहेत. सेंट मेरी सेंट्रल स्कूलमधून प्राथमिक शिक्षण घेतल्यानंतर अंजनांनी NSS कॉलेज फॉर वुमन मधून गणितात बीएस्सी पदवी मिळवली. साध्या पार्श्वभूमीतून येऊनही त्यांनी UPSC परीक्षेत यश मिळवत लाखो तरुणांसाठी प्रेरणास्रोत बनण्याचा पराक्रम गाजवला.या वादाने अंजना यांच्या शैक्षणिक प्रवासावरही प्रश्नचिन्ह उपस्थित केलं गेलं. काहींनी त्यांची तुलना पूजा खेडकर यांच्याशी केली, पण अंजना यांनी आपल्या मेहनतीने आणि कर्तृत्वाने हे आरोप खोडून काढले. त्यांच्या यशोगाथेने अनेकांना थक्क केलं आहे. साध्या कुटुंबातून येऊनही मोठी स्वप्नं बघणाऱ्या आणि ती सत्यात उतरवणाऱ्या अंजना आता महाराष्ट्राच्या राजकीय आणि सामाजिक पटलावर एक नवा आदर्श ठरल्या आहेत.
