महाराष्ट्राच्या राजकारणात पुन्हा एकदा वाद पेटला आहे. महसूल मंत्री चंद्रशेखर बावनकुळे यांनी शरद पवारांवर आरोप करत म्हटले की, पवार महाराष्ट्राला चुकीच्या दिशेने नेत आहेत.
महाराष्ट्राच्या राजकीय रंगमंचावर पुन्हा एकदा नवा वाद पेटला आहे. शरद पवार यांच्या एका वक्तव्यानंतर महसूलमंत्री चंद्रशेखर बावनकुळे यांनी तीव्र शब्दांत टीका केली आहे. त्यांनी पवारांना सामाजिक सलोख्याची जाणीव ठेवण्याचा सल्ला दिला आहे. पवार यांनी मराठा आणि ओबीसी समाजासाठी स्वतंत्र उपसमित्यांच्या निर्मितीवर प्रश्नचिन्ह उपस्थित केले होते. यावर बावनकुळे यांनी पलटवार करत पवारांचा हेतू हा महाराष्ट्राला चुकीच्या दिशेने नेण्याचा असल्याचा आरोप केला. सामाजिक एकतेच्या मुद्द्यावरून सुरू झालेला हा वाद आता राज्याच्या राजकारणात नवी ठिणगी पाडण्याची शक्यता आहे.
राज्य सरकारने हैदराबाद गॅझेट लागू केल्यानंतर ओबीसी, बंजारा आणि धनगर समाजाच्या मागण्यांनी जोर धरला आहे. यावर पवारांनी सामाजिक वीण उसवत असल्याची टीका केली होती. याला प्रत्युत्तर देताना बावनकुळे यांनी पवार यांच्या भूतकाळातील कार्यावरच प्रश्न उपस्थित केले. त्यांच्या मते, पवारांनी कधीही मराठा किंवा ओबीसी समाजाच्या उत्थानासाठी ठोस पावले उचलली नाहीत. या वादातून महाराष्ट्राच्या सामाजिक आणि राजकीय समतोलावर नवे प्रश्न निर्माण झाले आहेत.
बावनकुळेंचा आक्रमक पवित्रा
शरद पवार यांनी कोल्हापूर दौऱ्यात सामाजिक एकतेची गरज स्पष्ट केली. त्यांनी उपसमित्यांमध्ये एकाच जातीच्या सदस्यांचा समावेश असल्याबद्दल नाराजी व्यक्त केली. अशा रचनेमुळे सामाजिक कटुता कमी होण्याऐवजी वाढण्याची भीती त्यांनी व्यक्त केली. गावागावांत निर्माण झालेली कटुता आणि परस्परांमधील व्यवसायिक दुरावा यावर त्यांनी चिंता व्यक्त केली. पवार यांच्या मते, सरकारने सर्वसमावेशक समित्या स्थापन करून सामाजिक सलोखा राखण्यासाठी प्रयत्न करायला हवेत. या वादातून महाराष्ट्राच्या सामाजिक संरचनेला नवे आव्हान उभे राहिले आहे.
Sanjay Deshmukh : बळीराजाच्या आत्महत्यांना आमंत्रण देतंय सरकारचं दुर्लक्ष
चंद्रशेखर बावनकुळे यांनी शरद पवार यांच्या वक्तव्याला थेट आव्हान देताना म्हटले की, मराठा आणि ओबीसी उपसमित्या समाजात एकता आणि समन्वय वाढवण्यासाठी स्थापन केल्या आहेत. त्यांनी पवार यांच्यावर सामाजिक तेढ निर्माण होऊ शकणारी वक्तव्ये टाळण्याची सूचना केली. बावनकुळे यांनी मुख्यमंत्री देवेंद्र फडणवीस यांच्या नेतृत्वाखालील उपसमित्यांचे समर्थन करताना सांगितले की, या समित्या सामाजिक प्रश्न सोडवण्यासाठी आणि महाराष्ट्राला बळकट करण्यासाठी कार्यरत आहेत. पवार यांनी कधीही सामाजिक समता प्रस्थापित करण्याचा विचार केला नसल्याचा टोला त्यांनी लगावला.
