राहुल गांधींनी पुन्हा एकदा 18 सप्टेंबर रोजी पत्रकार परिषद घेत, भाजपावर निवडणूक आयोगाच्या माध्यमातून मोठ्या प्रमाणात मत चोरी करण्याचा गंभीर आरोप केला.
देशाच्या राजकीय वातावरणात सध्या खळबळ माजली आहे. याला कारण ठरलंय काँग्रेसचे खासदार आणि लोकसभेतील विरोधी पक्षनेते राहुल गांधी यांनी 18 सप्टेंबर 2025 रोजी घेतलेली पत्रकार परिषद. या पत्रकार परिषदेत त्यांनी निवडणूक प्रक्रियेवरच प्रश्नचिन्ह उपस्थित केलं आहे. यापूर्वी महाराष्ट्रात मत चोरीचा आरोप करणाऱ्या राहुल गांधींनी आता कर्नाटकातील मतदार यादीतून मतदारांची नावे गायब होण्याचा मुद्दा उचलला आहे. त्यांच्या या आरोपांनी राजकीय वर्तुळात खळबळ उडाली आहे. गुरुवारी, राहुल गांधींनी मत चोरी या विषयावर दुसऱ्यांदा पत्रकार परिषद घेतली. यापूर्वी 7 ऑगस्ट रोजी त्यांनी माध्यमांशी संवाद साधला होता. तेव्हाही त्यांनी निवडणूक आयोगावर गंभीर आरोप केले होते.
राहुल गांधी यांनी यावेळी 31 मिनिटांच्या सादरीकरणात स्फोटक दावे केले. निवडणूक आयोग जाणूनबुजून काँग्रेसच्या मतदारांना लक्ष्य करत आहे. त्यांची नावे मतदार यादीतून हटवत आहे, असा थेट हल्लाबोल त्यांनी केला. विशेष म्हणजे, कर्नाटकातील काही मतदारांना सोबत घेऊन त्यांनी या घोटाळ्याचे पुरावेही सादर केले. राहुल गांधी यांनी कर्नाटकातील आलंद विधानसभा मतदारसंघाचा दाखला देत सनसनाटी खुलासा केला. त्यांच्या मते, या मतदारसंघात तब्बल 6 हजार 18 मते हटवण्याचा प्रयत्न झाला. 2023 निवडणुकीत एकूण किती मते हटवली गेली, याचा अंदाज नाही. पण ही संख्या 6 हजार 18 पेक्षा कितीतरी जास्त असू शकते, असं ते म्हणाले.
Chandrashekhar Bawankule : स्वतःचे कर्तृत्व नसताना दुसऱ्यांना बोलण्याचा हक्क नाही
निवडणूक आयोगावर दबाव
संपूर्ण प्रकरणाचा पर्दाफाश कसा झाला, याचं वर्णनही त्यांनी नाट्यमय पद्धतीने केलं. एका बूथ-स्तरीय अधिकाऱ्याला त्याच्या काकांचे मत मतदार यादीतून गायब झाल्याचं लक्षात आलं. त्याने चौकशी केली, तेव्हा त्याला कळलं की त्याच्या शेजाऱ्याच्या नावावरही तेच झालं आहे. पण शेजाऱ्याने स्पष्ट सांगितलं, ‘मी कोणतंही मत हटवलं नाही.’ याचा अर्थ एकच, की कोणीतरी अज्ञात शक्तीने निवडणूक यंत्रणा हायजॅक केली आणि मतदारांची नावे हटवली, असा गंभीर आरोप राहुल गांधींनी केला. त्यांनी हा प्रकार म्हणजे लोकशाहीवरील थेट हल्ला असल्याचं म्हटलं.
राहुल गांधी यांनी या पत्रकार परिषदेत केवळ आरोपच केले नाहीत, तर त्यांच्याकडे पुरावे असल्याचा दावाही केला. ही मत चोरी म्हणजे निवडणूक आयोगाच्या विश्वासार्हतेवरच प्रश्नचिन्ह आहे. कोणीतरी यंत्रणा हातात घेऊन लोकशाहीला धोका निर्माण केला आहे, असं ते म्हणाले. त्यांनी कर्नाटकातील मतदार यादीतील गैरप्रकारांचा तपशील देताना, हा प्रकार देशभरात घडत असण्याची शक्यताही वर्तवली. या पत्रकार परिषदेने राजकीय वातावरण ढवळून निघालं आहे. राहुल गांधींच्या या आरोपांमुळे निवडणूक आयोगावर दबाव वाढला आहे. आता प्रश्न असा आहे, की या गंभीर आरोपांवर निवडणूक आयोग काय उत्तर देणार?
Sharad Pawar : कर्जाचा गळफास ते बेड्यांचा झटका; राष्ट्रवादीला विदर्भात शॉक
