वरूड आणि मोर्शी तालुक्यातील अतिवृष्टीमुळे शेतकऱ्यांचे संत्रा, मोसंबी, कापूस, सोयाबीनसह अनेक पिके उद्ध्वस्त झाली आहेत. या संकटाच्या पार्श्वभूमीवर आमदार उमेश यावलकरांनी शेतकऱ्यांना तातडीची मदत मिळावी म्हणून जिल्हाधिकाऱ्यांकडे सरसकट पंचनाम्यांची मागणी केली आहे.
वरूड-मोर्शी तालुक्यावर निसर्गाने कहर केला आहे. सततच्या मुसळधार पावसाने आणि अतिवृष्टीने शेतकऱ्यांच्या आशा धुळीला मिळाल्या आहेत. येथील शेती, जी शेतकऱ्यांच्या कष्टाची आणि स्वप्नांची साक्ष आहे. ती उद्ध्वस्त झाली आहे. या संकटात शेतकऱ्यांचा आधार बनून उभे राहिले आहेत आमदार उमेश उर्फ चंदू यावलकर. त्यांनी शेतकऱ्यांच्या दुःखाला वाचा फोडण्यासाठी जिल्हाधिकारी आशिष येरेकर यांच्याकडे निवेदन सादर केले आहे. शेतकऱ्यांच्या नुकसानग्रस्त पिकांचे सरसकट पंचनामे करून तातडीने मदत मिळवून देण्याचा त्यांचा निर्धार आहे.
या तालुक्यांतील शेतकरी आधीच आर्थिक संकटात असताना, अतिवृष्टीने त्यांच्यावर दुष्टचक्र आणले आहे. संत्रा, मोसंबी, कापूस, तूर, सोयाबीन यांसारखी पिके, ज्यांच्यावर शेतकऱ्यांचे भविष्य अवलंबून होते. ती हाती येण्यापूर्वीच नष्ट झाली आहेत. यावेळी आमदार यावलकर यांनी शेतकऱ्यांच्या व्यथा समजून घेत, प्रशासनाला जागे करण्यासाठी पुढाकार घेतला आहे. त्यांनी जिल्हाधिकाऱ्यांसमोर वरूड आणि मोर्शी तालुक्यांतील शेतकऱ्यांचे कष्ट आणि नुकसान यांचे विदारक चित्र मांडले.
शेतकऱ्यांचे कष्ट पाण्यात
वरूड आणि मोर्शी तालुक्यांतील शेतकरी आपल्या कष्टाने पिकवलेल्या संत्रा, मोसंबी, कापूस, तूर, सोयाबीन, हळद, मिरची आणि मका या पिकांना पाण्यात पाहत आहेत. अतिवृष्टीने शेतकऱ्यांचे स्वप्नच नव्हे, तर त्यांचा आर्थिक आधारच उद्ध्वस्त केला आहे. शेतकऱ्यांनी कर्ज काढून, रात्रंदिवस मेहनत करून पिकवलेली ही पिके आता नष्ट झाली आहेत. यामुळे शेतकरी कुटुंबे आर्थिक संकटात खोलवर रुतली आहेत. या संकटातून शेतकऱ्यांना बाहेर काढण्यासाठी आमदार यावलकर यांनी प्रशासनाला तातडीने पंचनामे करण्याचे आवाहन केले आहे.
आमदार यावलकर यांनी जिल्हाधिकाऱ्यांशी भेटीत शेतकऱ्यांच्या परिस्थितीचे सखोल वर्णन केले. त्यांनी प्रशासनाला नुकसानग्रस्त भागांची तात्काळ पाहणी करण्याची विनंती केली आहे. सरसकट पंचनामे करून नुकसानीचा अहवाल शासनाकडे पाठवावा. शेतकऱ्यांना त्वरित आर्थिक मदत मिळावी, यासाठी त्यांनी जोरदार मागणी केली आहे. शेतकऱ्यांच्या हितासाठी त्यांचा हा लढा केवळ प्रशासकीय पातळीवरच नाही. शासनापर्यंत पोहोचवण्याचा त्यांचा मानस आहे. यावलकर यांनी आपल्या मतदारसंघातील प्रत्येक शेतकऱ्याच्या दुःखाला आपले दुःख मानले आहे.
आमदार यावलकर यांचा हा प्रयत्न शेतकऱ्यांसाठी आशेचा किरण ठरत आहे. त्यांनी केलेली मागणी आणि प्रशासनाला केलेले आवाहन यामुळे शेतकऱ्यांना तातडीने मदत मिळण्याची आशा निर्माण झाली आहे. वरूड-मोर्शी तालुक्यांतील शेतकऱ्यांचे नुकसान भरून निघावे. त्यांना पुन्हा उभे राहण्याची संधी मिळावी, यासाठी यावलकर यांचे प्रयत्न अखंड सुरू आहेत. त्यांच्या या कृतीमुळे शेतकऱ्यांना आधार मिळाला आहे. प्रशासन आणि शासनाकडून त्वरित कारवाईची अपेक्षा वाढली आहे.
