नागपूर शहरात नवरात्रीचा रंगीबेरंगी उत्साह थांबताच, दसऱ्याचा सोनेरी सण शहरात साजरा होण्याच्या तयारीत आहे. या सणात सुरक्षा आणि सुव्यवस्था राखण्यासाठी आयपीएस एस. ऋषिकेश रेड्डी यांच्या नेतृत्वाखाली स्मार्ट पोलिसिंगचा नवा प्रयोग दिसणार आहे.
नागपूर शहरात यंदाचा नवरात्री महोत्सव थाटामाटात साजरा झाला. रंगीबेरंगी दांडिया, गगनाला भिडणारा उत्साह आणि भक्तीचा सुगंध यांनी शहराला एक वेगळाच रंग चढला. परंतु, आता नवरात्रीच्या या रंगमंचाचा पडदा खाली येत आहे. अवघ्या काही तासांत दसऱ्याचा सोनेरी सण अवतरतो आहे. प्रत्येकजण आपापल्या परीने या सणाची तयारी करत आहे, पण या सगळ्या उत्साहात एक नाव गाजत आहे, आयपीएस एस. ऋषिकेश रेड्डी. या तरुण, उत्साही आणि नाविन्यपूर्ण दृष्टिकोन असलेल्या अधिकाऱ्याने नागपूर पोलिसांच्या कार्यशैलीत एक नवा अध्याय लिहिण्याचा संकल्प केला आहे. त्यांच्या नेतृत्वाखाली दीक्षाभूमीवरील दसरा महोत्सव यंदा केवळ शांततामयच नाही, तर तंत्रज्ञानाच्या कसोटीवरही अभूतपूर्व ठरणार आहे.
दीक्षाभूमी, जिथे दरवर्षी लाखो भीमसैनिकांचा मेळा जमतो. तिथे यंदा काहीतरी वेगळे घडणार आहे. गर्दीचा लोट, भाविकांचा उत्साह आणि सणाचा जल्लोष यांच्यामध्ये शांतता आणि सुव्यवस्था राखण्याचे आव्हान पोलिसांसमोर असते. पण यंदा, ऋषिकेश रेड्डी यांनी एक असा प्रयोग हाती घेतला आहे. जो नागपूर पोलिसांच्या इतिहासात सुवर्णाक्षरांनी नोंदवला जाईल. त्यांच्या या नाविन्यपूर्ण दृष्टिकोनामुळे दीक्षाभूमीवरील बंदोबस्त यंदा तंत्रज्ञानाच्या साथीने अधिक सक्षम आणि स्मार्ट होणार आहे. त्यांच्या नेतृत्वाखालील हा उपक्रम केवळ सुरक्षेची हमीच देणार नाही, तर पोलिसिंगच्या नव्या युगाची नांदी ठरेल.
Chandrashekhar Bawankule : संपूर्ण पंचनाम्यांवर लक्ष ठेवतेय सरकार
तंत्रज्ञानाची जादू
ऋषिकेश रेड्डी यांनी दीक्षाभूमीच्या बंदोबस्तासाठी कृत्रिम बुद्धिमत्तेचा (एआय) वापर करण्याचा अभिनव निर्णय घेतला आहे. यंदा, दीक्षाभूमी परिसरात शंभरहून अधिक सीसीटीव्ही कॅमेरे बसवले जाणार आहेत, जे सर्व एआय सॉफ्टवेअरशी जोडलेले असतील. हे सॉफ्टवेअर इतके प्रगत आहे की, कुठेही गर्दी वाढली किंवा वाहतूक कोंडी झाली, तर तात्काळ पोलिसांना सूचना मिळेल. यामुळे पोलिसांना त्वरित कारवाई करणे शक्य होईल. एवढेच नव्हे, तर असामाजिक तत्त्वांचा मागोवा घेण्यासाठीही हे तंत्रज्ञान वरदान ठरणार आहे. उदाहरणार्थ, जर कोणी दगड हातात घेऊन उपद्रव करण्याचा प्रयत्न केला किंवा उच्छाद मांडण्याचा प्रयत्न केला तर एआय सिस्टीम तात्काळ त्याची ओळख पटवून पोलिसांना सावध करेल. यामुळे मॅन्युअल देखरेखीवरील ताण कमी होऊन पोलिसांना अधिक कार्यक्षमतेने काम करता येईल.
Prakash Ambedkar : वंचितच्या युतीच्या हाकेला काँग्रेसचा कानाडोळा
ऋषिकेश रेड्डी हे नाव आता नागपूर पोलिस दलात नव्या जोशाचे आणि नाविन्याचे प्रतीक बनले आहे. त्यांनी या उपक्रमासाठी अनेक दिवस संशोधन केले. त्यांच्या या प्रयत्नांना पोलीस आयुक्त डॉ. रवींद्र सिंगल, सहपोलीस आयुक्त नवीनचंद्र रेड्डी आणि अतिरिक्त पोलीस आयुक्त डॉ. शिवाजी राठोड यांचे पूर्ण समर्थन मिळाले आहे. ही त्रयी आणि ऋषिकेश रेड्डी यांची तरुण, कर्तबगार टीम यंदा दीक्षाभूमीवरील महोत्सवाला एक नवा आयाम देण्यासाठी सज्ज आहे. ऋषिकेश रेड्डी यांचा हा स्मार्ट पोलिसिंगचा प्रयोग यशस्वी झाल्यास, तो इतर शहरांसाठीही एक आदर्श ठरेल. त्यांच्या या धडाडीने आणि तंत्रज्ञानाच्या बळावर, दीक्षाभूमीचा दसरा महोत्सव यंदा केवळ शांततामयच नाही, तर तंत्रज्ञानाने सजलेला आणि सुरक्षिततेचा नवा मापदंड ठरेल.
